عادل هەورامی : هاوڵاتیان خەجاڵەتیان كردووم

عادل هەورامی : هاوڵاتیان خەجاڵەتیان كردووم

خێزان

هونەرمەندی بەناوبانگ عادل هەورامی لەم دیدارەی لەگەڵ ماڵپەری خەڵك چەندنین نهێنی ژیانی خۆی ئاشكرا دەكات و تیشك دەخاتە سەرئەوەی زۆرێك لە هونەرمەندان بونەرە هۆكار بۆ دواكەوتنی هونەری كوردی لە ناوچەكەدا و ئەمە جگە لەوەی حكومەتی هەرێم و لایەنە پەیوەندیدارەكان چاوكراوە نەبوون لە چارەسەكردنی ئەم كێشەیەدا

خێزان: مێژووی چونە ناو دنیای هونەری كوردی عادل هەورامی بۆ كەی دەگەڕێتەوە؟
عادل هەورامی : سەرەتا زۆرسوپاستان دەكەم بۆ ئەنجامدانی ئەمدیدارەو بەسەركردنەوەی هونەرمەندان ، مێژووی چونە ناودنیای هونەریم دەگەڕێتەوە بۆ ساڵی ١٩٩٣ ئەو كاتەی كە خولیای هونەر و گۆرانی وتنم گەشتە لوتكە ، بەشێوەیەك وەك دەوترا هونەر دۆست بووم ، دەكرێت ئەم هۆكارە بگەڕێنمەوە بۆئەو كەش و بارودۆخەی تێیدا دەژیام بەتایبەت باوكم كە دەنگێكی ناوازەی هەبوو ، یان ئەو هونەرمەندانەی كە سەردانیان دەكردین وەك كاك.عوسمان كێمنەی زۆر تێكەڵاوی ماڵی ئێمەی دەكرد و ئێستەش بەهەمان شێوە پەیوەندیمان هەیە ، زۆركاتیش هونەرمەندە عەرەبەكانمان دەبینی ،دواتر بەهۆی گۆڕانی بارودۆخی سیاسی ناوچەكە كۆچمانكرد بەرەو وڵاتی ئێران و ساڵی ١٩٩٢ كەگەڕامەوە بۆ كوردستان و لەشاری سلێمانی گیرساینەوە لەساڵی ١٩٩٣ بریارمدا كەدەست بكەم بەكاركردن لە بواری هونەرداو یەكەم گۆرانیشم بەناوی (قەڵای سم بارانی غەم)بوو، كەدابەشكردنی مۆسیقاكەی لەلایەن كاك(سەلاح ڕەووف)بوو، وەهۆنراوەكەشی هۆنراوەی فۆلكلۆربوو ، وەدەنگدانەوەیەكی گەروەی دروستكرد ، هەمیشە چاوەڕێم دەكرد كارێكی لەوباشتر ئەنجام بدەم ، ئەوەبوو لە ساڵی ٢٠٠٠ ئەلبومی (گەردون)تۆماركرد ، كە گۆرانییەكی لەو خۆشتر دەرچوو وە گوێگرێكی زۆریشی هەبوو.




خێزان: كەواتە دەركەوتنی تۆ بەهۆی خێزان و كلتورەكەتەوە بووە؟
عادل هەورامی : من خێزانەكەم دەنگ خۆشی تێدابوو ، ڕۆژانە گوێم بۆ دەگرتن بەڵام لەو ڕووەی كەبچمە ناودنیای هونەرەوە نا پێچەوانەی من بوون پێیان خۆش نەبوو دەربكەوم ، باوكم دەیوت هونەر لەم وڵاتەدا هیچی بۆ كەس پێ نەبووە و بۆكەسیشی نەكردوە ئەو هەمیشە دەیویست بخوێنم و سەرقاڵی كاری بازرگانی بم نەك هونەر.

خێزان: چۆن ڕێك كەوتن لەگەڵ باوكتدا؟
عادل هەورامی : بەتێپەڕبوونی كات ڕازی بوو ئەویش بەهۆی ئەوەی كە من خێزانم جیابوو لەگەڵ ئەوان ، وە تێدەگەیشت كە من ئەوكارەبكەم كارێكی ڕەسەنایەتی دەكەم كارێكی جوان دەكەم بۆ پارەنایكەم یان كەسی پێ هەراسان ناكەم .

خێزان: هونەرەكەتت بۆ دەوڵەمەند بوونی خۆت بەكار نەهێناوە؟
عادل هەورامی : هەرگیز شتی وام نەكردوە و ناشی كەم و بیریشم لێ نەكردوەتەوە ، چونكە كە دەستم كرد بە هونەر كەسانێكی كەم هەبوون لەم شارەدا گۆرانیان دەوت بەپەنجەی دەست دەژمێردران هەمیشە كراسێكم لەوان دادەبڕی بەوەی ئەوان هیچیان نەبووە بەهیچ منیش هیچم نابێت بە هیچ ، من خزمەتی هونەرم كردوە هونەرەكەم خزمەتی منی نەكردوە ، تەنها ئەوەنەبێت لەناو خەڵكدا ناساندومی منیش ڕێزم هەیە بۆ هەموو ئەو بەڕێزانە

خێزان: دەردەكەوێت بەدەرلەكاری هونەری كاری دیكەش دەكەیت؟
عادل هەورامی : زۆركارم كردوە لەوكاتەوەی پێگەیشتووم ، كاری فەرش فرۆشیم كردوە و دەشیكەم ئێستەش ئەوەشم لە باوكمەوە بۆم ماوەتەوە حەزم بە دانیشتن و بێكاربوون نییە 

خێزان: چەند ئەلبومی گۆرانیت بەرهەم هێناوە؟
عادل هەورامی : تا ئێستە حەوت ئەلبومم هەیە ، وە تێچووی سەرجەم ئەلبومەكانیش لەسەرشانی خۆم بووە هیچ كەس و لایەنێك هاوكاری نەكردووم 




خێزان: تێكست و داڕشتنەوەی گۆرانییەكان كێ هاوكاریت دەكات؟
عادل هەورامی : من پشت بەكەس نابەستم بۆ هونەر و گۆرانییەكانم بەڵكو هەمیشە تۆنی دەنگ و سەركەوتووی خۆم گرنگە ، بۆنمونە ئەگەر هۆنراوەكانی مەولەوی بە دەنگی من بخوات ئەوا هۆنراوەكانی ئەو دەكەمەوە بە گۆرانی ، ئەوانی كاك. محەمەد پاكژ، ئەحمد محەمەد ، ئەوانە كارم تێداكردوون 

خێزان: هەستی هاوڵاتیان بەرامبەر بەتۆ چییە؟
عادل هەورامی : من هاوڵاتیان خەجاڵەتیان كردووم ، هاوڵاتیان زۆرلەوەگەورەترن كە من بۆیان دەكەم ، شایەنی زۆر لەوە باشترن كە من بۆیان دەكەم ، زۆر سوپاسی هەموولایەنێك و كەسێك دەكەم 

خێزان: دەوترێت قورسای عادل هەورامی تەنها لە سلێمانی و باشوری كوردستاندا نییە؟
عادل هەورامی : پێش هەموو شتێك من سوپاسی خوای گەورە دەكەم چونكە هەمووی فەزلی ئەوە بەسەرمەوە ، وە ڕێزو خۆشەویستیم هەیە بۆیان ، هەموو ئەوشتانەش دەگەڕێتەوە بۆ سەركەوتوو كەسەكە لە خزمەتكردن بە هونەرەكەیدا ، من ناڵێم لە هەموو كارەكانم ڕازیم لەو(٥٨)كارەم ، ئەگەر لە بەرهەمێكم ڕازی نەبووبم ئەوە هەر كەسی خۆی و بینەری خۆی هەبوو بۆیە كاری باش خۆی خۆی دەسەپێنێت بۆ دەركەوتنی تۆ.

خێزان: لەگەڵ كام تیپی هونەری كارتكردوە؟
عادل هەورامی : لەگەڵ هیچ تیپێكدا كارم نەكردوە ، بۆنمونە ئەگەر كاری ستۆدیۆم كردبێت ئەوە كارەكەم داوە بەدابەشكردن بۆ لاوك لەتیف یان  هێمن حسێن یان ئارام سەردار لێی ڕازی بووم چۆن دابەشكردنی گۆرانییەكەم بۆ بكات ، ئەم كارەی كۆتایم كاك.بڵند قەرەداغی بۆی ئەنجام داوم ، بڵند جیالەوەی بیست ساڵە هاوڕێمە ئەمە یەكەمجارە كاری دابەشكردنی هونەریم بۆدەكات ، ئێستە وەك جاران نەماوە شێوازی زۆر گونجاو خێرا هاتوەتە پێشەوە بەشێوەیەكی گونجا و باش.

خێزان: زۆرێك لە هونەرمەندان داهاتی كۆنسێرتەكەیان بۆ كاری خێرخوازی بەكار دەهێنن عادل هەورامی لەم ڕووەوە چیكردوە؟
عادل هەورامی : من تەنها ئەوەندە دەڵێم ئەگەر دەستی ڕاست كارێكی كرد با دەستی چەپ نەیزانێت ، لەگەڵ ئەمەشدا ئەو هونەرمەندانەی كەوادەڵێن دەبێت كەسێك یان لایەنێك یان كۆمپانییایەك تێچووی ئەو كۆنسێرتەی گرتبێتە ئەستۆئەوكاتە دەتوانێت داهاتەكەی بكات كاری خێرخوازی.

خێزان: زۆرێك لە هونەرمەندا كچان بۆ ڕاكێشانی بینەر بۆخۆیان بەكاردەهێنن؟
عادل هەورامی : ئەوە راستە ، دەنگێك دەنگ بێت ڕویەك روبێت نابێت كچ بۆئەومەبەستە بەكار بهێنێت ، گۆرانی بێژمان هەیە بۆنی خاك لە گەرویدایە ، گۆرانی بێژمان هەیە تۆنی دەنگ لە گەرویدا نییە بەكارهێنانی كچانیش بۆ كۆكردنەوەی هەوادارەبۆخۆی ، بیرلەوەبكەرەوە لەوەو پێش حەسەن زیرەك و عەلی مەردان هەبوون كامیان كلیپێكی هەبوو ، عەباسی كەمەندی ڕەحمەتی بەهیچ شێوەیەك لە كلیپێكدا دەرنەكەوتووە ، من پێم وایە غەرب ئەمەی دروستكردوە من ناوی دەنێم گۆرانی كوردی غەربی ، وەزێك لە هونەرمەندان ستایلی گۆرانییەكە ئەوەدەخوازێت كچیان لەگەڵ بێت لەوەدا ئاساییە با لەگەڵیدا بێت، هەیە كلیپ دەكات كچ دەهێنێت گوێگر بۆخۆی كۆدەكاتەوە بەڵام تەنها ئەو كاتەیە بەڵام دوای چی باس دەكرێت  هەر ئەوەشی هەیە ، هونەرمەند هەبووە بەبێ كچ گۆرانی وتووە بەڵام ئێستە لە توركیا بە كچەوە گۆرانی دەڵێت سەریشی لە هونەرتێك داوە باوەڕ بكە هەندێك كەناڵ هەیە كە ئەوگۆرانییانەش لێ دەدەنەوە كۆمەڵگەیان سەقەتكردوە.

خێزان: خێزان و منداڵەكەت تاچەند هاوپشتیت دەكەن؟
عادل هەورامی : هاوكارم بووە هەمیشە ، هەمیشە ئاوازی گۆرانییەكانم پێش تۆماركردن بۆئەو تاقی دەكەمەوە چونكە ئەو سۆرانییە ئەگەر توانیم دڵی ئەو بەدەست بهێنم دواتر تۆماری دەكەم بەشێوەزاری هەورامی ، پێشتر مامۆستامان هەبووە گۆرانی وتووە بە هەورامی بەڵام سۆرانییەكە تێ نەگەیشتوە بۆ چونكە تا پردەكەی زەڵم هاتووە ، بەڵام من ڕێچكەیەكی تازە و مۆسیقایەكی تازەم هێنایە ناو دنیای هونەرەوە 

خێزان: هونەری كوردی چۆن دەبینیت؟
عادل هەورامی : لایەنی باشەی هەیە و لایەنی خراپەشی هەیە ، ناكرێت بەیەكجار خراپی بكەین تكا دەكەم ئەوەی تۆنی هەورامی نییە با بەهەورامی گۆرانی نەڵێت چونكە كەسانی دیكە هەیە دەیڵێنەوە، ئاخر توخوا گۆرانی هەورامی بە هامەرەوە وتراوە ، یان كەسانی دیكە هەیە دەچن گۆرانی هونەرمەند عەلی مەردان یان هەركەسێكی دیكە دەڵێنەوە وای لێ دەكەن هونەرمەندە ڕەسەنەكەی پێشوشت لەبەرچاو دەبێزرێت ، مۆدێلی كوردی ئەگەر بەم شێوەیە بڕوات بەرەو ڕوخاندن دەڕوات چونكە هەمووی ڕادەكات بەرەو غەرب و بەرەو ئەوروپا وادەزانن ئەگەر نەچنە توركیاو گۆرانی نەڵێن كەس سەیریان ناكات بە پێچەوانەوە ئەو هونەرمەندانە وەك بڵقی سەرئاو وان زوتیا دەچن و نامێنێت بۆیە دەبێت ئێمە كاری ڕەسەنایەتی بكەین نابێت كاریگەری وڵاتانی دیكەمان لەسەر بێت.

خێزان: حكومەتی هەرێم تاچەند بەرپرسە لەم كارە؟
عادل هەورامی : هەموولایەنەكان بەرپرسن لە دواكەوتنی هونەر ، لە كەناڵە بینراوەكانەوە لە میدیاكانەوە ، بۆنمونە ئەگەر كەسێك بناسیت لە میدكاندا ئەگەر كەسێك ناسراو بێت ئەوە زوزو دەكەویتە سەرشاشەو دەردەكەویت و هەمیشە لەسەرشاشەیت

خێزان: وەزارەتی ڕۆشنبیری مۆڵەتی بەو كەناڵانە داوە كاربكەن بەڵام لێپێچینەوە و چاودێریان ناكات؟
عادل هەورامی : من رەخنە لەهەموویان دەگرم بە حكومەت و وەزارەتی ڕۆشنبیری و میدیاكانیشەوە ،دەبێت بەلیژنە بكرێت ئەوكارە ڕێگە بگرێت لە دزینی بەرهەم و كاری هونەرمەندانی دیكە ، باجی وادروستكراوە بۆ هاوكاری و یارمەتی دانیان بەناوی هونەرمەندەوە ئەسڵەن هەركەس نایناسێت نەك بزانرێت لەكوێوە هاتووە 

خێزان: زۆركات بەرهەمی هونەمەندە كۆنەكان لەلایەن هونەرمەندە تازەكانەوە دەوترێتەوە ئەمە تاچەند سەركەوتوو دەبێت؟
عادل هەورامی : هەركارێك ئەگەر بەجوانی بكرێت و نوێبونەوە بەخۆیەوە ببینێت سەركەوتوو دەبێت بەڵام زۆرێك لەوانەی تا ئێستە بینیومانن هەمیشە بەرەو خراپی چوون هیچ سودێكیان نەبووە ، بۆیە دەبێت ئەوانە هەوڵی هونەرمەندی بدەن نەوەك دووبارەكەرەوەی هونەرمەندانی دیكە.





ئه‌م بابه‌ته 2533 جار خوێنراوه‌ته‌وه‌‌

PM:03:51:15/06/2015