من زلاتانم: لەناو (سەلاجە)کەشدا ماددەی هۆشبەرم دۆزییەوەو یاریزان نەبومایە، دەبوم بە پیاو کوژ

من زلاتانم: لەناو (سەلاجە)کەشدا ماددەی هۆشبەرم دۆزییەوەو یاریزان نەبومایە، دەبوم بە پیاو کوژ


وەرگێڕانی/ کاروان کەریم مەحمود

له‌ به‌شی پێنجه‌می من زلاتانم زلاتان باسی جه‌نگه‌کانی کرد و ئه‌و کاریگه‌ریانه‌ی که‌ له‌سه‌ر باوکی هه‌یبووە، له‌م به‌شه‌شدا باسی ژیانی خۆی ده‌کات له‌ مالی دایکی و باوکی و ئه‌و جیاوازیه‌ی که‌ له‌ نێوانیان هه‌ی.ه‌

ئیبرا باس له‌و جیاوازیه‌ ده‌کات که‌وا له‌ نێوان مالی دایکی و باوکی هه‌یه‌ و ده‌لێت: له‌گه‌ل باوکم، ته‌نها من و باوکم بوین له‌ماڵەوە، به‌لام لای دایکم ماله‌که‌ وه‌ک میهرەجان وابو، کۆمه‌ڵێک خه‌لك ده‌هاتنه‌ مالی دایکم و ده‌رۆشتن ماڵەکە هه‌رده‌م ده‌نگه‌ ده‌نگی تیابو، دایکم ماڵه‌که‌ی گواستەوە بۆ نهۆمی پێنجه‌م له‌ هه‌مان بینا له‌ شه‌قامی کرونمانس له‌سه‌رو مالی پورم (حنیفه‌)، له‌وێ من و کیکی و سانێلا زۆر هاوڕێ بوین و له‌سه‌ر هه‌مووشتیك ڕێکده‌که‌وتین.

خوشکەکەی بازرگانی ماددە هۆشبەرەکانە

ئێبرا باس له‌و کێشانه‌ ده‌کات که‌ له‌ مالی دایکی بونی هەبووە و دەنوسێت: ته‌نانه‌ت له‌ مالی دایکیشم کێشه‌ هه‌بو زڕ خوشکه‌که‌م کاری مادده‌ هۆشبه‌ره‌کانی ده‌کرد، ئەمەیش دڵه‌ڕاوکێ و دودڵییه‌کی زۆری بۆ دایکم دروست کردبو، هه‌ر کاتێک له‌ده‌رگا ده‌درا یاخود زه‌نگی ته‌له‌فون لێی ده‌دا دایکم ده‌ترسا و هاواری ده‌کرد: ئه‌وه‌نده‌ کێشه‌ به‌س نیه‌ که‌ توشت کردووین؟ ئێستا ده‌ته‌وێت چ کاریکی تر بکه‌یت؟ رۆژێکیان ده‌رگای ساردکه‌ره‌وه‌که‌م کرده‌وه‌ بینیم هه‌ندێك مادده‌ی هۆشبه‌ری تێدایه‌، من له‌و کاته‌دا توشی شۆك بوم و بانگی براکه‌مم کرد و هاوارم کرد: ئه‌ی خوایه‌ گیان مادده‌هۆشبه‌ره‌کان له‌ نێو ساردکه‌ره‌وه‌، خوشکم له‌و کاته‌دا هات و هه‌وڵیدا دایکم ئارام بکاته‌وه‌ و وتی: ئه‌و کارانه‌ هیچ نین، دوودڵ مه‌به‌، دایکیشم پێی وت: ئه‌وه‌ کارێکی شێتانه‌یه‌ که‌ تۆ ئه‌نجامی ده‌ده‌یت، ئه‌و کارانه‌ی خوشكم زۆر کاریگه‌ری هه‌بو له‌سه‌ر دایکم.

کێشه‌ی مامه‌ڵه‌کردن به‌ مادده‌ هۆشبه‌ره‌کان کاریگه‌ریه‌کی یه‌کجار گه‌وره‌ی هه‌بو له‌سه‌ر خوشکم، زیاتر له‌ جارێک له‌ نه‌خۆشخانه‌ مایه‌وه‌، به‌لام دوای ده‌رچونی له‌ نه‌خۆشخانه‌ هه‌مان کاری ده‌کرده‌وه‌ و خۆیشی نه‌یده‌توانی واز له‌ به‌کارهێنانی مادده‌ هۆشبه‌ره‌کان بهێنێت، هه‌رده‌م کێشه‌ هه‌بوو له‌ نێوان خوشكم و دایکم له‌ کۆتایدا ئه‌نجامه‌که‌ی ئه‌وه‌ بوو که‌ خوشکم ماڵی به‌ جێهێشت و بریاریدا به‌ ته‌نها بژی.
رۆژیکیان بیرم دێت که‌ له‌ ماڵه‌که‌ی کۆمه‌لێک له‌ مادده‌ هۆشبه‌ری وه‌ک کۆکاین هه‌بوو، له‌و کاته‌دا که‌ رۆژی له‌دایک بونی من بوو، ئاهه‌نگێکی بۆ سازکردم به‌و بۆنه‌یه‌وه‌ و دیاریشی بۆ کڕیم، ئه‌و که‌سێکی نه‌رمونیان و دڵسۆز بوو، له‌و رۆژه‌دا من ویستم بچمه‌ سه‌ر ئاو، به‌لام ئه‌و رێگه‌ی لێگرتم و وتی: نانا زلاتان تۆ مه‌چۆره‌ ئه‌وێ، پاشان خۆی چووە توالێتەکە و پاکی کرده‌وه‌، له‌و کاته‌دا هه‌ستم کرد که‌ ئه‌و مادده‌ هۆشبه‌ره‌کان له‌وێ هه‌لده‌گرێت، بیرم کرده‌وه‌ که‌ ئه‌وه‌ یه‌کێکه‌ له‌ ئاره‌زووه‌کانی هه‌روه‌ک چۆن منیش ئاره‌زوو ده‌که‌م ببمه‌ بایسکیلسوار، یاخود یاریزانی تۆپی پێ و خه‌ونی من ئه‌وه‌بو به‌ناوبانگ بم هاوشێوەی محەمه‌د عه‌لی کلای و بروس لی.

"سوڵتانی تۆپی پێ" باس له‌ یه‌کێک له‌ پاڵه‌وانه‌کان ده‌کات که‌ ناسیویه‌تی و ده‌ڵێت: باوکم برایه‌کی هه‌بوو ناوی صباح الدین بوو، له‌ یوگوسلافیا نیشته‌جێ بوو، نازناوی "سابکۆ" بوو، ئه‌و یاریزانێکی بۆکسێن بوو توانایه‌کی زۆری هه‌بوو، خه‌لاتی ڕادیشی به‌ده‌ست هێنا له‌سه‌ر ئاستی یانه‌ و هه‌روه‌ها له‌گه‌ل هه‌لبژارده‌ی یوگوسلافیا چه‌ندین خه‌لاتی جۆراوجۆری به‌ده‌ست هێناوه‌، به‌لام له‌ سالی 1967 کاتێک ویستی له‌ یه‌کێک له‌ مه‌له‌ونگه‌کان مه‌له‌ بکات، نه‌یتوانی و له‌ نیو ئاوەکەدا خنکا، ئه‌وه‌ کاره‌ساتێکی گه‌وره‌ بوو بۆ باوکم و خێزانه‌که‌ی، پاش مردنی ئه‌م برایه‌ی، باوکم بووه‌ یه‌کێک له‌ ئاره‌زومه‌ندانی یاری بوکسێن و چه‌ندین کاسێتی ئه‌م یاریه‌ی هه‌بوو، به‌ڵام کاسێته‌کانی تایبه‌ت نه‌بون به‌ صباح الدین، به‌لکو یاریه‌کانی محمد علی کلای و فوریمان، مایک تایسن و کۆمه‌لێك له‌ یاریزانی تری تێدا بوو، باوکم کۆمه‌لێک فلیمی بروس لی و جاکی شانی هه‌بوو .

ئیبرا ده‌گه‌رێته‌وه‌ بۆ رۆژی له‌دایک بونی و ده‌ڵێت: پاش ئاهه‌نگه‌که‌ ئێمه‌ کۆبوینه‌وه‌ و له‌ به‌رامبه‌ر ته‌له‌فزیۆن دانیشتین، به‌لام ئێمه‌ تەماشای که‌ناله‌ سویدیه‌کانمان نه‌ده‌کرد و پاره‌ی سه‌یر کردنی ئه‌و که‌نالانه‌مان پێنه‌بوو، له‌ ژیانیکی جیاواز ده‌ژیاین، له‌و کاته‌دا هیچ که‌سێکم نه‌ده‌ناسی که‌ پاڵه‌وانی سوید بێت نه‌ ئینجیمار، ستینمارک، هتد... نه‌مده‌زانی ئه‌وانه‌ کێن؟! به‌لام که‌سێکی وه‌ک محمه‌د علی کلای چۆن نایناسم! ئه‌و دیارده‌یه‌ک بوو به‌ شێوه‌یه‌کی جوان یاری ده‌کرد و هه‌موو خه‌لکێکیش باسی ده‌کرد.

له‌ شاره‌که‌ی ئێمه‌ زۆر که‌س ده‌ژیان، خه‌ڵکانێکی جیاواز هه‌بون و چه‌ندین نه‌ته‌وه‌ پێکه‌وه‌ ده‌ژیان، ده‌بوایه‌ زۆر ئاگاداری خۆمان بین، چونکه‌ چوارده‌وره‌که‌مان هه‌مو که‌سانی بێگانه‌ بون و باش نه‌مانده‌ناسین، ئه‌و شاره‌ی ئێمه‌ به‌وه‌ به‌ناوبانگ بوو که‌ شارێکی هه‌مه‌جۆر و چه‌ندین ڕەگەز و نەتەوەی تێدا ده‌ژیا، ده‌بوایه‌ خۆت بپارێزی له‌ هه‌ندێک که‌س که‌ هه‌میشه‌ ئاره‌زوی شه‌ڕکردنیان هه‌بوو، ئێمه‌ وه‌ک گه‌نجانی ڕۆزینگارد زۆر له‌ خۆبایی بوین، هه‌ر کارێکمان بویستایە ده‌مانکرد ئه‌مه‌ش به‌هۆی ئه‌وه‌ بوو که‌ ئه‌م شاره‌مان به‌ شاری خۆمان ده‌زانی و هه‌ستمان ده‌کرد ئه‌و نه‌ته‌وه‌ جیاوازانه‌ی که‌ تیدا ده‌ژین لەئێمە نین.

ئیبرا باس له‌ قۆناغێکی تری ژیانی ده‌کات و ده‌ڵێت: من چومه‌وه‌ لای باوکم و بڕیارمدا جارێکی تریش له‌گه‌ل ئه‌و بژیم، هه‌رده‌م دره‌نگ ده‌گه‌ڕامه‌وه‌ بۆ ماڵه‌وه‌، چونکه‌ ده‌چومه‌ لای دایکم و له‌ ته‌ندروستی دلنیا ده‌بومه‌وه‌ و که‌ ده‌گه‌رامه‌وه‌ ناچار ده‌بووم که‌ زۆر به‌ پێ برۆم، ده‌بو به‌سه‌ر شه‌قامی ئه‌دمیراڵ برۆم که‌ نزیک بوو له‌ پردی ئینیلود، له‌و شوێنه‌دا باوکم پێش چه‌ند ساڵێک بە ئوتۆمبێلەکەی توشی ڕوداوی هاتوچۆ هاتبو و بریندار ببو، بۆیه‌ کاتیک به‌سه‌ر ئه‌و شه‌قامه‌ ده‌رۆشتم زۆر به‌ په‌له‌ ده‌ڕۆشتم و گوێبیستی ترپه‌کانی دڵم ده‌بوم... تا ده‌گه‌ڕامه‌وه‌ زۆر ماندو ده‌بوم.

ڕۆژیکیان له‌گه‌ڵ باوکم و سانێلا چوین بۆ مه‌له‌وانگه‌، به‌ڵام دواتر من ئه‌وانم جێهێشت و چومه‌ لای هاوڕێکانم، که‌ گه‌ڕامه‌وه‌ باران ده‌باری و منیش له‌و کاته‌دا نه‌مده‌زانی چی بکه‌م، بۆیه‌ چومه‌ سه‌ر شه‌قام راوه‌ستام تاوه‌کو بارانه‌که‌ خۆش‌ی کردە‌وە، من هه‌موو له‌شم ببوه‌ ئاو و نه‌خۆش که‌وتم ... توشی تایه‌کی به‌رز بوم و پله‌ی گه‌رمیم زۆر به‌رز بۆوە ته‌نانه‌ت نه‌مده‌توانی له‌سه‌ر جێگاکه‌م بجولێم، باوکم ده‌هات و یارمه‌تی ده‌دام، راسته‌ باوکم زۆری ده‌خوارده‌وه‌ و هه‌رده‌م سه‌لاجه‌که‌شمان به‌تاڵ بوو، به‌لام له‌ ڕوداوی ئاوادا باوکم وه‌ک شێر بوو و هه‌رده‌م هه‌ولی ده‌دا منداله‌کانی بپارێزێت، باوکم له‌و کاته‌دا ته‌کسیه‌کی هێناو منی له‌ باوه‌ش گرت و خستمیە نێو ته‌کسیه‌که‌ و شۆفێرەکە ئافره‌ت بوو، پێی وت: ئه‌وه‌ منداڵی منه‌ و روح و گیانی منه‌، هه‌موو شتێکی منه‌، دەبێت به‌زووترین کات بمانگه‌یه‌نیته‌ نه‌خۆشخانه‌ و له‌ هیچ نیشانه‌یه‌کی مرور رامه‌وه‌سته‌، من پاره‌ی هه‌موو سزاکانی مرور ده‌ده‌م، شوفێری تاکسیه‌که‌ به‌گوێی باوکمی کرد و پێچه‌وانه‌ی یاساکانی هاتوچۆی کرد و لە ره‌نگی سوری دا تاکو گه‌شتینه‌ نه‌خۆشخانه‌ی مالمۆ له‌ به‌شی مندالان، له‌وێدا زۆر به‌خێرایی چاره‌سه‌ری منیان کرد، من پێم وابوو که‌وا حالی من زۆر خراپه‌ و هه‌رگیز چاک نابمه‌وه‌، به‌ڵام دکتۆره‌کان به‌ په‌له‌ چاره‌سه‌ری منیان کرد و باوکیشم له‌ ام بوو، له‌ رۆژی دواتر له‌ کاتژمێر پێنجی به‌یانی نه‌خۆشخانه‌مان جێهێشت و ته‌واو چاک بومه‌وه‌، به‌لام تاکو ئێستاش نازانم هۆکاری توش بونم به‌و نه‌خۆشیه‌ چی بوو.

ئێبرا ده‌ڵێت: له‌و کاته‌دا من نه‌مده‌زانی خواردنی ته‌ندروست و ڤیتامیندار چییه‌، چونکه‌ منداڵێکی هه‌ژار بوم، ئاشکرایه‌ که‌ مندالی هه‌ژار نازانن هێز و توانا و ڤیتامین چیه‌، هه‌رده‌م پێمباش بوو بچم له‌سه‌ر شه‌قام پیاسه‌ بکه‌م نه‌وه‌ک له‌ ماله‌وه‌ دابنیشم، به‌راستی بۆمن ساڵێکی زۆر قورس بوو، باوکم هه‌ندێک جار زۆر باش و نه‌رمونیان بوو هه‌ندێک جاریش زۆر توڕه‌بوو، هه‌ندێک جار به‌ منی ده‌وت: ئێبرا کوڕه‌که‌م ده‌بێت له‌گه‌لم بمێنێته‌وه‌ له‌ماڵەوە، هه‌ندێک جاریش به‌ توره‌یی پێی دەوتم: نه‌فره‌تت لێ بێت.

ئیبرا به‌رده‌وام ده‌بێت له‌سه‌ر باس کردنی روداوه‌کانی مندالی و ده‌ڵێت: ڕۆژێکیان له‌گه‌ل باوکم چوم بۆ کۆمپانیای (ئیکا) بۆ ئه‌وه‌ی سه‌رینێک بکڕم، به‌لام لێره‌دا کێشه‌مان ئه‌وه‌بوو که‌وا باوکم هه‌ستی نه‌ده‌کرد که‌ من گه‌وره‌ بووم، بیرم ده‌کرده‌وه‌ که‌وا چۆن ئه‌و کێشه‌یە چاره‌سه‌ر بکه‌م؟ باوکم ئه‌ورۆژه‌ سه‌رینی له‌ ژێر سه‌رم دانا بۆ ئه‌وه‌ی بزانێت بۆ سه‌ری من ده‌بێت یاخود نا، باوکم هه‌ندێك جار زۆر باش بوو له‌گه‌لم، بۆخۆی منی ده‌گه‌یاندە قوتابخانه‌، ته‌نانه‌ت له‌ قوتابخانه‌ش هه‌موو هاورێ و مامۆستاکانم ڕێزی باوکمیان ده‌گرت و خۆشیان ده‌ویست .

"ئەگەر یاریزان نەبومایە دەبوم بە پیاوکوژ"

له‌وانه‌یه‌ ئێستا لێم بپرسن ئەگه‌ر من یاریزان نه‌بومایه‌، ده‌بوم به‌ چی؟ من هیچ بوچونێکم نیه‌ بۆ ئه‌م پرسیاره‌، به‌لام له‌و باوه‌ڕه‌دام ده‌بوم به‌ پیاو کوژ، چونکه‌ له‌و کاته‌دا له‌ مالمۆ تاوان کردن باوبوو، من له‌و کاته‌دا که‌سێکی دز بووم ته‌نها بایسکیڵم نه‌ده‌دزی، به‌لکو ده‌چومه‌ شوێنه‌ بازرگانیه‌کان و له‌وێش دزیم ده‌کرد، ئه‌وه‌ی منی زیاتر دلخۆش دەکرد باوکم به‌و کاره‌ی منی نه‌ده‌زانی، ڕاسته‌ ئه‌و ده‌خواته‌وه‌، به‌لام لای ئه‌و هه‌رده‌م رێسا و یاسا هه‌بوو پێ ی وابو پیاو نابێت دزی بکات ته‌نانه‌ت ئه‌گه‌ر بۆشی رێك بکه‌وێت ئه‌وا حه‌ز ده‌کات له‌سه‌ری هه‌موو پیاوێک بدات که‌وا دزی ده‌کات.
بیرم دێت رۆژیکیان له‌گه‌ل یه‌کێک له‌ هاوڕێکانم له‌ فیلسیز دزیمان کرد و بری 1500 کورونمان دزی، به‌لام له‌ ناکاو توشی کێشه‌ بوین و یه‌کێک له‌ هاوڕێکانی باوکم یارمه‌تی دام که‌وا له‌م کێشه‌یه‌ رزگارم بێت، ترسام ئه‌و په‌یامێک به‌ باوکم بگه‌یه‌نێت و به‌ باوکم بلێت زلاتان که‌سێکی دزه‌، به‌ڵام من زوو چومه‌ لای ئه‌و هاوڕێیه‌ی باوکم و تکام لێکرد که‌ بابه‌ته‌که‌ له‌ باوکم بشارێته‌وه‌ و ئه‌ویش رازی بوو... ئه‌م جاره‌ش به‌ختم هه‌بوو و باوکم به‌و کاره‌ی منی نه‌زانی.

بەکارهێنانی ماددە هۆشبەرەکان

زلاتان باس له‌ به‌کارهێنانی مادده‌ هۆشبه‌ره‌کان‌ ده‌کات و ده‌ڵێت: تاکه‌ شت که‌وا له‌ ژیانی خۆم زۆر پێم باش بوو ئه‌وه‌ بوو که‌ زۆر ڕقم له‌ به‌کارهێنانی مادده‌ هۆشبه‌ره‌کان ده‌بویه‌وه‌، به‌ته‌واوه‌تی من له‌گه‌ل ئه‌م دوو شته‌ پێچه‌وانه‌بوم، هه‌رگیز هیچ شێکی وام به‌کارنه‌هێناوه‌، ته‌نانه‌ت رقم له‌و بیره‌یه‌ش بوو که‌وا باوکم ده‌ی خوارد و ئه‌و جگه‌ره‌یه‌ش که‌ دایکم ده‌یکێشا، من له‌گه‌ل ئه‌م دوو شته‌ تەواو ناکۆک بوم، هه‌رگیز ئه‌و شتانه‌م به‌کارنه‌ده‌هێنا تاکو ته‌مه‌نم گه‌یشته‌ 17 و 18 ساڵ، له‌و ته‌مه‌نه‌ش وه‌ک هه‌ر هه‌رزه‌کارێك بۆ جارێک تاقیمکرده‌وه‌، پاشان هه‌رگیز نه‌مخواردۆته‌وه‌ ته‌نها ئه‌گه‌ر له‌ بۆنه‌ تایبه‌ته‌کان نه‌بێت، دواترین جار که‌ من خواردمه‌وه‌ ئه‌و کاته‌بو که‌ له‌گه‌ل یوڤانتۆس خولی ئیتاڵیامان به‌ده‌ست هێنا ئه‌وکاته‌ تریزیگێ ناچاری کردم که‌وا کاسێک بخۆمەوە.

ئیبرا ده‌ڵێت: من و سانێلا توانیمان کۆنترۆلی کیکی برامان بکه‌ین، ئه‌و نه‌ مه‌شروبی ده‌خوارده‌وه‌ و نه‌ جگه‌ره‌شی ده‌کێشا، ئێمه‌ هه‌رده‌م چاودێریمان ده‌کرد و ئاگاداری بوین، گرنگیه‌کی تایبه‌تمان ده‌دا به‌ برا بچوکه‌که‌مان، سانیلا زۆر له‌گه‌ل کیکی باش بوو هه‌رده‌م به‌ شێوه‌یه‌کی نه‌رمونیان مامه‌ڵه‌ی له‌گه‌ل ده‌کرد و یارمه‌تی ده‌دا، له‌ کاره‌کانی منیش هه‌روا یارمه‌تیم ده‌دا ته‌نانه‌ت هه‌ندێک جار من لێی توڕه‌ ده‌بوم و هاوارم دەکرد بەسەریدا، ته‌نانه‌ت له‌ ئێستاشدا زۆر جار به‌سه‌ر منداله‌کانم ماکسی و فینسیت هاوار ده‌که‌م و لێیان توره‌ ده‌بم.

ئیبرا باس له‌ که‌سایه‌تی خۆی ده‌کات و ده‌ڵێت: راستیه‌ک هه‌یه‌ نابیت له‌ بیری بکه‌م ئەویش ئه‌وه‌یه‌ من که‌سێکی سه‌یرم! زۆر حه‌زم له‌ پابه‌ندبونه‌، به‌ڵام هه‌ندێک جاریش خۆم پابه‌ند نابم به‌ شته‌کان ئه‌وه‌ فه‌لسه‌فه‌ی منه‌ له‌ ژیان، هه‌رگیز له‌و که‌سانه‌ نیم ته‌نها به‌ قسه‌ کاربکه‌م واته‌ هه‌رگیز من نالێم: من باشترینیم تۆ کێیت؟ هه‌رگیز وا نیم، له‌و که‌سانه‌ نیم که‌وا قسه‌کانم به‌سه‌ر خه‌ڵكی ده‌وروبه‌رم بسه‌پێنم، هه‌رگیز من قسه‌ی بێ مانا ناکه‌م هه‌روه‌ک چۆن ئه‌ستێره‌ کانی هه‌لبژارده‌ی سوید ده‌یکه‌ن، هه‌رده‌م حه‌زده‌که‌م باشترین که‌س بم، به‌لام نامه‌وێ‌ له‌خۆبایی بم، بیر له‌وه‌ ناکه‌مه‌وه‌ که‌ من ئه‌ستێره‌یه‌کی نمونه‌ییم ئه‌ی خوایه‌ گیان... من خه‌ڵکی رۆزینگاردم، له‌وانه‌یه‌ له‌به‌ر ئه‌وه‌ بێت وا هه‌ست ده‌که‌م، له‌وانه‌یه‌ که‌سێکی شێت بم وه‌ زۆریش له‌ خۆبایی بم، به‌لام که‌سایه‌تیه‌کی باشم هه‌یه‌.
هه‌رگیز له‌ کاتی دیاریکراودا نه‌ده‌چوم بۆ قوتابخانه‌، به‌لام هه‌رده‌م ئه‌رکه‌کانم جێ به‌ جێ ده‌کرد، هه‌ندێک جار زۆر باش بوم و له‌ وانه‌ی بیرکاری نمره‌یه‌کی باشم ده‌هێنا، به‌لام نازانم له‌به‌ر چی هه‌رده‌م مامۆستاکه‌م گومانی لێده‌کردم و وای هه‌ست ده‌کرد من قۆپیه‌ ده‌که‌م؟! پێیان وابوو مندالێکی وه‌ک من ناتوانێت ئه‌و نمره‌ باشه‌ بهێنێت و ته‌نها بۆ ئه‌وه‌ باشم له‌ قوتابخانه‌ ده‌ربکرێم، له‌گه‌ل ئه‌وه‌شدا من هه‌رده‌م باش خۆم ئاماده‌ ده‌کرد بۆ تاقیکردنه‌وه‌کان، به‌لام ئه‌وه‌ی که‌ ئه‌مرۆ ده‌مخوێند به‌یانی له‌ بیرم ده‌کرد!

ئیبرا زیاتر ده‌لێت: من ساڵێکی زۆر زه‌حمه‌ت و ناخۆشم به‌سه‌ر برد، هه‌رده‌م له‌ گه‌ره‌کێک ده‌چوینه‌ گه‌ره‌کێکی تر و منیش هه‌رده‌م ده‌گوێزرامه‌وه‌ له‌ قوتابخانه‌یه‌ک بۆ قوتابخانه‌یه‌کی تر، مامۆستاکان به‌ منیان ده‌وت: پێویسته‌ تۆ له‌م قوتابخانه‌یه‌ بگوازرێیته‌وه‌، ئه‌وه‌ به‌ هۆی ئه‌وه‌ نه‌بوو که‌ من پابه‌ندی یاساکان نه‌بوم، به‌ڵکو ده‌یانویست له‌ ده‌ست من رزگاریان بێت، بۆیه‌ من چه‌ندین قوتابخانه‌ی جیاوازم کردوه‌ و تاکه‌ کێشه‌م په‌یداکردنی هاوڕێ بوو، هه‌رده‌م وشه‌ی ناخۆش و شه‌ڕانیم به‌کار ده‌هێنا به‌رامبه‌ر به‌ قوتابیان، به‌ڵام دواتر بیرم کرده‌وه‌ که‌ پێویسته‌ گرنگی به‌ خۆم بده‌م و واز له‌ کێشه‌کانی ماڵه‌وه‌ و خێزانه‌که‌م بهێنم.

وه‌ک ده‌زانن ئێمه‌ له‌ ژیانێکی زۆر ناخۆش و گران ده‌ژیاین، خوشکم که‌سێک بوو که‌ خوی به‌ مادده‌ هۆشبه‌ره‌کان گرتبوو و ئه‌م کاره‌ش بووه‌ هۆی لێکدابرانی له‌گه‌ل دایکم، هه‌رده‌م خوشکه‌که‌م چاره‌سه‌ری به‌کار ده‌هێنا، به‌لام دواتر ده‌گه‌رایەوه‌ سه‌ر هه‌مان کار، ته‌نانه‌ت زڕ خوشکه‌که‌ی ترم وازی له‌ خێزانه‌که‌مان هێنا و له‌ ئێمه‌ جیابویه‌وه‌، دایکیشم زۆر به‌ ئاسانی ئه‌وانی له‌ ژیانی خۆی دوورخسته‌وه‌، من له‌و کاته‌دا نه‌مزانی هۆکاره‌که‌ چیه‌؟ دواتر بۆم ده‌رکه‌وت که‌ خوشکم له‌گه‌ل کوڕێکی یوگوسلاڤی په‌یوه‌ندی هه‌بووە و دایکیشم به‌م کوڕە ڕازی نه‌بوو، ئه‌مه‌ش بووه‌ هۆی دروست بونی کێشه‌ له‌ نێوان خوشكم و دایکم، به‌م شێوه‌یه‌ خوشکه‌که‌م وازی له‌ئێمه‌ هێنا و بریاریدا به‌ته‌نها بژی، ئه‌مه‌ش کارێکی ئاسایه‌ و ڕوداوی وا له‌ سه‌رتاسه‌ری جیهان روده‌دات، ته‌نانه‌ت له‌ ئێستاش هه‌ر به‌رده‌وامه‌.

ئیبرا له‌ کۆتایی به‌شی شه‌شه‌م ده‌ڵێت: ئه‌وه‌ یه‌که‌م کێشه‌ی ئێمه‌ نه‌بوو له‌ خێزانه‌که‌ماندا، به‌لام دایکم زۆر شانازی به‌م کاره‌ی ده‌کرد له‌ دواتردا هه‌ستم به‌وه‌ کرد، هه‌رگیز ئه‌و هه‌موو کێشانه‌م له‌ بیر ناچێت که‌وا له‌م چه‌ند ساڵه‌دا توشی بوم، ئێمه‌ پێنج مندال بوین له‌ ماڵی دایکم، به‌لام له‌ دواتردا ته‌نها سێ منداڵ ماینه‌وه‌، ئه‌مه‌ش بەهۆی جێهێشتنی ماڵ له‌لایه‌ن دوو زڕ خوشکه‌که‌م، ته‌نها من و سانێلا و کیکی ماینه‌وه‌، به‌لام دوای 15 سال منداڵی خوشکەکەم په‌یوه‌ندی پێوه‌ کردین، به‌لێ خوشكم مندالێکی هه‌بو ناوی "جیت" بوو، ئه‌و په‌یوه‌ندی کرد و له‌ ته‌له‌فون به‌ دایکمی وت: سڵاو داپیره‌ ... به‌لام دایکم نه‌یناسی و زۆر به‌ ئاسانی پێی وت: ئه‌و ژماره‌یه‌ت هه‌ڵه‌ لێداوه‌ و ته‌له‌فونه‌که‌ی داخست .. له‌و کاته‌دا من زۆر دڵخۆش بوم، ناتوانم به‌ ته‌واوی هه‌سته‌کانم ده‌رببرم به‌رامبه‌ر مندالی خوشكم و شانازیم پێوه‌ ده‌کرد وه‌ له‌سه‌ر منیش پێویسته‌ که‌وا شانازی به‌وه‌ بکه‌م که‌ تۆپی پێم هه‌لبژارد له‌ ژیانی خۆمدا ...


کۆتایی به‌شی شه‌شه‌م... په‌نا به‌خوا له‌ به‌شی حه‌وته‌مدا باسی سه‌ره‌تای ئاشنابوونی زلاتان ده‌که‌ین به‌بواری وه‌رزش و تۆپی پێ.


ئه‌م بابه‌ته 1511 جار خوێنراوه‌ته‌وه‌‌

PM:04:13:19/12/2015



Copyright 2015. xelk.org. All Rights Reserved.
Created by:kurdsky.com