ڕوسیا هۆكاری جێهێشتنی سوریای ئاشكرا كرد

ڕوسیا هۆكاری جێهێشتنی سوریای ئاشكرا كرد


خەڵك-سەعد مەلا عەبدوڵڵا گوڵپی

هێزەكانی ڕوسیا لە ماوەی 7مانگی ڕابردوودا هێرشیان دەكردە سەر چەكدارانی داعش لە سوریا و تەنگیان پێیان هەڵچنیبوو، لە ئەنجامدا بە فەرمانی (ڤیلادیمیر پۆتین) خەریكی كشانەوەن لە خاكی سووریا.

(ڤیلادیمیر پووتین) سەرۆك كۆماری ڕوسیا لە مانگی سێپتەمبەری ساڵی ڕابردوو واتە نزیك بە 7 مانگ لەمەو پێش، فەرمانی هێرشی ئاسمانیی وڵاتەكەی بۆ سەر بنكە و مۆڵگەی چەكدارانی داعش دەركرد، ئەم فەرمانە پاش داواكاری فەرمیی دەوڵەتی دیمەشق بۆ دەستێوەردانی سەربازی ڕوسیا دەركرا.

دەستێوەردانی سەربازیی ڕوسیا لە سووریا گەرچی بە شێوەیەكی تەواو یاسایی و بەپێی داواكاریی فەرمیی دەوڵەتی دیمەشق ئەنجام درابوو، بەڵام شەپۆلێكی بەربڵاو لە ڕەخنەی رۆژئاواییەكان و ویلایەتە یەكگرتووەكانی ئەمریكای بە دوای خۆیدا هێنا، رۆژئاواییەكان و بە تایبەت ئەمریكییەكان كە بە پشتیوانیی دارایی و سەربازی خۆیان لە چەكدارانی داعش لە ماوەی ساڵانی ڕابردوو وەك هۆكاری سەرەكیی درێژخایەنی قەیرانی سووریا دێنە ئەژمار، بە پێی هەمان سیاسەتی ناسراوە و هەمیشەیی (بانێك و دوو هەوا)ی خۆیان ڕوسیایان كردە ئامانجی ڕەخنە بەربڵاوەكانیان و ئەو وڵاتەیان وەك لەمپەرێكی جدی لەسەر رێگای بەدیهێنانی ئاشتی لە سوریا ناساند، بەڵام ڕوسیا بەبێ گوێدان بە ڕەخنەكانی ئەمریكا و رۆژئاوا، ئۆپەراسیۆنێكی بەربڵاوی لە دژی داعشییەكان لە سووریا دەستپێكرد.

ئەم دەستێوەردانە سەربازییە پاش ئەوە دەستیپێكرد، سوریا لە لایەكەوە لە لایەن فرۆكەكانی هاوپەیمانی نێودەوڵەتی دژەداعش بە سەركردایەتیی ئەمریكا كرابووە ئامانجی هێرشە بەربڵاوەكان و لە لایەكی دیكەوە داهشییەكانیش رۆژ بە رۆژ پەرەیان بە هەوڵە تیرۆریستییەكانی خۆیان لە دژی سوپا و جەماوەری سڤیلی سووریا دەدا.

دەستێوەردانی سەربازیی ڕوسیا لە سوریا و ئۆپراسیۆنی ئەم وڵاتە دژی داعش بووە هۆی ئەوەی كە تەواو نەخشەكانی ئەمریكا و هاوپەیمانانی ناوچەیی بە تایبەت عەرەبستانی سعوودی و توركیا بەرەڕووی شكست بێتەوە.

راستییەكەی ئەوەیە ئەمریكا و هاوپەیمانانی رۆژئاوای و عەرەبیی هەوڵیان دەدا دوو سیناریۆی پڕمەترسیی داڕێژراوی خۆیان لە سوریا جێبەجێ بكەن:

1.تاقەت پڕووكێنكردنی شەڕی ناوخۆیی لە سوریا بە مەبەستی لاوازكردنی سوپای ئەم وڵاتە بە چەشنێك كە بەشار ئەسەد چیتر توانای مانەوەی لەسەر دەسەڵاتی سوریا نەبێت.

2.ئامادەكردنی بەستنی لەبار بۆ ئەنجامدانی ئۆپەراسیۆنی سەربازیی ڕاستەوخۆ لە دژی دەوڵەتی دیمەشق.

فرۆكەكانی ڕوسیا لە لایەكەوە بە هێرشی ئاسمانیی وردبینانە بۆ سەر تەنكەرەكانی گواستنەوەی نەوتی دزراوی داعش لەسەر رێگای سووریا بۆ توركیا، زیانێكی قەرەبوونەكەرەوەیان لە بازرگانیی ئەنقەرە لەگەڵ ئەو گرووپە تیرۆریستییە دا و لەلایەكی دیكەوە بە هێرشی خۆیان بۆ سەر پارێزگای لازقیە رێگرییان كرد لە پەرەسەندنی نفووزی سەربازیی توركیا لەو ناوچەیە.

تووڕەیی دەوڵەتی ئەنقەرە لە ئۆپراسیۆنی سەربازیی ڕوسیا لە سوریا بە ڕادەیەك بوو كە سوپای توركیا لەوپەڕی ناباوەریدا فرۆكەیەكی شەڕكەری ڕوسیای بە بیانووی پێشێلكردن و بەزاندنی ئاسمانی ئەو وڵاتە كردە ئامانج و خستییە خوارەوە.

جگە لەوە عەرەبستانی سعوودی یەكێكی دیكە لە لایەنە بەشداربووەكان لە سوریایە كە بە دوای دەستێوەردانی سەربازیی ڕوسیا لە سوریا زیان و پێكانێكی قورسی پێ‌گەیشتووە.

ئۆپراسیۆنی سەربازیی ڕوسیا لە سوریا لە پەنای ئامادەبوونی ڕاوێژكارانەی ئێران و بەشداریی هێزەكانی حزبوڵڵای لوبنان لە شانی سوپای ئەو وڵاتە ڕۆحێكی تازەی وەبەر هێزەكانی سووریا هێنا و هاوسەنگی دەسەڵاتی بە سوودی دیمەشق گۆڕی، سوپای سوریا بە پشتیوانییە بەربڵاوەكانی هاوپەیمانانی خۆی توانی لە ناوچە جۆراوجۆرەكانی ئەو وڵاتە پێشڕەوییەكی بەربڵاو مسۆگەر بكات. 

گۆڕانی هاوكێشەی دەسەڵات لە سووریا پاش ئۆپراسیۆنی سەربازیی ڕوسیا لەو وڵاتە دەستكەوتێكی گەورەی بۆ دیمەشق بە دواوە بوو كە بریتییە لە (ناچاركردنی ویلایەتە یەكگرتووەكانی ئەمریكا لە دەست هەڵگرتن لە كردەوەی سەربازییە ڕاستەوخۆ و ناڕاستەوخۆكانی لە دژی دەوڵەتی دیمەشق و دانیشتنی سەر میزی دانوستان و لە ئەنجامدا جێگیركردنی ئاگربڕ لە سووریا).

بەو پێیە، ڕوسیا پاش وەدیهێنانی ئامانجە پلان بۆ داڕێژاوەكانی خۆی لە ئۆپراسیۆنی سەربازیی لە سوریا، كۆتایهێنا بە ئامادەبوونی لەو وڵاتەدا (نەك بەشێوەی یەكجاری) ئامانجگەلێك كە گرنگترینیان لاوازكردنی دەسەڵاتی چەكدارانی داعش و ناچاركردنی هاوپەیمانەكان لەسەر مێزی دانوستان.

لە هەر حاڵدا، (ڤیلادیمیر پووتین) سەرۆك كۆماری ڕوسیا فەرمانی دەرچوونی بەشێكی زۆری هێزەكانی ئەو وڵاتە لە سوریا دەركرد و ئەوەش بەو مانایە نییە ڕوسیا بە گشتی واز لە شەڕ لە دژی چەكدارانی داعش بهێنێت، بێگومان لە داهاتووشدا پشتیوانیی ئاسمانی و دەریایی سوپای ڕوسیا لە ئۆپراسیۆنە سەربازییەكانی سوپای سووریا لە بەرانبەر داعشەكان درێژەی دەبێت.
ئاژانسی میهر


ئه‌م بابه‌ته 1008 جار خوێنراوه‌ته‌وه‌‌

PM:02:19:19/03/2016