شێركۆ جەودەت: ئاگامان لە داهاتی نەوت ‌و گاز نییە
       
شێركۆ جەودەت: ئاگامان لە داهاتی نەوت ‌و گاز نییە

دیمانە- هۆشیار عەلی

سەرۆكی لیژنەی سامانە سروشتییەكانی پەرلەمانی كوردستان ڕایدەگەیەنێت، تەنها لە ڕێگەی ڕاپۆرتەكانی وەزارەتی سامانە سروشتییەكانەوە ئاگاداری فرۆشتنی نەوتین، (شێركۆ جەودەت) لە چاوپێكەوتنێكی (تۆڕی میدیایی خەڵك) وەڵامی چەندین پرسیاری گرنگ دەداتەوە.

خەڵك: ئێستا نەوت چۆن دەفرۆشرێت، ئاگاداری فرۆشتنی هەن ؟
شێركۆ جەودەت: تەنها لە ڕێگەی ئەو ڕاپۆرتانەی كە وەزارەتی سامانە سروشتییەكان مانگانە بڵاوی دەكاتەوە، كە هەرێم لە ڕێگەی بۆریەكانەوە دەیفرۆشێت.

خەڵك: گرێبەستەكەی حكومەتی هەرێم لەگەڵ كۆمپانیاكە كە نەوت بەرامبەر دۆلارە، بەردەوامە ؟
شێركۆ جەودەت: بەڵێ‌، ئێستاش ئەو گرێبەستە بەردەوامە لە نێوان حكومەتی هەرێم كە هەفتانە بڕی 200 ملیۆن دۆلار لەو كۆمپانیا وەردەگرێت، هەروەها ئەو كۆمپانیاش لە بەرامبەردا نەوت لە هەرێم وەردەگرێت، بەڵام نەمان بیستووە كە ئەگەر گرێبەستەكە وەستابێت یان نا.

خەڵك: كەوایە بۆچی مووچە دابەش ناكرێت ؟
شێركۆ جەودەت: ئێستا داهاتی نەوت و گاز دەدرێتە وەزارەتی دارایی، دەبێت ئەو وەڵامی ئەوە بداتەوە، بەڵام ئومێد هەیە.

خەڵك: ئەو پارەی كە حكومەت لەو كۆمپانیایەی وەردەگرێت، لە كوێ دەیگۆڕێتەوە بە دینار، ڕۆژانە چەند دەگۆڕێتەوە ؟
شێركۆ جەودەت: ئاگاداری ئەوە نین، ئیشی ئێمە نییە، ئەوەی بە لای ئێمەوە گرنگە مووچە لە كاتی خۆی بدرێت و دوانەكەوێت.

خەڵك: چەند كۆمپانیا لە هەرێم مۆڵەتی دەرهێنانی نەوتیان پێدراوە ؟
شێركۆ جەودەت: تەنها 22 كۆمپانیا مۆڵەتی هەیە لە كوردستان نەوت دەربهێنێت.

خەڵك: پاڵاوگە نایاساییەكان چیان بەسەر هات ؟
شێركۆ جەودەت: بڕیارەكەیان بۆ دەرچووە، تەنها جێبەجێ‌ كردنی ماوە، هەندێكیان مۆڵەتیان پێدراوە كە مەرج و ڕێنماییە یاساییەكان جێبەجێ‌ بكەن، لە ماوەی یەك مانگدا، هەندێكیشان هەر مەرجیان تێدانەبووە، داخراون.

خەڵك: سندوقی نەوت و گاز بە كوێ‌ گەیشت ؟
شێركۆ جەودەت: ئەوە یەكێكە لەو پێشێلكارییە یاساییانەی كە ئەنجومەنی وەزیران ئەنجامی داوە، لە كاتێكدا دەبوو 10ی ئاب ناوی پاڵێوراوەكانی ڕەوانەی پەرلەمان بكردایە، بۆ دامەزراندنی ئەو دەستەیە، داواشمان لە سەرۆكایەتی پەرلەمان كردووە ڕێكاری یاسایی بگرێتە بەر بۆ ئەو پێشێلكارییە یاساییە.

خەڵك: دەڵێن بتڵی غازی ماڵان دوای یەك هەفتە بەتاڵ دەبێتەوە، بەدواداچونتان كردووە ؟
شێركۆ جەودەت: ئەو حاڵەتە هەبووە، شتێكی ئاساییە، كۆمپانیای پەیوەندیداریش دوای سیانە كردنەوەی دەستی كردووەتەوە بە بەرهەمهێنان و ئاسایی بووەتەوە.

خەڵك: دابەشكردنی نەوتی ماڵان زۆر بە خاوی بەڕێوەدەچێت، قسەتان لەگەڵ وەزارەتی ناوبراو كردووە ؟
شێركۆ جەودەت: ساڵی ڕابردووش لەگەڵ وەزارەتی سامانە سروشتییەكان قسەمان كرد، ئەمساڵیش قسەمان لەگەڵ كردوون كە دەبێت پێش وەرزی سەرما نەوت بدرێتە هاوڵاتیان، پرۆسەكە دەستی پێكردووە و خاو بەڕێوەدەچێت.

خەڵك: ئاگاداری كونكردنی بۆری نەوتی هەرێم بۆ توركیا هەن ؟
شێركۆ جەودەت: بابەتی كونكردنی بۆرنی نەوتی هەرێم بۆ توركيا قسەی وەزارەتی سامانە سروشتییەكانە، نەك لایەنێكی دیاری كراو، وەك لیژنەی سامانە سروشتییەكانی پەرلەمان تا ئێستا بە دواداچونمان نەكردووە بۆ كونكردنی بۆری هەناردەی نەوتی كوردستان بۆ توركیا.

خەڵك: كێ‌ بەرپرسیارە لە چاككردنەوەی ئەو بۆریە ؟
شێركۆ جەودەت: ئەو گرێبەستەی كە كراوە لەگەڵ كۆمپانیای بۆتاشی توركی، كە تایبەتە بە پاراستن و بەدەمەوەچونی ئەو بۆریەی كە لە هەرێمەوە دەچێتە ناو خاكی توركیا، هەر ئەویش بەرپرسیارە لە هەر شتێك یان سیانەكردنی ئەو بۆریە، نەك حكومەتی هەرێم كە مەسروفاتی بكات.

خەڵك: بەتەمای ئەوە نین سەردانێكی مەیدانی بكەن بۆ ئەو بابەتی كونكردنی بۆریە ؟
شێركۆ جەودەت: ئەگەر سەردانی مەیدانیش بكەین دەبێت لەگەڵ وەزارەتی سامانە سروشتییەكان بچین، لیژنەی سامانە سروشتییەكان ڕۆژی پێنج شەممە كۆبوونەوەی تایبەت دەبێت بۆ ئەو بابەتە و سەردانی مەیدانی لیژنەكەش تەوەرێكی دانیشتنەكە دەبێت.

خەڵك: زانیاریتان هەیە لەسەر ئەوەی كێ‌ ئەو بۆریە كون دەكات ؟
شێركۆ جەودەت: هیچ زانیاریمان نییە كە چ لایەنێك بەرپرسیارە لەو ڕووداوە، وتەبێژی پەكەكەش ڕەتی كردووەتەوە بەرپرسیاریەتی ئەو ڕووداوەیان هەبێت.

AM:09:07:30/09/2015

ئه‌م بابه‌ته 1338 جار خوێنراوه‌ته‌وه‌‌
زیاتر ...
Copyright 2014. xelk.org. All Rights Reserved.
Created by:kurdsky.com