من زلاتانم: من هەژاربووم و کە کوڕێکم دەبینی لەگەڵ کچێکی جوان مێشکم دەوەستا و توڕە دەبوم

من زلاتانم: من هەژاربووم و کە کوڕێکم دەبینی لەگەڵ کچێکی جوان مێشکم دەوەستا و توڕە دەبوم

وەرگێرانی/ کاروان کەریم مەحمود 

له‌ ژماره‌ی رابردوو باسی کۆمه‌لیک له‌ روداوه‌کانی ژیانی زلاتانمان کرد و له‌م ژماره‌یه‌شدا باس له‌ قۆناغه‌کانی ناوه‌ندی خوێندنی زلاتان و چاره‌نوسی وه‌رزشی ئه‌و ده‌که‌ین

زلاتان باسی خوێندنی خۆی ده‌کات و ده‌لێت : من چوومه‌ قۆناغێکی نوێ ی خوێندن ئه‌ویش قۆناغی ناوه‌ندی بوو له‌ قوتابخانه‌ی بورگار سکولانز، به‌رنامه‌ی ئێمه‌ ته‌واو گۆرا به‌رنامه‌یه‌کی تایبه‌تمان هه‌بوو له‌شێوازی تێگه‌یشتن و فێربوونمان له‌تۆپی پێ ، له‌وکاته‌دا پێشبینیم کرد بارودۆخم ته‌واو بگۆریت و باشتر ببم و بتوانم له‌ کۆتایدا ببمه‌ لاوێکی باش، به‌لام ئه‌وه‌ی من چاوه‌روانم ده‌کرد روی نه‌دا ئه‌مه‌ش بۆ من وه‌ک کاره‌ساتێک وابوو .. باشه‌ من خۆم بۆ ئه‌م بارودۆخه‌ش ئاماده‌کردبوو؟

له‌گه‌ل من له‌ قوتابخانه‌ کۆمه‌لێك لاو هه‌بوو و وه‌ هه‌ندێک مندالیشمان له‌گه‌ل بوو، لاوه‌کان به‌ جلی جوان و رێکوپێکەوە ده‌هاتنه‌ قوتابخانه‌ و جگه‌ره‌یان ده‌کێشا، منیش هیچ گۆرانکاریه‌کم نه‌بینی له‌ بارودۆخی خۆم، هه‌مان زلاتانی روزینگارد بووم به‌ جلێکی په‌رپوت و نارێک له‌گه‌ل جوته‌ پێلاوێکی کۆن سه‌ره‌رای ئه‌مانه‌ش هاورێکانم جلی وه‌رزشی نوێ و مارکه‌یان هه‌بو، به‌لام هی من هه‌ر ئه‌و جوت لاپچینه‌ی مارکه‌ی نایکم هه‌بوو که‌ زۆر کۆن بوو وه‌ هه‌روه‌ها جلی وه‌رزشیشم زۆر نه‌شیاو بوو من بارودۆخم خراپتر بوو له‌ رۆزینگارد.

قوتابخانەی ناوەندی و حسابی بانکەکەی باوکی

ئیبرا به‌رده‌وام ده‌بێت له‌ باس کردنی قوتابخانه‌ی ناوه‌ندی و ده‌لێت : له‌ بۆرگاسکۆڵان کۆمه‌لێک قوتابیم ده‌بینی که‌ درێسی رالف لاورین و پێلاوی تیمبرلاندیان له‌به‌ر بوو له‌گه‌ل کۆمه‌لێک شتی تر که‌ تاوه‌کو ئێستا له‌ که‌سم نه‌بینی بوو، ئه‌وان هاورێیه‌تی کۆمه‌لێک کچیان ده‌کرد له‌ قوتابخانه‌ که‌ که‌س نه‌یده‌توانی قسه‌یان له‌گه‌ل بکات .

ئه‌م بارودۆخه‌ بۆ من زۆر بێزار که‌ر بوو که‌ من له‌ نێو هاورێکانم که‌سێکی نامۆ و نه‌شیاو بووم، بۆیه‌ له‌گه‌ل باوکم قسه‌م کرد له‌و باره‌یه‌وه‌ ئه‌وه‌بوو من و باوکم بووه‌ کێشه‌مان ، له‌وکاته‌شدا ئێمه‌ له‌ لایه‌ن حکومه‌ته‌وه‌ بوینه‌ خاوه‌ن بیمه‌یێک به‌ بری 795 کرۆن، به‌لام ئه‌م بره‌ پاره‌یه‌ باوکم وه‌ریده‌گرت، چونکه‌ ئه‌و سه‌رۆک خێزان بوو بۆیه‌ منیش له‌گه‌ل باوکم قسه‌م کرد و پێم وت: من نامه‌وێت هه‌رده‌م خراپترین لاو بم له‌ قوتابخانه‌...

ئه‌وه‌ بوو باوکم چاره‌سه‌رێکی بۆ کردم و مانگانه‌ بره‌ پاره‌یه‌کی بۆ دابین کردم‌ و حسابێکی بانکیشی بۆ کردمەوە و هه‌موو 20 رۆژ جارێک باوکم پاره‌ی بۆ داده‌نام له‌ حیسابی بانکی تایبه‌ت به‌ خۆم، ئه‌وه‌ کاتێکی زۆر خۆش بوو بۆم بۆیه‌ له‌گه‌ل هاورێکانم چاوه‌روانی ئه‌وه‌م ده‌کرد که‌ باوکم پاره‌که‌ له‌ بانک دابنێت و راسته‌وخۆ من ده‌چووم هه‌مویم لێ سه‌رف ده‌کرد ، بەوبۆنەیەوە هاورێکانم دوایان لێکردم میوانداریان بکه‌م، دواتر داوه‌تم کردن و بری 299 کرۆنم خه‌رجکرد و دواتریش له‌گه‌لیان چوم بۆ فرۆشگای جل و به‌رگ و سێ بلوزی نایابم به‌ بری 99 کرون کڕی، له‌و کاته‌دا چه‌ندین جۆر و جل وبه‌رگم تاقی کرده‌وه‌، به‌لام هه‌ندێکیان بۆم نه‌ده‌گونجان.

بەهێزبونی جەستە

من هەمیشە خاوەنی جەستەیەکی لاواز و بچوک بووم، له‌ هاوینی ئەو ساڵەدا به‌شێوه‌یه‌کی به‌رچاو گه‌وره‌بووم، له‌و کاته‌دا بەرزی باڵام 13 سانتیمه‌تر زیادی کرد، له‌ ماوه‌ی چه‌ند مانگێکی که‌م دا جەستەم گۆڕانکاری بەسەردا هات، له‌و کاته‌دا هه‌ستم کرد که‌ پێویستە زیاتر گرنگی به‌ خۆم بده‌م و بچمه‌ شوێنی باش بۆگرنگیدان بە خۆراکی ڕۆژانە و به‌جەستەم، بۆیه‌ رومکرده‌ شوێنی وه‌ک بیرگەر کینج و تریانگلن و لیلا تورج ، له‌م شوێنانه‌دا هه‌لده‌ستام به‌ ئه‌نجامدانی چه‌ندین کار و بیرم له‌وه‌ کرده‌وه‌ که‌ پێویستیم به‌ چه‌ند شتێکه‌ بۆ ئه‌وه‌ی منیش بتوانم هاورێی کچی جوانم هه‌بێت ... من گوێم له‌ گۆرانی ( ئێمم پی پری ) ده‌گرت که‌ هی یه‌کێک بوو له‌ قوتابیه‌کان.

ئێمه‌ هه‌موومان لۆکەری تایبه‌ت به‌ خۆمان هه‌بوو له‌ قوتابخانه‌، سه‌رجه‌م پێداویستیه‌کانی خۆمان له‌م لۆکەرەدا (دۆڵاب) هه‌لده‌گرت و ‌بەژمارەی نهێنی دامانده‌خست، منیش ژماره‌ی نهێنی یه‌کێک له‌ هاورێکانمم زانی که‌ ژماره‌که‌ی بریتیبوو له‌ پێنج تا حەوت، دۆلابه‌که‌ی شتی زۆر نایابی تێدابوو وه‌ک جلوبه‌رگی گرانبه‌هاو چه‌ندین ئامێری نایاب، کاتێک هاورێکه‌م له‌ قوتابخانه‌ ده‌رده‌چوو بۆ‌ ده‌ره‌وه‌ ده‌چوم لۆکەرەکەیم ده‌کرده‌وه‌ و بە "هێد فۆن" گوێم له‌ گۆرانی ده‌گرت ... ئه‌مه‌ زۆر دلی خۆش ده‌کردم.

ئیبرا زیاتر ده‌لێت : سه‌ره‌رای ئه‌و کارانه‌ من هه‌رده‌م که‌سێکی باش و زیره‌ک نه‌بووم، هاورێکانم زۆر له‌ من زیره‌ک و ژیرتر بوون ئه‌وان په‌یوه‌ندیان له‌گه‌ل چه‌ندین کچی جوان ده‌به‌ست و دواتریش له‌گه‌ل مالی کچه‌کان یه‌کتریان ده‌ناسی، به‌لام من له‌و کارانه‌دا هه‌رگیز سه‌رکه‌وتو نه‌بووم ، ئێمه‌ مندالی هه‌ژارین ناتوانین کاری وەها بکه‌ین، چونکه‌ زۆر له‌گه‌ل منداله‌کانی تر جیاواز بووین کاتێک ده‌مبینی که‌ کورێک جلێکی جوان و مارکه‌ی له‌به‌ردایە و له‌گه‌ل جوانترین کچه‌ من مێشکم راده‌وه‌ستا و زۆ توره‌ ده‌بووم به‌راستی له‌م حاله‌ته‌دا زۆر هه‌ستم به‌ ناخۆشی دەکرد و خۆم زۆر به‌ لاواز ده‌هاته‌ به‌رچاو.

من له‌ تیپیکی گه‌وره‌ یاریم ده‌کرد ، کۆمه‌لێک له‌ باشترین یاریزانه‌کان له‌م یانه‌یه‌ یاریان ده‌کرد و به‌ناوبانگترین تیپ بوو له‌ شاره‌که‌مان ، به‌لام من هه‌رده‌م له‌سه‌ر کورسی یه‌ده‌گ داده‌نیشتم ئه‌مه‌ش به‌ بریاری راهێنه‌ر بوو که‌ راهێنه‌ره‌کمان ناوی ئاکی دونالدو بوو ، ئه‌و راهێنه‌ره چ یاریزانێکی پێ باش بوایه‌ یاری پێ ده‌کرد و به‌ پێچه‌وانه‌وه‌ چ یاریزانێکی به‌دڵ نه‌بوایه‌ یاری پێ نه‌ده‌کرد، به‌ ئاره‌زووی خۆی هه‌ڵسوکه‌وتی ده‌کرد و به‌بێ ئه‌وه‌ی گرنگی پێمان بدات، ته‌نیا هه‌ندێک یاریزانی لا گرنگ بوو ، بۆیه‌ وام هه‌ست ده‌کرد که‌ ئه‌ راهێنه‌ره‌ نیه‌تی ئه‌وه‌نه‌بوو که‌ بناغه‌یه‌ک بۆ تۆپی پێ و یانه‌که‌ دابنێت، چونکه‌ من هه‌ر کاتێک به‌ژداریم ده‌کرد له‌ یاریه‌کان گۆلم تۆمار ده‌کرد ، به‌لام ئه‌و وای ده‌بینی من له‌ شتی تر خراپ بم ئه‌و پێی وابوو من له‌ به‌رژه‌وه‌ندی خۆم یاری ده‌که‌م و هه‌رده‌م به‌ منی ده‌وت: زلاتان وا پێویست ده‌کات له‌ به‌رژه‌وه‌ندی تیپه‌که‌ یاری بکه‌ی ...

ئەم ئه‌و رسته‌یه‌ هه‌زاران جار گوێم لێ بووه‌ و زۆر هه‌ستم به‌ کاریکی سه‌یر ده‌کرد بۆیه‌ له‌ خۆم پرسی: ئایا من ئیبراهیمۆڤیچم ؟ که‌سێکی خۆویست ؟ راسته‌ له‌و کاته‌دا من تۆزیک خۆویست بووم ئه‌وه‌ی راهێنه‌ر ده‌یوت راستی ده‌وت ، وام ده‌زانی باشترین یاریزانی تیپه‌که‌م و زۆر گالته‌م به‌ هاورێکانم ده‌کرد و ته‌نانه‌ت له‌گه‌ل چیمه‌نی یاریگاش رامده‌بوارد زۆر جاری وا هه‌بووه‌ له‌گه‌ل هانده‌ران کێشه‌م ناوەتەوە، به‌لام ئه‌وه‌ که‌سایه‌تی من بوو له‌ یاریکردن من که‌سێکی جیاواز بووم له‌گه‌ل هاورێکانم هه‌رده‌م توڕه‌ ده‌بووم.

ڕوداوی پێکانەکە

ئیبرا باس له‌ روداوێکی گرنگی ده‌کات که‌ له‌و یانه‌یه‌ به‌سه‌ری هاتبوو و ده‌لێت : به‌بیرم دێت ئێمه‌ سه‌رکه‌وتین بۆ یاری کۆتایی خولی لاوان له‌و کاته‌دا ئه‌وه‌ ده‌ستکه‌وتێکی گه‌وره‌بوو بۆ ئێمه‌، به‌لام ئه‌وه‌ی من پێم سه‌یر بوو و وه‌ک کاره‌سات وابوو راهێنه‌رەکەمان به‌ هه‌مویانی ڕاگەیاندبو که‌ من توشی پێکان هاتوم،‌ له‌و کاته‌دا منیش له‌به‌رامبه‌ر هه‌مویان هه‌ستامه‌وه‌ و وتم : تۆ چی ده‌لێی ؟ پێکان مانای چیه‌ ؟ مه‌به‌ستت چیه‌ له‌و قسانه‌ ؟ ئه‌ویش وه‌لامی منی دایه‌وه‌ : ئه‌وه‌ تۆ چی ده‌لێی ؟ چۆن ده‌توانی وا به‌رامبه‌ر من قسه‌ بکه‌ی ؟ تۆ توشی پێکان هاتویت و ئێمه‌ش ده‌توانین بێ تۆ یاری کۆتایی ئه‌نجام بده‌ین.

منیش وه‌لامم دایه‌وه‌ : تۆ ئه‌وه‌ ده‌لێی له‌به‌ر ئه‌وه‌ی تۆ منت ناوێ...

لەدوای ئەم وەڵامە ڕاهێنەرەکەم‌ هیچی تری نه‌ووت، ته‌نها ئه‌و وای ده‌بینی که‌ پێکراوم و یاریم پێ ناکرێت، منیش وا هه‌ستم کرد که‌ شتێکی شاراوه‌ هه‌یه‌ له‌ بارودۆخه‌که‌ من نازانم ئه‌و شته‌ چیه‌ ؟ یاری کۆتایی ئه‌نجام داو منیش له‌ په‌یژه‌کانه‌وه‌ سه‌یری ئه‌م یاریه‌م کردوو ناخۆشترین ساته‌کانی ژیانم بوو بۆیه‌ له‌دوای ئه‌م یاریه‌وه‌ بروام به‌تواناکانی خۆم نه‌ما و تووشی داڕوخان هاتم ...

به‌لێ من بڕوا به‌خۆبونم له‌ده‌ستدا و هه‌رده‌م به‌خۆم ده‌وت: رێگریه‌ک هه‌یه‌ وام لێده‌کات بوه‌ستم له‌ ژیان، به‌لام دواتر له‌گه‌ل ئاواته‌کانی خۆم ده‌ژیام و هه‌ستم ده‌کرد یاریزانێکی پیشه‌گەرم له‌م ته‌مه‌نه‌ بچووکه.

بۆ نمونه‌: له‌ وانه‌ی زمانی ئیتاڵی کاتێک مامۆستا ده‌ریده‌کردم له‌ پۆل، پێم ده‌وت : مامۆستا تۆ خه‌مت نه‌بێت کاتێک که‌ ده‌بمه‌ ئه‌ستێره‌یه‌کی گه‌وره‌ له‌ خولی ئیتالی فێری زمانی ئیتالی ده‌بم.

له‌وکاته‌دا ئه‌وه‌ چه‌ند وشه‌یه‌کی بێ مانا و پێکه‌نیناوی بوو که‌ من درکاندم و باوه‌ریشم پێ نه‌ده‌کرد، چۆن ده‌توانم ببمه‌ ئه‌ستێره‌یه‌ک له‌ کاتێکدا که‌ من یاریزانێکی بێ توانام‌ له‌ یانه‌یه‌کی لاوان؟

دەرفەتێک بۆ تیپی یەکەمی مالمۆ

ئیبرا باسی ده‌رفه‌تێک ده‌کات که‌ ئه‌و ده‌یتوانی بچێته‌ تیپی یه‌که‌می مالمۆ و ده‌لیت : له‌و کاته‌دا تیپی یه‌که‌می مالمۆ توشی کێشه‌یه‌کی گه‌وره‌ هاتبوو باوکم پێشتر بۆمی باس ده‌کرد که‌ له‌ ساڵی حه‌فتا‌کان مالمۆ تیپیکی یه‌کجار گه‌وره‌و به‌ناوبانگ بووە، ئه‌و تیپه‌ باشترین تیپ بوو له‌ ولاته‌که‌مان ته‌نانه‌ت جارێکیان گه‌یشته‌ یاری کۆتایی خولی یانه‌ پاله‌وانه‌کان و وه‌ خولی ئه‌وروپی، به‌لام له‌و کاته‌دا یانه‌که‌ پشتی نه‌ده‌به‌ست به‌ یاریزانی لاو، به‌ڵکو یاریزانی ئه‌ستێره‌ی ده‌هێنایه‌ ریزه‌کانی له‌ یانه‌ گه‌وره‌کانی ئه‌وروپاوە.

به‌لام له‌وساڵه‌دا بارودۆخه‌که‌ ته‌واو جیاواز بوو مالمۆی تیپی یه‌که‌م گه‌یشتبووه‌ لوتکه‌ی ئاست خراپی و نه‌هامه‌تی، زۆری نه‌مابوو له‌ ناو بچێت، بارودۆخی ئابوری یانه‌که‌ زۆر خراپ بوو ته‌نانه‌ت بری ئه‌و پاره‌یه‌شی نه‌بوو که‌ هیچ یاریزانێک بکرێت له‌ ده‌ره‌وه‌ی سویدوە، تاکه‌ چاره‌سه‌ر بۆ ده‌رباز بوون له‌م قه‌یرانه‌ بۆ یانه‌کهمان‌ پشت به‌ستن بوو به‌ یاریزانی ناو‌خۆ و تیپی لاوان (ئەو تیپەی زلاتانی تێدابووە) ئه‌م روداوه‌ش وای له‌ ئێمه‌ کرد که‌ هه‌موومان وه‌ک شێتمان لێ بێت و هه‌رده‌م بیرمان ده‌کرده‌وه‌ که‌ ده‌بیێت کێ هه‌لبژێرن بۆ تیپی یه‌که‌م ؟ من یاخو ئه‌و هه‌ریه‌کێکمان وا بیرمان ده‌کرده‌وه‌ .

لێره‌دا ده‌وه‌ستین ئایا خه‌ونه‌که‌ی ئیبرا دێته‌ دی به‌ یاریکردنی بۆ تیپی یه‌که‌م ؟ یاخود ته‌نها چیرۆکیکی ئه‌فسوناوی ئیبرایه‌ له‌ کاروانی وه‌رزشی ئه‌ودا ؟ کامه‌ یاریزان خه‌ونی سویدیه‌کانه‌ ؟ چاوه‌روان بن ......


ئه‌م بابه‌ته 2295 جار خوێنراوه‌ته‌وه‌‌

PM:07:28:02/01/2016



Copyright 2015. xelk.org. All Rights Reserved.
Created by:kurdsky.com