چیرۆكی ژن خوشكه‌ موسوڵمانه‌كه‌ی تۆنی بلێر بخوێنه‌ره‌وه‌

چیرۆكی ژن خوشكه‌ موسوڵمانه‌كه‌ی تۆنی بلێر بخوێنه‌ره‌وه‌

خێزان - ڕاوێژ كامه‌ران

چیرۆكی موسوڵمانبونی كه‌سایه‌ته‌ به‌ناوبانگه‌كانی دونیا هه‌میشه‌ كاردانه‌وه‌ی زۆری به‌دوای خۆیدا هێناوه‌، به‌ڵام به‌دڵنیایه‌وه‌ مسوڵمانبونی لورین بۆز  ژنخوشكی تۆنی بلێری سه‌رۆك وه‌زیرانی بریتانیا و شه‌شه‌مین كچی ئه‌كته‌ری به‌ناوبانگی بریتانی تۆنی بۆز ناودارترینیانه‌.

لورین بۆز له‌ ساڵی 1967 له‌دایك بووه‌و دواتر بۆته‌ رۆژنامه‌نوسێكی چالاكی بریتانی، ئه‌و به‌ دژایه‌تیكردنی سیاسه‌ته‌كانی زاواكه‌یان (تۆنی بلێر) كه‌ هاوسه‌ری چیریر بریی خوشكی بوو ناوبانگی زۆری ده‌ركرد،  به‌تایبه‌تیش له‌ پاش ساڵی 2003 له‌سه‌ر هێرشكردنه‌ سه‌ر عێراق و كه‌رتی غه‌زه‌ ڕه‌خنه‌ی زۆری له‌ تۆنی بلێر گرت.



دواتر لورێن چه‌ند سه‌ردانێكی مه‌یدانی كرد بۆ فه‌ڵه‌ستین به‌مه‌به‌ستی ئاماده‌كردنی ڕاپۆرتی رۆژنامه‌نوسی و پاشانیش په‌یوه‌ندیه‌كی زۆری له‌گه‌ل ئیسماعیل هه‌نیه‌دا په‌یداكرد كه‌ سه‌رۆك وه‌زیرانی فه‌له‌ستین بوو، به‌وهۆیه‌شه‌وه‌ له‌ سالی 2008 ڕه‌گه‌زنامه‌ی فه‌ڵه‌ستنیی پێدرا.



لۆرین پێشتر و له‌ ساڵی 2000 شوی كردبوو به‌ ئه‌كته‌ری بریتانی كرێك داربی  و دوو كچیشی به‌ناوه‌كانی هولی و ئه‌لیكساندرا لێی هه‌بوو، به‌ڵام دواتر له‌ ساڵی 2010 لێی جیا بویه‌وه‌.



له‌ پاش ئه‌وه‌وش له‌ هه‌مان ساڵدا (2010) لورین بۆز له‌ سه‌ر شاشه‌ی كه‌ناڵی به‌ناوبانگی به‌ڕیتانی Islam Channel به‌ جلوبه‌رگی ئیسلامی و باڵاپۆشیه‌وه‌ ده‌ركه‌وت و گوتی(من ناوم لورین بۆزه‌ و ئێستا من موسوڵمانم)، مسوڵمانبونیشی ده‌نگدانه‌وه‌ی زۆری له‌ ڕاگه‌یاندنه‌كانی به‌ڕیتانیا و جیهاندا هه‌بوو.



لۆرین له‌ ژێر كاریگه‌ری سه‌ردانه‌كانیدا بۆ فه‌ڵه‌ستین موسوڵمان بوو، بۆخۆی باس له‌وه‌ده‌كات كه‌ یه‌كه‌مجار هه‌واڵی مسوڵمانبونه‌كه‌ی به‌ دوو كچه‌كه‌ی وتووه‌، ئه‌و ده‌ڵێت"من له‌و كاته‌دا هۆڵی كچم 8 ساڵ و ئه‌لیكساندراش 10 ساڵ بوو، كاتێك پێم گوتن من موسڵمان بووم، سێ پرسیاریان لێكردم، یه‌كه‌میان گوتیان تۆ پاش ئه‌وه‌ وه‌ك دایكی ئێمه‌ ده‌مێنیت، منیش گوتم به‌دڵنیایه‌وه‌ زۆر له‌ جاران باشتر ئاگادارتان ده‌بم، پاشان له‌ پرسیاری دووه‌مدا وتیان، ئیدی چیدیكه‌ مه‌ی و خواردنه‌وه‌ كحولیه‌كان ناخۆیته‌وه‌؟ منیش گوتم به‌ڵێ بۆ له‌مه‌ودوا ئه‌وانه‌ ناخۆمه‌وه‌ چونكه‌ له‌ ئایینه‌ نوێكه‌مدا قه‌ده‌غه‌یه‌، پاشان پرسیان ئه‌ی بۆ له‌مه‌ودوا جلی كورت له‌به‌رده‌كه‌یت كه‌ ده‌ركه‌وتنت به‌و جلانه‌وه‌ بۆته‌ مایه‌ی شه‌رمه‌زاری بۆ ئێمه‌ له‌ خوێندنگه‌، منیش پیم گوتن نا بۆ له‌مه‌ودوا هیچ جلێكی كورت له‌به‌ر ناكه‌م، پاشان ئه‌وانیش له‌ خۆشیاندا ده‌ستیانكرد به‌ هاوار و له‌ باوه‌شیان كردم"



لۆرین پاش ئه‌وه‌  بووه‌ چالاكوان و بانگخوازێكی ئیسلامی به‌ناوبانگ و له‌ ساڵی 2013 دا هاوسه‌رگیری له‌گه‌ڵ چالاكوان و بانگخوازی ئیسلامی سوهیل ئه‌حمه‌ددا كرد و ئێستاش رێكخراوێكی خێرخوازیان هه‌یه‌ بۆ هاوكاریكردنی خانه‌واده‌ زیانلێكه‌وتوه‌كانی ده‌ستی تیرۆر و دوو كچه‌كه‌شی به‌ جلوبه‌رگی باڵاپۆشیه‌وه‌ ده‌رده‌كه‌ون.



جگه‌ له‌وه‌ش لۆرین له‌ زۆربه‌ی بڵاوكراوه‌كانیدا له‌ ڕاگه‌یاندنی به‌ڕیتانیا هه‌وڵی ئه‌وه‌ ده‌دات ئه‌و تێگه‌یشتنه‌ هه‌ڵه‌یه‌ی هاوڵاتیانی به‌ڕیتانی له‌سه‌ر ئیسلام ڕاستبكاته‌وه‌ كه‌ به‌هۆی ڕاگه‌یاندنه‌كانه‌وه‌ بۆیان دروستبووه‌.








ئه‌م بابه‌ته 19350 جار خوێنراوه‌ته‌وه‌‌

PM:10:01:11/01/2016