١٠ یاریزان ... خیانه‌تی مێژووییان له‌ یانه‌ و هانده‌رانیان کرد

١٠ یاریزان ... خیانه‌تی مێژووییان له‌ یانه‌ و هانده‌رانیان کرد


خه‌ڵک

له‌ڕووی وه‌رزشییه‌وه‌ ئاساییه‌ یاریزانێک له‌یانه‌که‌وه‌ ڕوو له‌یانه‌یه‌کی تر بکات، جا یانه‌ی دووه‌م هه‌ر ناو و نازناوێکی هه‌بێت، به‌ڵام به‌نسبه‌ت هانده‌ران و که‌سایه‌تی یانه‌کانیانه‌وه‌ ئاسایی نییه‌ ڕوبکه‌یته‌ یانه‌یه‌ک که‌ ئه‌وان به‌ دوژمنی مێژویی، یاخود ڕکابه‌ری ئه‌زه‌لی ناوده‌به‌ن.

جیهانی تۆپی پێ به‌دوورنیه‌ له‌ چیرۆکی خیانه‌تی گه‌وره‌ و هه‌نگاوی سه‌یر له‌لایه‌ن یاریزانه‌وه‌، له‌ (خه‌ڵک سپۆرت)وه‌ ناوی ئه‌و (١٠) یاریزانه‌تان بۆ بڵاوده‌که‌ینه‌وه‌ که‌ به‌ خیانه‌تکاری مێژویی ناوده‌برێن به‌نسبه‌ت میدیا و هانده‌رانه‌وه‌:

١. سۆڵ کامپڵ: له‌ساڵی ٢٠٠١ به‌رگریکاره‌ ئینگلزییه‌که‌ یانه‌ی تۆتنهام ئاگادار ده‌کاته‌وه‌ که‌ حه‌زی به‌ ڕۆیشتن و ئه‌زمونێکی نوێیه‌... به‌ڵێ ئه‌م هه‌نگاوه‌ ئاساییه‌ و هانده‌رانیش به‌ مافی ڕه‌وای هه‌موو یاریزانێکی ده‌زانن، به‌ڵام ئه‌وه‌ی ئه‌م یاریزانه‌ ده‌یکات کوشتنی هانده‌رانی یانه‌که‌یه‌تی... ڕاسته‌وخۆ ڕوو له‌ ئارسیناڵ ده‌کات.
یانه‌ نه‌مابوو ئارسیناڵی ڕکابه‌ری مێژویی تۆتنهام نه‌بێت؟! به‌وهۆیه‌وه‌ "ده‌یلی مه‌یڵ" به‌ گه‌وره‌ترین خائینی جیهان وه‌سفی ده‌کات، ئایا وایه‌؟ با ئه‌وانه‌ی تریش بناسین، ئینجا بڕیار ده‌ده‌ین.


٢. لویس فیگۆ: یه‌کێکه‌ له‌ باشترین یاریزانانی یانه‌ی به‌رشلۆنه‌، به‌ڵام له‌ ساڵی ٢٠٠٠ هه‌نگاوێکی مێژویی ده‌نێت و ڕوو له‌ ڕیاڵ مه‌دریدی ڕکابه‌ری ئه‌زه‌لی بلاوگرانا ده‌کات، به‌وهۆیه‌وه‌ له‌ هه‌رێمی که‌ته‌لۆنیا ناوهێنانیشی قه‌ده‌غه‌ ده‌کرێت و ته‌نانه‌ت له‌یه‌کێک له‌ڕووبه‌ڕوبونه‌وه‌کاندا سه‌ره‌ به‌رازێکی تێده‌گرن، پێشتریش مۆبایل! هانده‌ران ئه‌م که‌لوپه‌لانه‌یان له‌کوێوه‌ هێنایه‌ ناو یاریگا؟!


٣. ڕۆناڵدۆ نازاریۆ: "فینۆمینۆ"ش له‌ لیسته‌که‌دایه‌ ... سه‌ره‌تا به‌رشلۆنه‌، دواتر ڕیاڵ مه‌درید، ئینجا له‌ ئیتاڵیا له‌ ئینته‌ر بۆ ئه‌ی سی میلان و گه‌رچی گواستنه‌وه‌کان ڕاسته‌وخۆ نه‌بووه‌، به‌ڵام له‌به‌رازیل ئه‌و خیانه‌ته‌شی کرده‌ ڕاسته‌وخۆ و له‌ فلامینگۆوه‌ ڕویکرده‌ کۆنتیانز!


٤. زلاتان ئیبراهیمۆڤیچ: کوێ هه‌یه‌ (سوڵتان) خیانه‌تی لێنه‌کردبێت؟! وه‌ک خۆی ده‌ڵێت " من بۆ پاره‌ یاریی ده‌که‌م، کێ باشتر ده‌دات من له‌وێم" ئه‌وه‌ی کێشه‌ دروست ده‌کات ئه‌م کابرایه‌ گوێ به‌ یانه‌ و هانده‌ر نادات! له‌ یوڤییه‌وه‌ بۆ ئینته‌ر، له‌ ئینته‌ره‌وه‌ بۆ میلان! ته‌نانه‌ت له‌ په‌ڕتوکه‌که‌یدا باس له‌وه‌ده‌کات به‌ نیازبووه‌ بچێته‌ ڕیاڵ مه‌درید وه‌ک تۆڵه‌ سه‌ندنه‌وه‌یه‌ک له‌ به‌رشلۆنه‌، به‌ڵام ئیداره‌ی بلاوگرانا به‌توندی ڕێگرییان لێکردووه‌.


٥. ویلیام گالاس: هه‌ندێک پێیان وایه‌ سته‌مه‌ ئه‌م یاریزانه‌ فه‌ره‌نسییه‌ بخرێته‌ ناو لیسته‌که‌وه‌؟ ئێمه‌ش ده‌ڵێین نه‌خێر سته‌م نییه‌، هۆکاره‌که‌ش ئه‌وه‌یه‌ که‌ ناوبراو ڕاسته‌ به‌ئاڵوگۆڕ (به‌رامبه‌ر ئاشلی کۆڵ) ڕویکرده‌ ئارسیناڵ، به‌ڵام ئه‌وکاته‌ هه‌ڕه‌شه‌ی له‌ ئیداره‌ی چێڵسی کرد که‌ ئه‌گه‌ر نه‌یخه‌نه‌ ناو ئاڵوگۆڕه‌که‌وه‌ ئه‌وا گۆڵ له‌ خۆیان ده‌کات! له‌وه‌ش سه‌یرتر دواتر له‌ ئارسیناڵه‌وه‌ ڕویکرده‌ تۆتنهامی ڕکابه‌ری مێژویی، دواتر ئارسیناڵ داوای ده‌کاته‌وه‌ و ئه‌ویش ده‌ڵێت :" ئه‌و نرخه‌م ده‌وێت که‌ پێتان نادرێت"، ئێستا ده‌ڵێن چی؟ خیانه‌تکاره‌ یان نا؟


٦. بێرند شۆسته‌ر: ئه‌ڵمانییه‌که‌ ماوه‌ی هه‌شت ساڵ به‌درێسی به‌رشلۆنه‌وه‌ یاریی کرد و ئاستێکی خه‌یاڵی پێشکه‌ش کرد، به‌ڵام دواتر هه‌مو شتێکی سڕییه‌وه‌ و ڕویکرده‌ ڕیاڵ مه‌درید، له‌یانه‌ی شاهانه‌ له‌ئاستی پێویستدا نه‌بوو، بڵێن ڕویکرده‌ کوێ؟ ئه‌تله‌تیکۆ مه‌درید! ئه‌مه‌ دووجار خیانه‌ته‌ له‌دوو یانه‌ی گه‌وره‌...


٧. لویس ئینریکی: ڕه‌نگه‌ هه‌ندێکتان پێتان وابێت راهێنه‌ری ئێستای به‌رشلۆنه‌ که‌ته‌لۆنییه‌... نه‌خێر، کوڕی مه‌دریده‌ و سه‌ره‌تا وه‌ک یاریزانێکی ئاسایی بۆ ڕیاڵ مه‌درید یاریی ده‌کات (له‌وماوه‌یه‌دا ته‌نها ١٨ گۆڵ تۆمار ده‌کات)، به‌ڵام دواتر ڕووده‌کاته‌ به‌رشلۆنه‌، به‌ڵێ به‌رشلۆنه‌ و هانده‌رانی مێره‌نگی هیچ پێیان ناخۆش نه‌بوو، چونکه‌ یاریزانێکی ئاسایی بوو... ده‌ڕوات؟ با بڕوات خودای له‌گه‌ڵ ...
به‌ڵام هه‌ر که‌ درێسی سور و شین ده‌پۆشێت ده‌بێته‌ مه‌کینه‌ی یاریی کردن و له‌٣٠٠ یارییدا ١٠٩ گۆڵ تۆمار ده‌کات و ده‌بێته‌ یه‌کێک له‌ کۆڵه‌که‌کانی بلاوگرانا، له‌وه‌یش خراپتر، کاتێک ڕووبه‌ڕوی مێره‌نگی ده‌بێته‌وه‌ گڕ ده‌گرێت و جارێک یان دووجار توشی شه‌ڕ ده‌بێت له‌گه‌ڵ هاوڕێ کۆنه‌کانی!


٨. کارلۆس تیڤێز: ئه‌م ئه‌رجه‌نتینییه‌ که‌ به‌ "ئه‌پاچی" ناسراوه‌، له‌یانه‌ی مانچسته‌ر یونایتده‌وه‌ ڕووده‌کاته‌ مانچسته‌ر سیتی، ئه‌مه‌یان خۆی خیانه‌ته‌ و دواتریش کاتێک ده‌یه‌وێت مان سیتی به‌جیبهێڵێت له‌کۆتا یارییدا ئاماده‌ نابێت به‌رامبه‌ر بایرن میونشن یاریی بکات! ته‌نانه‌ت خیانه‌ت له‌یانه‌که‌ی خۆیشی کرد!


٩. ئیان رایت: له‌ کریستاڵ پالاسه‌وه‌ ڕووده‌کاته‌ ئارسیناڵ، هیچ کێشه‌یه‌ک نییه‌ و هانده‌رانی کریستاڵیش شانازی ده‌که‌ن ئه‌ستێره‌یه‌کیان په‌یوه‌ندی به‌ تۆپچییه‌کانی له‌نده‌نه‌وه‌ ده‌کات، به‌ڵام ئاسایی نییه‌ دواتر له‌ کریستاڵ ده‌بێته‌ دڕکی مه‌مو زین و له‌یه‌که‌مین ڕووبه‌ڕوبونه‌وه‌ی نێوان ئارسیناڵ و یانه‌ کۆنه‌که‌ی "کریستاڵ" گۆڵی بردنه‌وه‌ تۆمار ده‌کات و به‌هۆی ئه‌و گۆڵه‌وه‌ یانه‌ کۆنه‌که‌ی داده‌به‌زێت بۆ ڕیزی یانه‌ پله‌ یه‌که‌کان... به‌جدی خیانه‌تکاره‌ !


١٠. فێرناندۆ تۆرێس: نینۆی ئیسپانی له‌ لیڤه‌رپوڵه‌وه‌ هه‌گبه‌که‌ی ده‌پێچێته‌وه‌و ڕووده‌کاته‌ یانه‌ی چێڵسی، ناگونجێت له‌سوری ئینگلیزه‌وه‌ بۆ شینی هه‌مان وڵات! هانده‌رانی لیڤه‌رپوڵ به‌ خائینی پاره‌ی له‌قه‌ڵه‌م ده‌ده‌ن، چونکه‌ ته‌نها سودی ئه‌م گواستنه‌وه‌یه‌ ئه‌وه‌یه‌ پاره‌یه‌کی خه‌یاڵی بۆ "ڕێدز" ده‌گێڕێته‌وه‌ (٥٠ ملیۆن پاوه‌ند و له‌کاتی خۆیدا گرانبه‌هاترین گرێبه‌ست له‌مێژووی پریمه‌رلیگ).


ببورن، خیانه‌تکار زۆره‌، به‌ڵام ئێمه‌ ته‌نها ئه‌م ناوانه‌ له‌هزرماندا ماونه‌ته‌وه‌و ئێوه‌ش ده‌کرێت ئه‌وه‌ی به‌ خیانه‌تکاری گه‌وره‌ی ده‌زانن له‌ کۆمێنته‌کان ناویان بهێنن....

ئه‌م بابه‌ته 7601 جار خوێنراوه‌ته‌وه‌‌

PM:11:20:15/02/2016



Copyright 2015. xelk.org. All Rights Reserved.
Created by:kurdsky.com