نامەیەكی كۆنی نەوشیروان مستەفا بڵاو كرایەوە
       
نامەیەكی كۆنی نەوشیروان مستەفا بڵاو كرایەوە
خەڵك – بەشی هەواڵ

نامەیەكی نەوشیروان مستەفا بۆ شاعیری كۆچكردووی كورد شێركۆ بێكەس بڵاودەبێتەوە، كە لە ساڵی 1989 نوسیوێتی‌و باس لە دۆخی ئەوكاتەی ناوچەكە دەكات، هاوكات چەند پێشنیارێكیش دەخاتە بەردەم شێركۆ بێكەس بۆ ئەوەی لێكۆڵینەوەی وردی لەسەر بكات بە تایبەت لە بارەی شیعرو ئەدەبی كوردی.

دەقی نامەكە لە ئەكاونتی نوسەر كامەران سوبحان وەرگیراوە، كە بەوتەی خۆی سەرقاڵی كۆكردنەوەی هەموو ئەو نامانەیە، كە لە نێوان شێركۆ بێكەس‌و بەشێك لە سیاسی و نوسەر‌و رۆشنبیران ئاڵوگۆڕ كراوە.

ئەمەش دەقی نامەكەیە:.

برای بەڕێزم كاكە شێركۆ سڵاوێكی گەرم

هیوادارم هەمیشە لە خۆشیدابن، بە پەرۆشەوە هەواڵتان ئەپرسم، دەستی شەفیقە خان ماچ ئەكەم، سڵاو لە نەسرین خان ئەكەم، ئومێدەوارم هەڵۆ و مناڵەكان تەندروست و سەركەوتوو بن.
ئەگەر پرسیاری هەواڵی ئێمە ئەكەیت، ماوین و ئەیگوزەرێنین، بەڵام بە داخەوە بە ئەنجامێكی ناخۆش گەیشتین، گەلەكەمان لە هەلومەرجێكی سەخت و نالەباردا ئەژی، دیارە خۆت ئاگاداری كوێرەوەری خەڵكی كوردستانن، هەموومان ئێستا لە بیركردنەوەی ئەوەداین كە بۆ درێژەپێدانی خەبات، ئەبێ چی بكەین؟ شێوەكانی خەبات، ڕێگەكانی خەبات، یاخود (عەقڵیەت)ی جۆری خەبات و ئامانجەكانی؟ من خۆم هێشتا لەسەر شتێكی دیاریكراو ساخ نەبوومەتەوە، دیارە پەلەكردنیش باش نییە، بەهەرحاڵ بەهەر شێوەیەكی ممكن بێ و بە هەر جۆرێكی لە توانادا بێ درێژە بە كار ئەدەین و هەندێ ڕێگەو شوێنمان بۆ داناوە، تازە هەموو لایەكیان پێیان وایە دەبێ هەوڵبدرێ بۆ چارەسەری سیاسی، شێخ ڕەزا گوتەنی تازە ئەچێ بۆ بەصرە، ئیستە تەركیز لەسەر ئەوەیە لێی نائومێد نیم و ئومێدی زۆریشم پێی نییە، بە كورتی ئەمە دیمەنی نوێی بۆچوونەكانی ناوەوەیە
با لەوەش گەڕێین، بە هیوا بووم یەكتری ببینین، بەڵام ڕێ نەكەوت، ڕەنگە لەو ڕۆژانەدا سەرێكی شام بدەم، نازانم چەند ئەمێنمەوە، دوای ئەوە ئەگەڕێمەوە ئێران یاخود بۆ ئەم ناوە دێمەوە، چونكە چاوەڕوانی قسەی برادەرانم.
بە چاكم زانی پێشنیارێكت بۆ بنێرم، كە لام وایە كارێكی گرنگ ئەبێ خۆت ئەزانی شیعری ئێستای كوردی كە هەندێ قۆناغی بزووتنەوەی نەتەوەیی كوردا گرنگییەكی گەورەی هەبووە، چ لە دەربڕین و داڕشتنی هەندێ لە ئاوات و ئارەزووەكانی گەلەكەمان و دیاریكردنی لایەنی دیكەی، وە چ لە هاندانی خەڵكدا بۆ خەبات، لام وایە ئەگەر بەشێكی كاتی خۆتی بۆ تەرخان بكەیت، ڕەنگە باشترین كەس بی كە لە لێكۆڵینەوەی درێژو زانستی لەو بارەیەوە ئامادە بكەی، بە تایبەتی لە باری ئێستای ژیانی ئێستادا فرسەتێكی وا هاتۆتە پێشەوە لەوانەیە پاش ماوەیەكی تر دانەمێنێ.
پێشنیارەكەی من بە كورتی ئەمەیە:
دەوری شیعری كوردی لە بزووتنەوەی نەتەوەیی كوردا لەمەشدا 4 قۆناغی مێژوویی بكرێتە نمونە لە فەترەیەكی دیاریكراودا.
قۆناغی یەكەم 1918 – 1925: سەردەمی شێخ مەحمود لە دروستكردنی حكومەتی كوردستانی جنوبی و ئینجا تێكچوونی.
شاعیرەكانی ئەو سەردەمەش بەرهەمەكانیان مەعلومە
- قۆناغی دووەم جمهوریەتی مەهاباد
شاعیرەكانی ئەو سەردەمەش مەعلومن، زۆربەی بەرهەمەكانیان لە ڕۆژنامەی كوردستان و گۆڤارەكانی ئەو سەردەمەدا هەیە، كاك مەحمود لایەتی ئەتوانی لێی وەرگریت.
- قۆناغی سێیەم 1958 – 1961 كوردستانی عێراق یەكێك لە شاعیرەكانی خی.
- قۆناغی چوارەم 1970 – 1975 
بێگومان ئەمە هەر پێشنیارە، بەڵام من خۆم بەلامەوە زۆر گرنگەو بكرێت ئەبێ كە بەرهەمێكی وا بنوسرێ، و دڵنیام فیكری كوردی زۆر دەوڵەمەند دەكات.
ئەهمیەتی شیعر لە مێژووی نوێی گەلەكەماندا دەرئەخات.
بە نیسبەت خۆمەوە خەریكی نوسینی باسێكی درێژم لەسەر نوسیوەو خەریكی بەشەكانی تری ئەبم، هەرچەند فرسەتم هەبێ هەوڵ ئەدەم خەریكی بم، هەوڵ ئەدەم باسێكی سیاسی و فیكریی و وەسائق بێ، وە دەری دەخەم پێوەندی كوردو دەرەوە چۆن بووە، غەڵەتی سیاسەتی خارجی كوردی، نوقتەی زەعیف و چی بوون و چی ئەم هەمیشە دژی مەسەلەی كورد بوون و دەرئەنجام ( تەفسیری خۆم)
دووبارە سڵاوی بێئەدازەم هەیە بە ئومێدم لە هەلێكی ترا بە دیدارت شاد بم، هەمیشە لە خۆشیدابی.





AM:11:16:06/03/2016

ئه‌م بابه‌ته 1895 جار خوێنراوه‌ته‌وه‌‌
زیاتر ...
Copyright 2014. xelk.org. All Rights Reserved.
Created by:kurdsky.com