شارەكەمان بێ راهێنەرە
    
شارەكەمان بێ راهێنەرە
ساجد کەمال


سەرەتا دەستخۆشی بۆ سەرجەم ئەو راهێنەرانەی كە ئێتستا لەگەڵ یانەكانیاندا دەستبەكارن و هەمیشە جێگە دەستیان بەوەرزشی شارەكەمانەوە دیار بووە، بەڵام زۆر جار بیر دەكەینەوە كە هیچ نوسینێك لەسەر وەرزشی كوردستانەكەمان نەنوسین ، هیچ كاتێك دەست نەخەینە سەر برینەكانی وەرزش، چونكە لێرەو لەوێ لەسەر هەر تەوەرەیەك، یاخود كایه‌یەك بنوسین بێگومان دەستەیەك لێت زویر دەبن و لەكاتی بینینیاندا نەك هەر سڵاوت لێ ناكەن، بەڵكو رووی خۆیان بەلاكەی تردا وەردەچەرخێنن.

هەرچەندە ئەمانە ئێمەو سەدان دڵسۆزی وەك ئێمە لەكارەكانمان ڕاناگرێت، تا ئەوکاته‌ی بەهەمووان ده‌رمانی سارێژی برینەكانی وەرزشی شارەكەمان بەتایبەتی و كوردستانەكەمان بەگشتی دەدۆزینەوە.

وێڕای دەستخۆشی بۆ یەكێتی تۆپی پێی كوردستان، كە لەم قەیران و هەلومەرجە ناهەموارەدا بێ گوێدانە بەربەرست و رێگرییەكان بریاری بەردەوامی لەسه‌ر چالاكییەكانی خۆی داوەو تارادەیەك تروسیكاییەكی لەرۆحی وەرزشی كوردستاندا هێشتووەتەوە.

لەبابەتی ئەمجارەدا دەست دەخینە سەر یەكێك لەو برینانەی كە لەئێستادا شارەكەمان پێوەی دەناڵێنێت، ئەویش برینی نەبوونی ڕاهێنەرە یاخود كەمی راهێنەر، لێرەدا دوو پرسیار دەكەین و وەڵامەكەی بەجێدەهێڵین بۆ ئێوەی خوێنەر...
یەكەمیان، دەپرسین بۆچی راهێنەری ئەكادیمی و زانستی كەمە؟ زۆر جار لە جیهانی دەرەوەدا دەبیین ئەو كەسانەی پۆستی راهینەرایەتی وەردەگرن، له‌هەردوو بوارەكە(ئەزموون و ئەكادیمی) ئاوێتەی یەكدی دەكەن و دواتر دەبنە راهێنەرێكی سەركەوتوو.


دووەمیان، دەپرسم بۆچی گۆڕانكاری لەپۆستی راهێنەراندا ناكرێت؟ ئەگەر بكرێت تەنها ئەو چەند راهێنەرە كەهەن پۆستەكانیان لەنێوان خۆیاندا دەگۆڕنەوە، فڵان ڕوودەكاتە فڵان یانەو هەمان ڕاهێنەری ئەو یانەیە ڕوودەكاتە هەمان ئەو یانەیەی كە هاورێكەی یاخود دۆستەكەی كە لێوەی هاتووە، واتە تەنها پۆستەكانیان لەنێوان خۆیاندا لەسەر بنەمای برادەرایەتی و پەیوەندی دۆستایەتی دەگۆڕنەوە و زۆرجار ڕەچاوی هیچ شتێكی دیكە ناكرێت، تەنها مەرج كە بمێنێتەوە ئەویش ئەوەیە كە سەرۆكی یانەكان خۆشی لەدەموچاوی ئەو راهێنەر بێت، ئەگەر نا سۆپەرمانیش بێت نابێت.

لەوەش سەیرتر بەبیرمە جارێكیان یانەیەكی شارەكەمان دووجار بۆندی لەیەك وەرزدا لەگەڵ تەنها راهێنەرێكدا واژۆ كرد! جاری یەكەم لەسەر ئەنجامە خراپەكانی دووریان خستەوە، دووەمجار لەسەر بنەمای لێهاتوویی و شارەزای دووبارە بانگهێشتیان كردەوە! ئەمەش بانێكەو دوو هەوا...

رەنگە هۆكاری كەمی راهێنەر، كەمی یانەكان بێت كە بەپەنجەكانی دەست دەژمێردرێن، باشە ئەگەر زیاد نەبوونی یانەكان بەپێی بریارێكی وەزارەتی وەرزش و لاوان بێت، خۆ زیاد نەبوونی راهێنەران هەمان بڕیار نایگرێتەوە ئیدی بۆ؟

له‌کۆتاییدا ده‌ڵێم: برینەكە ڕێك لێرەدایە، كۆمەڵێك راهێنەر هەن كە ساڵانە دەستاو دەست دەكەن بەپۆستەكانیان و رێگە بەهیچ كەسێكی دی نادرێت بێتە پێشەوەو دۆستایەتی و هاورێیەتی ڕەگوڕیشەی بەوەرزشی شارەكەماندا داكوتیوە، قبوڵ نەكراوە كەسێكی دی ئەزموونی خۆی تاقی بكاتەوە، یاخود بەداخەوە كەسە ئەكادیمیەكان و شارەزاو بەتواناكان خۆیان كەمتەرخەمن و نایانەوێت بێنە پێشەوەو ببنە دەوای برینەكان.


ئه‌م بابه‌ته 525 جار خوێنراوه‌ته‌وه‌‌
PM:09:18:07/02/2016
Copyright 2015. xelk.org. All Rights Reserved.
Created by:kurdsky.com