بەڕێوەبەری سایلۆ لەبارەی گەنم و پارەوە دەدوێت
       
بەڕێوەبەری سایلۆ لەبارەی گەنم و پارەوە دەدوێت

ئامادەكردنی: هۆشیار عەلی 

ساڵی 2015 بەرەو كۆتای دەچێت و هێشتا پارەی گەنمی ساڵی 2014 بەشێكی جوتیاران دابەشنەكراوە، بەڕێوەبەری سایلۆی سلێمانیش دەڵێت، تا ئێستا زیاتر لە 50 ملیار دیناری جوتیاران بۆ ساڵی 2014 ماوە، لە چاوپێكەوتنێكی (تۆڕی میدیایی خه‌ڵك) بەڕێوەبەری سایلۆی سلێمانی ( ئەمین محەمەد) چەند زانیاریییەك ئاشكرا دەكات.

خەڵك: بارودۆخی هەرێم كاریگەری لەسەر ئیشی سایلۆ كردووە ؟
ئەمین محەمەد: نەخێر، ئەمساڵ زۆرترین گەنم وەرگیراوە لە سنوری پارێزگای سلێمانی كە 261 هەزار تۆنە، هیچ ساڵێك ئەوەندە وەرنەگیراوە، هیچ جوتیارێكیش نەماوە گەنمی لێ‌ وەرنەگیرێت،

خەڵك: گەنمی گۆڕەپانەكان چی لێ‌ هاتووە، بەرنامەتان هەیە بیگوزانەوە تا كاتی باران تەڕ نەبێت ؟
ئەمین محەمەد: ژمارەیەكی زۆر بارهەڵگر لە بەغدادەوە هاتووە و دەستیان كردووە بە گواستنەوەی گەنمی گۆڕەپانەكان بۆ ناو سایلۆ كۆنەكەی شاری سلێمانی، گەنمیش دەدرێت بە ئاشەكان.

خەڵك: جوتیاران باس لەوە دەكەن بەهۆی باران بارینەوە گەنمێكی زۆر خەسار دەبێت ؟
ئەمین محەمەد: ڕاستە، عەیبەیە بۆ حكومەتێك دوای 24 ساڵ هێشتا گەنم لە گۆڕەپانەكان هەڵدەگیرێت، لە شاری كەلار لە گۆڕەپانەكان وەردەگیرێت، لە هەڵەبجە و سیروان لە كارگەی پەتاتەكە دانراوە، سەیدسادق لە گۆڕەپانەكەی سەراوی سوبحان ئاغا دانراوە، لە ڕانییە لە گۆڕەپانەكانی فەرماندەیی دانراوە، بەس ئەمساڵ دوو سایلۆ تەواو بوو ،پیرەمەگرن 80 هەزار تۆن گەنم وەردەگرێت، سەیدسادق 40 هەزار تۆن، سایلۆی ڕانییە و چەمچەماڵ لە تەواو بوندان كە هەر یەكەی 40 هەزار وەردەگرن.

خەڵك: چەند تۆن گەنم لە سایلۆكاندا هەڵگیراوە لەو 261 هەزار تۆنە ؟
ئەمین محەمەد: 80 هەزار لە سایلۆی پیرەمەگرون و 40 هەزار لە سایلۆی سەیدساق، 160 هەزار تۆن ماوەتەوە لە ناو گۆڕەپانەكان بووە، ئێستا گۆڕەپانەكانی ڕانیە هەمووی هەڵگیراوەتەوە هیچی لە بەر باران نەماوە، سەیدسادق كەمێكی ماوە.

خەڵك: هیچ شوێنێكی تر هەیە كە  گەنمی لێ‌ هەڵبگیرێت تا ئەو گەنمەی لە دەرەوەیە تەڕ نەبێت لە بەر باران ؟
ئەمین محەمەد: ئەمساڵ ژمارەیەك بانكەر كە لە شێوەی حەوزدایەو بە شێوەیەكی زانستی دروست دەكرێت و گەنمی لێ‌ هەڵدەگیرێت بۆ  سنوری پارێزگای سلێمانی دابینكراوە، شەش بانكەر بۆ كەلار و 5 بۆ هەڵەبجە، هەر بانكەری 5 هەزار تۆن گەنم دەگرێت.

خەڵك: بۆچی پێش باران بارین دەست بە داپۆشنی گەنم ناكەن ؟
ئەمین محەمەد: ناكرێت، چونكە ئێمە لە 15ی ئەیلولەوە دەست بە داپۆشینی گەنم دەكەین، ئەگەر پێش ئەوە دایپۆشین ئەوە گەنمەكە حەشەرات دروست دەكات، چادرەكەش بۆن دەكات.

خەڵك: پارەی گەنمی ساڵی ڕابردوو چی لێ‌ هات ؟
ئەمین محەمەد: كڕینەوەی گەنم لە ئەستۆی بەغدادە، ئەو پارەیە ئەویش دەیدات، پارێزگای سلێمانی بڕی 52 ملیار دینار پارەی گەنمی ساڵی 2014 ماوە دابەشی بكات بەسەر جوتیاران.

خەڵك: نەدانی پارە بە جوتیاران بەهۆی كێشەی هەرێم و بەغدادەوەیە ؟
ئەمین محەمەد : پارەی جوتیاران هیچی پەیوەندی بە كێشەی هەرێم و بەغدادەوە نیە، ئەمە پارەی سیادییە، ساڵانە بۆ كڕینەوەی گەنم دادەنرێت، داواشم لە نوێنەرانی كورد و فواد مەعسوم كردووە قسەیان هەبێت لە بارەی پارەی گەنمی جوتیارانی هەرێم.

خەڵك: مژدەت پێ یە بۆ جوتیاران ؟
ئەمین محەمەد: بەپێی هەق و یاسا بێت، پارەی گەنمی ساڵێك ناچێتە ساڵێكی تر، بەڵام ئەوەی پێمان بكرێت دەیكەین، حكومەتی هەرێمیش دەبێت بە هەموو هێزیەوە هەوڵ بدات، ئەندامە كوردەكان بە تایبەتی بەدواداچوون بكەن.

بەڕێوەبەری گشتی سایلۆی سلێمانی گلەیی ئەوەی كرد لە بارانی پێشوو ڕاگەیاندنەكان بڵاویانكردەوە كە بڕی 11 هەزار تۆن گەنم تەڕبووە، بەڵام ئەو ڕەتی كردەوە هیچ گەنم تەڕبووبێت، ناوبراو ئەوەشی وت: "پێویستە ڕاگەیاندن بەدواداچوون بكات، نەك زانیاری نادروست بڵاوبكاتەوە".

ئەم بەرنامەیە هاوكارمان ژیان سان، لە ڕادیۆی خەڵك پێشكەشی دەكات.

PM:01:59:17/10/2015

ئه‌م بابه‌ته 1484 جار خوێنراوه‌ته‌وه‌‌
زیاتر ...
Copyright 2014. xelk.org. All Rights Reserved.
Created by:kurdsky.com