بێژەرە كوردەكان بۆچی لەسەر شاشە دەستدەكەن بە گریان؟

بێژەرە كوردەكان بۆچی لەسەر شاشە دەستدەكەن بە گریان؟

خێزان -  زێدان سوبحی

دەمێكە هەواڵا و وێنە و ڤیدیۆی بەشێكی زور لە بێژەرانی شاشە كوردیەكان بڵاودەبێتە و  ئەم دیاردەیەش تا ڕادەیەك لەم دواییانەدا بە شێوەیەكی بەرفراوان زیادی كردووە، پسپۆڕانیش لێكدانەوەی جیاوازیان بۆ گریانی ئەم راگەیاندكارانە هەیە.

لەم بارەیەوە هاوبیر عومەر  بێژەری كەناڵی  كوردسات نیوز  لە لێدوانێكیدا بۆ  خەڵك  وتی "بێژەر بەدەر لەو كاراكتەرەی پێی ناسراوە و هەمیشە بەریەك كەوتنی لەگەڵ بینەر هەیە ، مرۆڤەو خاوەنی هەست و سۆزە، پێكەنین و گریان شتێكی ئاساییە و لە كەناڵە جیهانیەكان و عەرەبیەكانیش لەم حاڵاتەنەمان زۆر بینیوە".

ئەم بێژەرە وتیشی" بەڵام ئەوەی ئێستا لە مێدیاكانی خۆمان دەیبینین ڕووداوێكی هێندە هەست بزوێن نەبووە تا وا لەبێژەر بكا كۆنتڕۆڵی خۆی دەستبدا و كاردانەوەكەی بە چەشنێ بێت كە دوربێت لەو كەسایەتیە بەهێزەی كە خاڵی جیاكەرەوەی بێژەرە لەگەڵ هەر كاراكتەرێكی ناو مێدیا، بە تایبەت بێژەری هەواڵ دەبێ كەسێتیەكی خۆڕاگرو ئارام بێت"

لەماوەی رابردوو دا  بێژەرەكانی كەناڵی  ڕووداو پشكی شێریان بەردەكەوت و ژمارەیەكی زۆر لە بێژەرەكانیان لە پەخشی ڕاستەوخۆدا گریاون و بێژەرەكی ئەم كەناڵەش پێی وایە بێژەریش مرۆڤە و هەست و  سۆزی هەیە، هەر بۆیە لە هەندێك دۆخدا ناتوانێت كە نەگری، دكتۆر ئاراس بێژەری كەناڵی ڕوداو وتی" بە ڕای من ئەوە  ئەوپەڕیی تێكەڵبوونی بێژەرە لەگەڵ ڕوداوێك كە پێشكەشی بینەری دەكات، ئەو تەنیا بێژەرێك نییە، بەڵكو وەكو ئەكتەرێك دەچێتە نێو جەرگەی ڕووداوەكەو هەست و سۆزی تێكەڵ بە هەستیارییەكانی ئەو هەواڵە دەكات كە پێشكەشی دەكات، لەو بڕوایەدانیم هیچ بێژەرێك گریان بكاتە هۆكارێك بۆ ناوبانگ دەركردن"

بەوتەی دەروناسێك، شتێكی ئاساییە كە بێژەر لەسەر شاشە بە كاریگەری لەگەڵ ڕوداوێك بگری، بەڵام ئەوەش لە دۆخی زۆر تایبەتدا، ئەدهەم ئیسماعیل دەرونناس و مامۆستای زانكۆ لە دهۆك لەو بارەیەوە وتی"گریان شێتێكی ئاساییە و دەمێنێتەوە لەسەر كەسایەتی مروڤەكان كە ئایا ئەو دیمەنەی كە بۆی گریاوە‌ دیمە‌نێكی بەهێزە یان نا، هەر بۆیە ئاساییە گەر بێژەرێك بە دیمەنێكی زۆر كاریگەر بكەوێتە گریان، بەڵام ئەوەی لە كوردستاندا دەبیندرێت ئەوەیە كە بەشێكیان تەنها بۆ ئەوەی دەری بخەن كە زۆر دڵ ناسكن و خاوەن هەستن ئەو كارە دەكەن"

بەڵام ئەو دەرنونناسە ئەوەش ناشارێتەوە كە هەندێكجار ئەو گریانانە تەنها بۆ ڕاكێشانی بینەری زیاتر و پەیداكردنی ناوبانگ بە شێوازێكی نواندن ئەنجام دەدرێن.


ئه‌م بابه‌ته 9540 جار خوێنراوه‌ته‌وه‌‌

PM:01:57:19/10/2015