نووسەری بێتام
       
نووسەری بێتام
ئاسۆ عەبدوللـەتیف

• نووسەری بێتام ستایلی خۆی دەگۆڕێت و ئەنواع جلی ناشیرین دەپۆشێت تا وەك جیاواز خۆی نمایش بكات گوایە كەسێكی مۆدێرنە بەڵام لەناوەوەی خۆیدا هەڵگری دەیان خەسڵەتی ڕەجعی و كلاسیكە.

• كە بەرپرسێك دەبینێ دەڵێ هاوڕێمەو ملی سەد نوسەر دەشكێنێ بۆ وێنەیەكی سێڵفی لەگەڵیداو ئەمەش ناودەنێ كرانەوەو دیالۆگ.
• لە تیڤی دەڵێی هەموو پیاوی ئەون قاچی خستۆتەسەرقاچ وباسی بێموچەیی و برسێتی و گەندەڵی دەكات، كەچی لە چاخانەی شەعب دەڵێ ئەو ڕۆژە دەعوەتی كابرا بوین بەڕاستی مونفەتیح و مونەوەرەو وەك ئەوانی تر نییە!
• جارجار دەقێكی شیعری كرچ و كاڵ بڵاو دەكاتەوە تابڵێت سەربە جیلی شێركۆو بەختیارو شاعیرانی سەردەمم.
• هەندێك بەرگی كتێبی قەبەو نوسەری ڕۆژئاوایی پۆست دەكات گوایە خوێندنەوەی بۆكردووە.
• عەیب ناكات وەك بەرپرسان باخ و ڤێلای هەیەو باسی گەندەڵیش دەكات لە سەرتیڤی و ڕۆژنامەكان.
• زۆر دەنوسێت و زۆریش موجامەلە دەكات و هەرلەفیس بووك لەیەك دێڕدا چەندین هەڵەی ڕێنوس و ڕێزمان و ئیملایی هەیە.
• زۆر وێنەی پڕۆفایل دەگۆڕێت و تەقلیدی قەبیحی باش و مەزهەبی خراپ دەكات.
• لەیەك كاتدا خۆی دەكات بە لێكۆڵەرو ڕۆژنامەنوس و چاودێرو شارەزاو مێژونوس.
• وادەزانێت سیاسی ئەوەیە لەگەڵ سیاسی وێنە بگرێت و بڵێت فڵان بەرپرس ڕۆژێ وای پێ وتم و منیش ووتم دەبوو واتان بكردایە.
• وادەزانێت دنیا چاوی لەسەر ڕەئیەكانی ئەوە، دەڵێت من كاتی خۆی ئەمەم وت و بەپڕۆژەش پێشكەشم كردوە.
• زۆریش باسی تێزو لۆژیك و گوتاری عەقلانی و سەفسەتە دەكات.
• زۆر دەنوسێت و یەك وتار دەكات بە شەش قاژو هەر قاژێك و لەسایتێك بڵاو دەكاتەوە.
• نوسەر كە بێتام بوو زنجیری لەملكردو ماكیاژی كردو گرنگی بە فۆڕمدا لە بری ناوەرۆك و حەزیشی لە دەمانچەی دیاری كرد!!، باشترە كتێب و مەعریفەو كولتور تەڵاق بدات و بڕوات كارێكی تر بدۆزێتەوە.



ئه‌م بابه‌ته 271 جار خوێنراوه‌ته‌وه‌‌
AM:08:41:15/03/2016
Copyright 2014. xelk.org. All Rights Reserved.
Created by:kurdsky.com