(١٠) ئه‌فسانه‌ی تۆپی پێ ... نه‌یانتوانی نازناوی "چامپیۆنز لیگ" به‌ده‌ست بهێنن !

(١٠) ئه‌فسانه‌ی تۆپی پێ ... نه‌یانتوانی نازناوی "چامپیۆنز لیگ" به‌ده‌ست بهێنن !


خه‌ڵک

زۆرن ئه‌و یاریزانانه‌ی نازناوی چامپیۆنز لیگیان له‌گه‌ڵ یانه‌کانیان به‌ده‌ست هێناوه‌، ته‌نانه‌ت هه‌ندێک له‌یاریزانه‌ ناوداره‌کان توانیویانه‌ به‌ درێسی دوو تا سێ یانه‌وه‌ جامه‌ گویچکه‌داره‌که‌ به‌رز بکه‌نه‌وه‌.

له‌هه‌مان کاتدا ئه‌فسانه‌ی وه‌ها ناودار و گه‌وره‌ هه‌بووه‌ که‌ نه‌یتوانیوه‌ ئه‌و خه‌ونه‌ بهێنێته‌ دی، ڕه‌نگه‌ به‌ سه‌یرو سه‌مه‌ره‌، یاخود باوه‌ڕپێنه‌کراو له‌بواره‌که‌دا باسی لێوه‌ بکرێت، به‌وپێیه‌ی ئه‌فسانه‌کان هه‌میشه‌ ڕۆڵی سه‌ره‌کییان بینیوه‌ له‌ چنینه‌وه‌ی نازناوه‌کان و کاتێک له‌ترۆپکی تواناکانیاندا بوون هیچ کۆسپێک نه‌یتوانیوه‌ له‌ مه‌عشوقه‌که‌یان بکات (جامی چامپیۆنز لیگ).

به‌هه‌رحاڵ، له‌ خه‌ڵک سپۆرته‌وه‌ ناوی ئه‌و (١٠) ئه‌فسانه‌یه‌تان بۆ ئاشکرا ده‌که‌ین که‌ به‌درێژایی مێژوویان نه‌یانتوانی نازناوی خولی یانه‌ پاڵه‌وانه‌کانی ئه‌وروپا به‌ده‌ست بهێنن:

١. دیێگۆ ئارماندۆ مارادۆنا: زۆرینه‌ی هه‌وادارانی تۆپی پێ به‌ ئه‌فسانه‌ی یه‌که‌می جیهانی تۆپی پیی له‌قه‌ڵه‌م ده‌ده‌ن، توانیویه‌تی نازناوی مۆندیال به‌ده‌ست بهێنێت و به‌هه‌مان شێوه‌ مۆندیالی خوار ته‌مه‌ن ٢٠ ساڵان، که‌چی به‌دریسی ناپۆلییه‌وه‌ ته‌نها شه‌ش یاریی له‌ خولی یانه‌ پاڵه‌وانه‌کان ئه‌نجامداوه‌ و نازناوه‌که‌شی به‌ده‌ست نه‌هێنا!


٢. ئیریک کانتۆنا: ئه‌فسانه‌ سه‌رشێته‌که‌ی فه‌ره‌نسا به‌درێسی یانه‌ی مانچسته‌ر یونایتده‌وه‌ نازناوی پریمه‌رلیگ و جامی یه‌کێتی یانه‌ ئینگلزییه‌کانی به‌ده‌ست هێناوه‌، ته‌نها له‌ ١٦ یاریی چامپیۆنز لیگدا به‌شداری کردووه‌و له‌کۆتاییشدا نه‌یتوانی نازناوه‌که‌ به‌ده‌ست بهێنێت.


٣. گاریال باتیستۆنا: ئه‌ستێره‌ی ئه‌ستێره‌کانی ئه‌رجه‌نتین و ناسراو به‌ "باتی گۆڵ" به‌درێسی فیورنتینا و ڕۆماوه‌ له‌ ١٧ یاریی خولی یانه‌ پاڵه‌وانه‌کان به‌شداری کردووه، له‌گه‌ڵ ئه‌وه‌یشدا هه‌گبه‌که‌ی هیچ نازناوێکی چامپیۆنزی تێدا نییه‌!


٤. لۆته‌ر ماتیۆس: مه‌کینه‌که‌ی ئه‌ڵمانیا نازناوی مۆندیالی ١٩٩٠ی به‌ده‌ست هێنا، هه‌روه‌ها به‌درێسی بایرن میونشن و مونشنگلادباخ و ئینته‌رمیلانه‌وه‌ ٣٠ یاریی له‌ خولی یانه‌ پاڵه‌وانه‌کان کردووه‌و سه‌ره‌ڕای ئه‌وه‌ی خه‌ڵاتی باشترین یاریزانی ساڵی ١٩٩٠ی به‌ده‌ست هێنا، به‌ڵام هه‌رگیز نه‌یتوانی تامی نازناوی خولی یانه‌ پاڵه‌وانه‌کان بکات!


٥. ڕۆماریۆ دو سۆزا: هێرشبه‌ره‌ تۆقێنه‌ره‌که‌ی هه‌ڵبژارده‌ی به‌رازیل، نازناوی مۆندیال و دووجار کۆپا ئه‌مریکای به‌ده‌ست هێناوه‌، له‌کۆی سه‌رجه‌م ئه‌و پاڵه‌وانێتییه‌ ڕه‌سمیانه‌ی به‌شداری تێدا کردووه‌ ٢٧ جار نازناوی گۆڵکاری به‌ده‌ست هێناوه‌و پێش پێلێی ئه‌فسانه‌ی داوه‌ته‌وه‌ (پیلێ ٢٤ نازناوی هه‌بووه‌)، له‌مێژویدا ٣٢ یاریی له‌ خولی یانه‌ پاڵه‌وانه‌کان ئه‌نجامداوه‌ و نازناوه‌که‌شی له‌ده‌ست چووه‌!


٦. ڕۆناڵدۆ نازاریۆ دالیما: دیارده‌، یاخود فینۆمینۆ، به‌بۆچونی شاره‌زایان هێرشبه‌رێکی وه‌ها هه‌رگیز دروست نابێته‌وه‌، دووبار نازناوی مۆندیالی به‌ده‌ست هێناوه‌ (١٩٩٤ - ٢٠٠٢)، دووه‌م باشترین گۆڵکاری مێژویی مۆندیاله‌ به‌ ١٥ گۆڵه‌وه‌ له‌کۆی ١٩ یاریی، یاریی بۆ دوو جه‌مسه‌ره‌ زه‌به‌لاحه‌که‌ی ئیسپانیا (ڕیاڵ و به‌رشه‌)، هه‌روه‌ها دوو جه‌مسه‌ره‌که‌ی میلانۆ (میلان و ئینته‌ر) کردووه‌و له‌کۆی ٣٤ یاریی له‌ خولی یانه‌ پاڵه‌وانه‌کان، به‌ڵام نه‌یتوانیوه‌ جامه‌ گویچکه‌داره‌که‌ به‌رز بکاته‌وه‌.


٧. میرۆسلاڤ کلۆزه‌: نازناوی مۆندیالی ٢٠١٤ی به‌ده‌ست هێناوه‌، گۆڵکاری مێژویی مۆندیاله‌ و به‌درێسی یانه‌کانی هامبۆرگ، کایزه‌رسلاوتن، ڤێرده‌ربریمه‌ن، بایرن میونشن له‌ خولی ئه‌ڵمانیا یاریی کردووه‌و حاڵی حازر له‌ یانه‌ی لازیۆ به‌رده‌وامی به‌ ژیانی وه‌رزشیی ده‌دات، تا ئێستا ٣٩ ڕووبه‌ڕوبونه‌وه‌ی له‌ چامپیۆنز لیگ ئه‌نجامداوه‌ و له‌هیچکام له‌یانه‌کان نه‌یتوانیوه‌ نازناوی چامپیۆنز مسۆگه‌ر بکات.


٨. فرانچیسکۆ تۆتی: قه‌یسه‌ری شاری ڕۆمایه‌، تائێستا زیاتر ٧٤٠ یاریی و ٣٠٣ گۆڵی بۆ جێلاڕۆسی تۆمار کردووه‌، نازناوی مۆندیالی ٢٠٠٦ی به‌درێسی هه‌ڵبژارده‌ی سکوادرا ئازۆرای ئیتاڵی به‌ده‌ست هێناوه‌، له‌ ٥٥ یاریی خولی یانه‌ پاڵه‌وانه‌کان به‌ تاکه‌ درێسی گورگه‌کانی پایته‌خته‌وه‌ له‌ چامپیۆنز یاریی کردووه‌، له‌ ساڵی ١٩٩٣وه‌ تائێستا خه‌ریکه‌، واتا له‌کۆی ٢٣ ساڵ نه‌یتوانیوه‌ جامی خولی یانه‌ پاڵه‌وانه‌کانی ئه‌وروپا به‌رز بکاته‌وه‌!


٩. ڕود ڤان نیسته‌لڕۆی: مه‌کینه‌ی گۆڵکردن بووه‌ له‌سه‌رده‌می خۆیدا، به‌درێسی هه‌ڵبژارده‌ی هۆڵه‌نداوه‌ یاریی کردووه‌، له‌گه‌ڵ مان یونایتد نازناوه‌ ناوخۆییه‌کانی به‌ده‌ست هێناوه‌ و له‌گه‌ڵ ڕیاڵ مه‌درید به‌هه‌مان شێوه‌، له‌مێژویدا ٣٤٧ گۆڵی تۆمار کردووه‌و له‌ ٧٣ یاریی چامپیۆنز لیگ به‌درێسی یونایتد و ڕیاڵه‌وه‌ نه‌یتوانیوه‌ نازناوی چامپیۆنز به‌ده‌ست بهێنێت!


١٠. زلاتان ئیبراهیمۆڤیچ: زه‌به‌لاحه‌که‌ی سوید له‌ یانه‌ی مالمۆوه‌ ده‌ستی پێکرد، به‌ره‌و ئه‌یاکس، پاشان یوڤانتۆس و پاشان ئینته‌رمیلان، دواتر بۆ به‌رشلۆنه‌ و ئه‌ی سی میلان و له‌کۆتاییدا بۆ پاریس سان جێرمان، "ئێبرا کادابرا" سه‌ره‌ڕای ناوه‌ سیحراییه‌که‌ی تائێستا ١٠٩ یاریی له‌ چامپیۆنز لیگ ئه‌نجامداوه‌ و نازناوه‌که‌شی به‌ده‌ست نه‌هێناوه‌! ئه‌وه‌ی ئه‌م سوڵتانه‌ له‌ئه‌فسانه‌کانی تر جیاده‌کاته‌وه‌ ئه‌وه‌یه‌ که‌ هیشتا هه‌لی له‌به‌رده‌مدا ماوه‌و ده‌توانێت خه‌ونه‌که‌ی بهینێته‌ دی.

ئه‌م بابه‌ته 4115 جار خوێنراوه‌ته‌وه‌‌

PM:10:14:13/02/2016



Copyright 2015. xelk.org. All Rights Reserved.
Created by:kurdsky.com