من زلاتانم (به‌شی ١٤): له‌ستۆکهۆڵم وه‌ک "گلادیاتۆر" ڕووبه‌ڕوی ٣٠ هه‌زار که‌س بومه‌وه‌

من زلاتانم (به‌شی ١٤): له‌ستۆکهۆڵم وه‌ک "گلادیاتۆر" ڕووبه‌ڕوی ٣٠ هه‌زار که‌س بومه‌وه‌


وه‌رگێڕانی/ کاروان که‌ریم مه‌حمود

له‌ به‌شی پێشوو باسمان له‌ هاتنه‌دی خه‌ونی زلاتان کرد که‌ په‌یوه‌ندی کردنی بوو به‌ یه‌کێک له‌ یانه‌ گه‌وره‌کان له‌ ده‌ره‌وه‌ی سوید و جێهێشتنی ژیانی هه‌ژاری و نه‌داری و سه‌ره‌تای ده‌ستپێکردنی ژیانێکی نوێ.

له‌م به‌شه‌شدا باس له‌ ماوه‌کانی کۆتایی ده‌که‌ین که‌ له‌گه‌ڵ یانه‌ی مالمۆ ماویه‌تی و زلاتان ده‌ڵێت: هاس بۆرگ له‌گه‌ڵ یانه‌ی ئه‌یاکس رێکه‌وتنی کردبوو که‌ من تا شه‌ش مانگی تر له‌گه‌ڵ مالمۆ به‌رده‌وام بم له‌ یاری کردن، پاشانیش بگه‌ڕێمه‌وه‌ یانه‌ی ئه‌یاکس بۆ ڕاهێنان. ئه‌و ڕۆژه‌م به‌بیردێت که‌ زۆر سارد بوو زۆر دڵم خۆش بوو به‌ کۆبونه‌وه‌م له‌گه‌ڵ هاوڕێکانم بۆ جارێکی تر، له‌و کاته‌دا هه‌ر هه‌مویان له‌ ژوری خۆگۆرین دانشتبوون له‌ نێویشیان کۆمه‌ڵێک ڕۆژنامه‌نوس هه‌بوون که‌ به‌دوای ئه‌و ژیانه‌ وێڵ بوون که‌ من تێیدا ده‌ژیام، منیش چومه‌ ژوره‌وه‌ و پێکه‌نیم و هاوارم کرد، ئه‌و گۆڵه‌م به‌بیر هێنانه‌وه‌ که‌ به‌شێوه‌یه‌کی زۆر جوان تۆمارم کردبوو و هاوارم کرد یاااااااا، هه‌موو هاوڕێکانم سه‌ریان به‌رزکرده‌وه‌ و سه‌یری منیان کرد له‌و کاته‌دا هه‌ستم به‌ غه‌مباری کرد بۆ ئه‌وان، هه‌مویان دڵ ته‌نگ بوون و ڕوخساری هه‌مویان غه‌مگین دیار بوو، هه‌ستم کرد ئیره‌ییم پێده‌به‌ن له‌ هه‌مویان خراپتر ماتسیۆن بوو ..

ماتسیۆن له‌ جونلیز په‌یوه‌ندی کردبو پێمانه‌وه‌و که‌سێکی شه‌ڕانگێز بوو، به‌ڵام زۆر خۆشه‌ویست بوو، ناوبراو سه‌رکرده‌ی تیپه‌که‌ بوو هه‌رده‌م هه‌وڵی ده‌دا باش بێت، ئه‌گه‌ر هیچ نه‌بێت ده‌بوایه‌ هاوڕێکانم بڵێن : تۆ شایه‌نی پیرۆزباییت، ئه‌وه‌ ده‌ستکه‌وتێکی گه‌وره‌یه‌ له‌داهاتودا سه‌رکه‌وتو ده‌بیت، به‌ڵام هیچ یه‌کێک له‌ یاریزانه‌کان ئه‌وه‌یان پێنه‌وتم، هه‌ر هیچ نه‌بێت کامێرامانه‌که!‌ به‌ڵام ئه‌ویش به‌چاوێکی غه‌مباره‌وه‌ له‌ منی ده‌ڕوانی و منیش له‌سه‌ر کورسیه‌ک دانیشتم و لێوم به‌ زه‌رده‌خه‌نه‌ بوو، زۆر دڵخۆش بووم وه‌ک شێت وابووم له‌و ڕۆژانه‌دا هه‌رده‌م هه‌ڵده‌ستام به‌ نمایشكردنی جوڵانه‌وه‌ی جوان وه‌ هه‌ندێک کاری شێتانه‌شم ئه‌نجام ده‌دا، بۆ نمونه‌ ئه‌و ماوه‌یه‌ قژم به‌ ره‌نگی ئاڵتونی بۆیه‌کرد.



هاوسه‌رگیرییه‌که‌ی فاشیل، هاوسه‌ره‌که‌م له‌خۆی گۆڕا!

 

له‌و کاته‌دا بڕیاری هاوسه‌رگیریم دا له‌گه‌ڵ بیما که‌ کچێکی زۆر باش و جوان بوو، ئه‌و هونه‌ری دروستکردنی ماڵپه‌ری ده‌خوێند و کچێکی زۆر نه‌رمو نیان بوو، هاوینێک له‌ قوبرس یه‌کتریمان ناسی و هه‌ستم به‌خۆشی ده‌کرد له‌گه‌ڵ ئه‌ودا، به‌ڵام ئه‌م ماره‌بڕینه‌ کۆمه‌ڵێک ڕوداوی لێکه‌وته‌وه‌ له‌به‌رئه‌وهی‌ من له‌ڕۆژنامه‌کان دوورنه‌بوم و که‌سێکی داخراو نه‌بوم وه‌ک یاریزانه‌کانی تر، له‌و ڕۆژه‌دا ڕۆژنامه‌نوسێک به‌ناوی ڕۆنی سمیس که‌ له‌ ڕۆژنامه‌ی "کڤال سپۆستین" کاری ده‌کرد، ده‌رباره‌ی ئه‌و دیاریه‌ی که‌ من پێشکه‌شی بیمام کردووه‌‌ لێی پرسی و پێی وت: دیاری ماره‌برینه‌که‌تان چیه‌؟

ئه‌ویش وه‌ڵامی دایه‌وه‌: دیاری؟! من زلاتانم به‌ده‌ست هێنا...

ئه‌وه‌ ته‌نها هه‌ست ده‌ربڕینێکی ئه‌و بوو سه‌باره‌ت به‌ من، دواتریش بیما زۆر گۆڕا و مغرور بوو به‌تایبه‌تی دوای بڵاوبونه‌وه‌ی وێنه‌کانمان له‌ ده‌زگای ڕاگه‌یاندنه‌کان، ئه‌مه‌ ته‌نها شتێکی ئاسایی بوو، به‌ڵام بیما زۆر له‌ خۆبایی بوو ئه‌مه‌ش بوه‌ هۆی ئه‌وه‌ی که‌ من ئه‌م ده‌ستگیرانداریه‌ هه‌ڵبوه‌شێنمه‌وه،‌ که‌ ئه‌مه‌ش کارێکی چاوه‌ڕوان نه‌کراو بوو بۆ هه‌موان.



سه‌لماندم که‌ شایسته‌ی ٨٥ ملیۆنم

 

ئێبرا واز له‌روداوه‌کانی ماره‌بڕین ده‌هێنێت و ده‌گه‌رێته‌وه‌ بۆ تۆپی پێ و ده‌ڵێت: هه‌موو شتێک له‌ چوارده‌ورم به‌ خێرایی ده‌رۆشت، خولی سویدی ده‌ستی پێ کرد و چاوه‌کان هه‌موو له‌ سه‌ر من بوو، ڕۆژنامه‌کان باسیان له‌وه‌ ده‌کرد که‌ ئه‌و یاریزانه‌ی بۆنده‌که‌ی بریتیه‌ له‌ 85 ملیۆن کرۆن ئاخۆ چ شتێک پێشکه‌ش به‌یانه‌که‌ی ده‌کات؟ یاریزانان کیم کاڵسترۆم و ئه‌ندرێس سڤینسۆن سه‌رکه‌وتوبون و له‌ یاریی یه‌که‌مان له‌خولی سویدی گۆڵیان تۆمارکرد، پاش ئه‌م یارییه‌ش هه‌موو باسی منیان ده‌کرد و له‌ مانشێتی ڕۆژنامه‌کاندا نوسرابوو ئاخۆ ئێبرا شایسته‌ی ئه‌م بۆنده‌یه،‌ یاخود ته‌نها یاریزانێکی لاوی تازه‌ پێگه‌شتووه‌ و ئه‌و یاریزانه‌ نییه‌ که‌ باسی لێوه‌ ده‌کرێت؟ ئه‌مه‌ بێگومان پێش چه‌ند ساڵێک بوو من ئه‌و ڕۆژه‌م باش له‌بیره‌ که‌ 7 - 4 - 2001 بوو له‌و کاته‌دا یاریگای مالمۆ ده‌گه‌شایه‌وه‌ له‌هانده‌ران، منیش هاتمه‌ یاریگا به‌ئۆتۆمۆبێله‌که‌ی خۆم مارسیدس کابورلیه‌ی شین که‌ هه‌رده‌م شانازیم پێ ده‌کرد، پێشتر ڕه‌تم کردبۆوه‌ وێنه‌یه‌ک له‌گه‌ڵ ئۆتۆمۆبێله‌که‌م بگرم له‌ کاتی چاوپێکه‌وتنه‌که‌م له‌گه‌ڵ رونی سمیس ...

له‌ راستیدا ده‌توانم بلێم،‌ به‌هۆی ئه‌وه‌ی ڕۆژنامه‌کان زۆر باسی منیان ده‌کرد و به‌رده‌وام بوون له‌ پیاهه‌ڵدانم وام لێهاتبوو تۆزیک له‌ خۆبایی ببم که‌ ئه‌مه‌ش کارێکی سروشتیه‌ و له‌ کاروانی وه‌رزشی گشت یاریزانێک رووده‌دات، من له‌و کاته‌دا ته‌نها 19 ساڵ بووم له‌گه‌ڵ ئێستا ئاستم ته‌واو جیاواز بوو، به‌ڵام له‌گه‌ڵ ئه‌وه‌شدا هه‌میشه‌ ده‌مویست جه‌نگ له‌گه‌ڵ ئه‌و که‌سانه‌ هه‌لبگیرسێنم که‌ ڕکابه‌ریم ده‌که‌ن و به‌سوک سه‌یری تواناکانم ده‌که‌ن.

ئێبرا ده‌رباره‌ی یارییه‌که‌ ده‌ڵێت: بارودۆخی یارییه‌که‌ ته‌واو باش و له‌بار بوو، به‌ڵام سه‌ره‌ڕای ئه‌مانه‌ من هه‌ستم به‌ شله‌ژان ده‌کرد... یارییه‌که‌مان دژی یانه‌ی ئه‌یک بوو، به‌ڵام یاری ده‌ستپێک و یاری یه‌که‌م هه‌رگیز ئاسان نابێت دواین جار که‌ له‌گه‌ڵ ئه‌م یانه‌یه‌ یاریمان کرد ئه‌وان توانیان له‌ ئێمه‌ ببه‌نه‌وه‌ و هه‌مان یانه‌ش هۆکاری دابه‌زینمان بوو بۆ خولی پله‌ دوو، وه‌ ئه‌وانیش پالێوراو بوون بۆ به‌ده‌ست هێنانی نازناوه‌که‌ به‌ڵام ئێمه‌ !! ئێمه‌ کێین ؟ ته‌نها تیپێکی ئاسایین و له‌ پله‌ دوو یاری ده‌که‌ین ته‌نانه‌ت له‌ریزی پاڵێوراوه‌کانیش نه‌بووین، سه‌ره‌رای ئه‌مانه‌ش پاڵه‌په‌ستۆیه‌کی زۆرمان له‌سه‌ر بوو به‌تایبه‌تی له‌سه‌ر من.

یاریگا زۆر قه‌ره‌‌باڵغ بوو که‌ زیاتر له‌ 20 هه‌زار هانده‌ر ئاماده‌ی ڕووبه‌ڕوبونه‌وه‌که‌‌ بوون له‌ هه‌موو لایه‌که‌وه‌ ده‌نگی هانده‌ران ده‌هات هه‌رچه‌نده‌ من له‌ هانده‌ران دوور بووم، به‌ڵام گوێبیستی هاندانی ئه‌وان بووم که‌ هاواریان ده‌کرد( ئێمه‌ مالمۆمان خۆش ده‌وێت )، چه‌ندین لافیته‌یان له‌ یاریگا هه‌ڵواسیبوو و هه‌روه‌ها هانی منیشیان ده‌دا و چه‌ندین نوسراویشیان بۆ من دانابوو و ده‌یان وت: به‌هیوای سه‌رکه‌وتن بۆ زلاتان.

منیش له‌و کاته‌دا چومه‌ لایان و به‌ ده‌سته‌کانم ئیشاره‌تم بۆ کردن و وتم: ته‌نها کاتێکی زیاترم بده‌نێ ... پێویستم به‌ کاتێکی زیاتر هه‌یه‌، له‌راستیدا یارییه‌کی زه‌حمه‌ت بوو، ئێمه‌ ته‌نانه‌ت به‌ خاڵێکیش رازیبوین، فشارێکی زۆرمان له‌سه‌ر بوو و یارییه‌که‌ ده‌ستی پێ کرد.

یاریه‌که‌ ده‌ستی پێکرد و تۆمارکردنی گۆڵم له‌لا گرنگ نه‌بوو، به‌ڵام ده‌مویست چه‌ند جوڵه‌یه‌کی هونه‌ری جوان نمایش بکه‌م و له‌زۆر کاتی یاریه‌که‌ وام کرد، هه‌ڵده‌ستام به‌ئه‌نجامدانی جوڵه‌ی سه‌رنجراکێش، له‌سه‌ره‌تادا مه‌ترسی زۆرم هه‌بوو بۆ سه‌ر به‌رگریکارانی یانه‌ی ئه‌یک و یاریم به‌ به‌رگریکاره‌کان ده‌کرد، به‌ڵام به‌بێ ئه‌نجام، دواتر ئه‌وان کۆنترۆڵی یاریه‌که‌یان کرد و هیچ هه‌لێکیان بۆ من نه‌هێشته‌وه.

بێگومان له‌ یاریگادا کێ کۆنترۆڵی تۆپ بکات لایه‌نی باش بۆ ئه‌وه‌، منیش هه‌ر هه‌وڵم ده‌دا ئارام بم تاوه‌کو له‌ خوله‌کی 30 گێمی یه‌که‌مدا له‌ ده‌ره‌وه‌ی هێڵی سزا تۆپێکم له‌ یاریزان پیتر سۆرینسن وه‌رگرت هه‌رچه‌نده‌ هه‌لێکی زۆر باش نه‌بوو به‌ڵام کێشه‌م نه‌بوو، تۆپه‌که‌م به‌ پاژنهی‌ پێ ئاراسته‌ی گۆڵ کرد و هه‌موو هانده‌رانم هه‌ژاند، یاریگا ده‌نگی ده‌دایه‌وه‌ له‌گه‌ڵ وشه‌ی سوپه‌ر زلاتان، به‌ڵام گۆڵ نه‌بوو پاشان له‌ خوله‌کی 70 گێمی دووه‌مدا له‌ تۆپێکی تری یاریزان سورنسن که‌ له‌ لای ڕاست پێیدام که‌ له‌ پێشبینی که‌س دانه‌بوو له‌ گۆشه‌یه‌کی مه‌حاڵه‌وه‌ توانیم تۆپه‌که‌ ئاراسته‌ی گۆڵ بکه‌م و تۆپه‌که‌ چووه‌ نێو گۆڵه‌وه‌، له‌و کاته‌دا یاریگا گه‌شایه‌وه‌ و هه‌موو هانده‌ران هه‌ستان به‌ خۆشی ده‌ربڕین، منیش بێ سنور خۆشحاڵ بووم و خۆشیم ده‌ربڕی و چومه‌ لای یاریزانه‌کان و هاوارم کرد: له‌تۆپی پێ درورکه‌ونه‌وه‌ من لێره‌م .

له‌دوای یاریه‌که‌ زۆر زۆر دڵم خۆشبو، شانازیم به‌ خۆم ده‌کرد و ده‌می هه‌موو ئه‌وانه‌م داخست که‌ ده‌یانوت زلاتان شایسته‌ی 85 ملیۆن کرۆن نیه‌، دواتر له‌ کۆنگره‌یه‌کی ڕۆژنامه‌وانیدا ڕۆژنامه‌نوسێک لێیپرسیم ئایا ئه‌ندرێس سڤینسۆن و کیم کاڵسترۆم چیان ده‌وت؟ منیش وتم ده‌یانوت: زلاتان ... زلاتان، له‌و کاته‌دا هه‌مویان پێکه‌نین بێگومان ئه‌و کاتانه‌ زۆر خۆش بوو، پاشان چومه‌ لای ئۆتۆمبێله‌که‌م و بینیم له‌ چوارده‌وره‌ی ئۆتۆمبێله‌که‌م چه‌ندین کچ و کوڕی لێیه‌ که‌ چاوه‌رێی واژووی من بوون، بێگومان من ناچار نه‌بووم به‌ ئه‌نجامدانی واژوو بۆ ئه‌وان، به‌ڵام واژووکردن فه‌لسه‌فه‌ی من بوو بۆ ڕاکێشانی هانده‌ر بۆ خۆم، له‌ ڕۆژی دواتردا سه‌ره‌ی ڕۆژنامه‌کان بوو ئایا چ گومانێک له‌ من ده‌به‌ن؟ ئایا هیچیان نوسیوه‌ له‌سه‌ر من؟ ئه‌وه‌ له‌خه‌یاڵم ده‌رنه‌ده‌چوو و چاوه‌رێی ده‌رچونی ڕۆژنامه‌کانم ده‌کرد و بیرم هه‌رده‌م لای نوسینه‌کانی ئه‌وان بوو، له‌و کاته‌دا ئه‌وه‌م بیر که‌وته‌وه‌ که‌ کاتێک ئێمه‌ دابه‌زین بۆ خولی پله‌ دوو پر به‌ دڵ هیوام ده‌خواست که‌ خه‌لک هه‌موو من له‌بیر بکات و که‌س نه‌زانێت من یاریزانم، به‌ڵام دواتر به‌هۆی ئه‌و ئاسته‌ به‌رزه‌ی پێشکه‌شی ده‌که‌م گه‌شامه‌وه‌ له‌ نێو تۆپی پێ دا.

هه‌موان باسی منیان ده‌کرد و باسی ئه‌و ئاسته‌یان ده‌کرد که‌ پێشکه‌شم ده‌کرد له‌ هه‌موو شوێنێکی شاره‌که‌، لای ده‌زگای راگه‌یاندنه‌کان، لای کور و کچه‌ لاوه‌کان، ته‌نها لاوه‌کان باسی منیان نه‌ده‌کرد ته‌نانه‌ت به‌ساڵاچووه‌کانیش له‌سه‌ر ئاستی من ده‌دوان، ئه‌وکات زۆر نوکته‌م گوێ لێ ده‌بوو له‌سه‌ر خۆم و که‌ ده‌یان وت: سڵاو؟ چۆنی چاکی؟ وابزانم من توشی نه‌خۆشی زلاتان بووم،‌ ئه‌مانه‌ بۆ من مایه‌ی خۆشحاڵی بوو ته‌نانه‌ت هه‌ندێک له‌ هانده‌ره‌کانم هه‌ستابوون به‌ وتنی گۆرانی له‌به‌رخاتری من و زۆر جار گوێم له‌و گۆرانیه‌ ده‌بوو، ته‌نانه‌ت هه‌ندێک له‌ کچ و کوڕه‌کان گپرانییه‌که‌ی منیان له‌سه‌ر زه‌نگی مۆبایله‌که‌یان دانابوو، گۆرانیه‌که‌ به‌م شێوه‌یه‌بوو: ئۆ ئۆ زلاتان من خه‌ڵکی هه‌مان شارم...

ئه‌وان گۆرانیان بۆ من ده‌وت ئااااای چه‌ند شتێکی سه‌رسورهێنه‌ره‌! ئایا لێم تێده‌گه‌ن که‌ چی ده‌ڵێم؟ من چۆن هه‌ڵسوکه‌وت بکه‌م له‌گه‌ڵ ئه‌مانه‌دا؟! به‌ڵام ئه‌وه‌ی ڕووده‌دات لایه‌نی خراپی هه‌یه و‌ له‌ گه‌ڕی سێی خوله‌که‌ ڕووبه‌ڕوی تیپی دیجۆرگاردنس بوینه‌وه‌ له‌ ستۆکهۆڵم له‌ 21 ئه‌بریل، دیجۆرگاردنس ئه‌و تیپه‌ بوو که‌ له‌گه‌ڵ ئێمه‌ دابه‌زی بۆ خولی پله‌ دوو و دواتریش له‌گه‌ڵ ئێمه‌ گه‌ڕایه‌وه‌ بۆ خولی پله‌ یه‌ک، به‌ڵام ئه‌و پاڵه‌وان بوو و ئێمه‌ش پله‌ی دووه‌مان به‌ده‌ست هێنا، له‌ڕاستیدا ئه‌وان دوو جار له‌ خولی پله‌ دوو له‌ ئێمه‌یان بردبۆوه‌ به‌ ئه‌نجامی (2 -0) و (4 -1) بێگومان ئه‌وان له‌ڕووی ده‌رونیه‌وه‌ زۆر له‌ ئێمه‌ باشتربوون، خاڵی به‌ هێزیان ئه‌نجامه‌کانی نێوانمان بوو، ئێمه‌ له‌ دوو یاری یه‌که‌م سه‌رکه‌وتنمان به‌دست هێنابوو به‌رامبه‌ر یانه‌کانی ئه‌یک و ئیلڤیسبۆرگ، پێش ئه‌مه‌ش مالمۆ خاوه‌نی زلاتانه‌ که‌ هه‌موو که‌سێک باسی ده‌کات،‌ ئه‌مه‌ش گه‌رمترین پشکی گڕکانه‌که‌ بوو که‌ له‌و یاریه‌دا ڕاهێنه‌ری هه‌ڵبژارده‌ی سوید لارس لاجێرباک ئاماده‌بوو له‌ نێو یاریگادا، ئه‌وه‌ ببوه‌ هۆی شڵه‌ژانی هه‌ندێک له‌ یاریزانه‌کان.

یه‌کێک له‌ هانده‌ره‌کان وێنه‌ی گه‌وره‌ی سێ یاریزانیان هه‌ڵواسی بوو له‌ یاریگادا، له‌ژێر وێنه‌کانیشدا نوسیبویان "ئێمه‌ زلاتانمان هه‌یه‌ و ده‌توانین سه‌رکه‌وین"، له‌و کاته‌دا پێشبینی بارودۆخێکی شڵه‌ژاوم ده‌کرد و هانده‌ران به‌ گڕوتینیکی زۆره‌وه‌ له‌ یاریگا هانیان ده‌دا، بردنه‌وه‌مان زۆر گران بوو و منیش ڕومکردوه‌ یاریگای ئۆڵۆمپی له‌ نێو ئاپۆڕای هانده‌راندا.

هاوشێوه‌ی "گلادیاتۆر" ڕووبه‌ڕوی هه‌زاران که‌س بومه‌وه‌

هانده‌رانی دیجۆرگاردنس له‌ سه‌ره‌تای یاریه‌که‌وه‌ ڕقیان به‌رامبه‌ر من پیشاندا... له‌وانه‌یه‌ ئه‌مه‌ رق لێبوونه‌وه‌ نه‌بێت، به‌ڵام خراپترین هانده‌ر بوون که‌ من به‌رامبه‌ریان یاریم کردبێت، هه‌موو له‌ یاریگا هاواریان ده‌کرد: ئێمه‌ رقمان له‌ زلاتانه‌ ... ئێمه‌ رقمان له‌ زلاتانه‌.

به‌راستی بارودۆخێکی ناخۆش بوو بۆ من، هه‌موو هانده‌ران له‌ دژی من بوون و گوێم له‌ چه‌ندین قسه‌ی ناخۆش بوو که‌ به‌ من و باوکیشیان ده‌وتم تاوه‌کو پێش ئه‌م یاریه‌ هه‌رگیز شتی وام نه‌بینی بوو، به‌ڵام دواتر له‌و بارودۆخه‌ تێگه‌شتم...

ئه‌و هانده‌رانه‌ی شاری ستۆکهۆڵم که‌ زیاتر له‌ ٣٠ هه‌زار که‌س ده‌بون نه‌یانده‌ویست من یاری تۆپی پێ بکه‌م و هه‌وڵیان ده‌دا ته‌رکیزم تێکبده‌ن و له‌ یاریگا دوورم بخه‌نه‌وه، ئه‌مه‌ش کارێکی سروشتیه‌ که‌ به‌م شێوه‌یه‌ سه‌یری تیپی به‌رامبه‌ر بکه‌یت، به‌ڵام وه‌ک وتم ئه‌وه‌ هه‌رگیز له‌ ژیانی من ڕووینه‌دابوو هه‌رچه‌نده‌ له‌ یاری یه‌که‌میشم بارودۆخم له‌وه‌ باشتر نه‌بوو، چونکه‌ له‌ هه‌موو لایه‌ک چاودێری ده‌کرام به‌ تایبه‌تی له‌ لایه‌ن ڕۆژنامه‌نوسه‌کان.

له‌م یاریه‌دا هیچ هه‌ستێکم نه‌بوو بۆ یاریکردن، ته‌نها حه‌زم ده‌کرد وه‌ڵامی قسه‌ ناشرینه‌کانی هانده‌ران بده‌مه‌وه‌، یاریه‌که‌ ده‌ستی پێکرد و یانه‌ی به‌رامبه‌رمان 20 خوله‌ک کۆنترۆڵی یارییه‌که‌یان کرد، ئێمه‌ له‌و وه‌رزه‌دا بۆندمان له‌گه‌ڵ هێرشبه‌ری نایجیری پیته‌ر ئیجی ئیمزا کردبوو که‌ گۆڵکارێکی زۆر باش بوو، ئه‌و له‌ ساڵانی دواتردا بووه‌ گۆڵکاری خولی سویدی، به‌ڵام کاتێک له‌گه‌ڵ من یاریی ده‌کرد هه‌رده‌م له‌دوامه‌وه‌ بوو ، ئه‌و تۆپیکی له‌ یاریزانی به‌رگری ماستروڤیچ وه‌رگرت و توانی به‌ شێوه‌یه‌کی جوان گۆڵی یه‌که‌م تۆمار بکات.

پیته‌ر ئیجی ئاستێکی زۆر جوانی پێشکه‌ش کرد له‌م یاریه‌دا له‌گه‌ڵ هاوڕێ ئه‌فریقیه‌که‌ی تری جوسێپ ئیلانج، که‌ ئه‌و گۆلی دووه‌می تۆمار کرد، هانده‌ران جنێویان دا و زۆر هاواریان کرد، به‌ڵام من له‌م یارییه‌دا هیچ ڕۆڵێکم نه‌بوو ته‌نها چه‌ند به‌رگریه‌ک چاودێریه‌کی توندیان له‌ سه‌ر من دانابوو بۆ ئه‌وه‌ی نه‌توانم باش یاری بکه‌م، بێگومان له‌مه‌ش سه‌رکه‌وتوو بوون.

له‌م یاریه‌دا هه‌ستام به‌‌ ئه‌نجامدانی هه‌ندێک جوڵه‌ی نایاب، به‌ڵام له‌وه‌ زیاتر نه‌متوانی هیچی تر بکه‌م، یارییه‌که‌ یاری ئیجی و ماسترۆڤیچ بوو، زیاتر له‌ من ئه‌وان له‌ یارییه‌کهدا‌ ده‌ستێکی باڵایان هه‌بوو، پاش چه‌ند خوله‌کێک تۆپێکم له‌ ناوه‌راستی یاریگاوه‌ وه‌رگرت بیرم له‌وه‌ کرده‌وه‌ که‌ بارودۆخه‌که‌ بگۆڕم دوای ئه‌وه‌ی توانیم یاریی به‌ یاریزانێک بکه‌م، له‌ یاریزانیکی تر رزگارم بوو، له‌وکاته‌دا به‌ خۆمم وت: ئۆ ئۆ ئه‌وه‌ زۆر ئاسانه...‌ پاشان کۆنترۆڵی تۆپه‌که‌م کرد.

ئه‌وه‌ی ڕاستی بێت نه‌مده‌زانی که‌ ئه‌و به‌رگریکارنه‌ چۆن له‌ ڕۆژنامه‌کان باسی منیان کرد، به‌ڵام توانیم یارییان پێبکه‌م و پاشان تۆپه‌که‌م ئاڕاسته‌ی گۆڵ کرد و توانیم گۆڵێکی جوان تۆمار بکه‌م، بێگومان ئه‌و گۆڵه‌ ته‌نها خۆشی پێنه‌به‌خشیم، به‌ڵکو وه‌ک هه‌ڵگیرساندنی جه‌نگ بوو دژی ئه‌و هه‌موو هانده‌ره‌ی که‌ له‌نێو یاریگا بون و رقیان لێم بوو، دواتریش توانیمان به‌ چوار گۆڵ له‌و تیپه‌ ببه‌ینه‌وه‌.

ئایا باوه‌ڕده‌که‌ن پاش یاریه‌که‌ چی روویدا؟ ئه‌و هانده‌رانه‌ی که‌ جنێویان به‌ من ده‌دا و شه‌ڕی ده‌رونییان له‌گه‌ڵ ده‌کردم پاش یاریه‌که‌ له‌ ده‌ورم کۆبوونه‌وه‌ و داوای واژویان لێده‌کردم، ئه‌وان شێتی من ببون و ڕقه‌که‌یان گۆڕا بۆ خۆشه‌ویستی پاش ئه‌وه‌ی جوڵانه‌وه‌ و گۆڵ تۆمار کردنه‌که‌‌ی منیان بینی.

ئایا ده‌زانن که‌ ئه‌و فیلمه‌ی زۆر حه‌زم لێیه‌ بریتیه‌ له‌ گلادیاتۆر؟ مه‌شهه‌دێک که‌ وابزانم هه‌موو که‌سێک بینیویه‌تی کاتێک ئمپراتۆر ده‌چێته‌ نێو مه‌یدانی زۆرابازییه‌که‌وه‌و‌ داوا له‌ ماکسیمۆس‌ ده‌کات قه‌ڵغانه‌که‌ی هه‌ڵگریت، ئه‌ویش له‌ وه‌ڵامدا ده‌ڵێت: ناوی من ماکسیموس دیسیموس میریدۆس .. وه‌ من ده‌جه‌نگم له‌و ژیانه‌ و له‌ داهاتووشدا... منیش هه‌ستم به‌ هه‌مان شت کرد، هه‌ستم کرد که‌ من به‌رامبه‌ر هه‌موو ئه‌وانه‌ وه‌ستامه‌وه‌ که‌ گومانیان له‌ تواناکانی من هه‌بوو و رێگه‌شم به‌ هیچ که‌سێک نه‌ده‌دا که‌ بموه‌ستێنێت.



ئه‌م بابه‌ته 2028 جار خوێنراوه‌ته‌وه‌‌

PM:09:16:18/02/2016



Copyright 2015. xelk.org. All Rights Reserved.
Created by:kurdsky.com