باران: خه‌ونی گه‌وره‌م ئه‌وه‌یه‌ بێمه‌ كوردستان

باران: خه‌ونی گه‌وره‌م ئه‌وه‌یه‌ بێمه‌ كوردستان

دیمانەی ڕاوێژ كامەران


كچە گۆرانیبێژی بەناوبانگی ئێرانی باران، هەرچەندە سەرجەم گۆرانیەكانی بە زمانی فارسیە، بەڵام لە ماوەی ڕابردودا گۆرانیەكی كوردی لە تۆڕە كۆمەڵایەتیەكان بڵاو كردەوە، باران لە دایكبووی ساڵی 1988 ە لە مەهاباد و ئێستاش لە كەنەدا دەژی، لەم دیمانەیەشدا باس لە پەیوەندی خۆی بە كوردستانەوە دەكات.

خێزان: هەرچەندە سەرجەم گۆرانیەكانت بە زمانی فارسیە، بەڵام لە ماوەی ڕابردوو گۆرانیەكی نافەرمیت بە زمانی كوردی بڵاو بویەوە، پلانت هەیە گۆرانی بە كوردی بڵێیت؟
باران: ئەو گۆرانیە هی هونەرمەندی گەورە كەریم كابان بوو، كە باوكم زۆر زۆر حەزی بە دەنگیەتی و تەواوی خانەوادەكەشم حەزیان پێ بوو، هەر بۆیە بڕیارمدا كە گۆرانیەكەیان بۆ بڵێم، هەر بۆیە ئەو گۆرانیە تایبەت بوو بە خانەوادەكەم، بەڵام بەڵێ بە دڵنیایەوە نیازم هەیە كە بە كوردی گۆرانی بڵێم. 



خێزان: حەزەكەت بێتە كوردستان؟ 
باران: تا ئێستا بەرنامەیەكی وەهام نەبووە كە سەردانی كوردستان بكەم، چونكە تەواوی خێزانەكەم لە كەنەدا و ئەمریكا دەژین، بەڵام زۆر حەزدەكەم كۆنسێرتێك لە كوردستان بكەم و سەردانی ئەوێ‌ بكەم، كێ‌ دەزانێت رەنگە لە ئایندەیەكی نزیكدا سەردانی كوردستان بكەم، ئەوە یەكێكیشە لە گەورەترین خەونەكانم.

خێزان: جگە لە موزیك حەزت بە چی دیكەیە؟
باران: زۆر كاری دیكە دەكەم، بەدڵنیایشەوە موزیك گرنگترینیانە، بەڵام وێنە زۆر دەكێشم و كتێبیش زۆر دەخوێنمەوە، هەروەها گەر كاتم هەبێت هۆندراوەو كورتە چیرۆك دەنوسم و هەموو رۆژێكیش دەچم بۆ سەنتەری رەشاقە، بەو هۆیەشەوە بەردەوام سەرقاڵم.




خێزان: پەیوەندیت لەگەڵ ئایندا چۆنە؟
باران: من هیوای ژیانێكی خۆش و پڕ لە ئاشتی بۆ هەموان دەخوازم، رێزم بۆ هەموو ئاینەكانیش هەیەو پێموایە هەمومان خوشك و براین.


خێزان: ئەی لەسەر خۆشەویستی ڕات چیە؟
باران: خۆشەویستی تاكە هێزێكە كە بتوانێت تەواوی دونیا بگۆڕێت، ئەگەر ئێمە بزانیت كە چۆن دەوروبەرەكەمان خۆشبوێت و وابكەین كە ئەوانیش ئێمەیان خۆش بوێت ئەوا لە ئاشتیدا دەژین، ئاشتی بۆ هەموان، من هەموو شەوێك خەون بە رۆژێكی وەهاوە دەبینم.







ئه‌م بابه‌ته 2976 جار خوێنراوه‌ته‌وه‌‌

AM:12:13:19/07/2015