ئاڵتون كۆپری ئەمجارەش نەیبردەوە

ئاڵتون كۆپری ئەمجارەش نەیبردەوە


مەسعود حەسەن

لە چوارچێوەی یارییەكانی گەڕی سێیەمی خولی تۆپی پێی یانە پلە یەكەكانی كوردستان و لە گروپی دووەمدا، رۆژی دووشەممە بەرواری 15-2-2016 لە شاری سۆران، هەردوو یانەی سۆران و ئاڵتون كۆپری روبەروی یەكتر بونەوە.

لە گێمی یەكەمدا ئاستی یانەی سۆرانی خاوەن یاریگا باشتر بوو، چەند جارێك لە گۆلی یانەی ئالتون كۆپری نزیك بونەوە، لە خولەكی 17 گۆڤان حەسەن هێرشبەری یانەی سۆران لە تۆماركردنی گۆڵی پێشكەوتن نزیك بوو ، كاتێك بەسەر تۆپێكی ئاراستەی گۆڵی ئاڵتون كۆپری كرد، بەڵام تۆپەكەی بەر ستون كەوت.

یاریزانانی ئالتون كۆپریش بێدەنگ نەبوون و لە خولەكی 42 سۆران ئیدریس لە دوورەوە تۆپێكی موشەك ئاسای ئاراستەی گۆلی سۆران كرد، بەڵام گۆڵپارێزی یانەی سۆران تۆپەكەی دوور خستەوە.

لە گێمی دووەمدا یانەی سۆران بە گڕوتینەوە هاتنە نێو یاریگا، یاریزان فەرشاد ئیسماعیل لە ماوەی 3 خولەكدا سێ جار نزیك بوو گۆلی پێشكەوتن تۆمار بكات، بەڵام بەخت یاوەری نەبوو، ئینجا لە خولەكی 79 عەبدوڵا عەبدولمەجید یاریزانی ئالتون كۆپری لە هێرشێكی هەڵگەڕاوەدا خەریك بوو گۆڵێك تۆمار بكات، بەڵام لە بێبەختی ئەو تۆپەكە بەر ستون كەوت. 

لە دواین خولەكی كاتی زیاد كراودا یاریزان موهەنەد ئەحمەد هاندەرانی هێنایە جۆش و خرۆش و تاكە گۆڵی بردنەوەی بۆ سۆران تۆمار كرد و سێ خاڵی گرنگی مسۆگەر كرد، لە كۆتاییدا یانەی سۆران یەكەم سێ خاڵی بەدەستهێنا و یانەكەی پردێش هەر سێ یاری یەكەمی لەسەر یەكتری بەئەنجامی گۆلێكی بێوەڵام دۆراندووە.

ئەنجامی یارییەكانی تریش بەم شێوەیە بوو:
گروپی یەكەم (سێمیل 3 - 3 خاك) (كۆیە 0 - 0 پ.سلێمانی)
گروپی دووەم (سیروانی نوێ 3 - 1 شەهیدان) (سۆران 1 - 0 ئالتون كۆپری)
گروپی سێیەم (هەڵۆ 0 - 0 هەڵەبجەی شەهید) (سەورە 1 - 0 ئاكرێ)

ئه‌م بابه‌ته 375 جار خوێنراوه‌ته‌وه‌‌

PM:02:22:16/02/2016



Copyright 2015. xelk.org. All Rights Reserved.
Created by:kurdsky.com