قائیمقامی هەولێر وردەكاری كەمكردنەوەی نرخەكان ئاشكرا دەكات

قائیمقامی هەولێر وردەكاری كەمكردنەوەی نرخەكان ئاشكرا دەكات


هەولێر-ئارام سەردار

سەرۆكی لیژنەی باڵای پارێزگای هەولێر بۆ پاراستنی مافەكانی بەكاربەر و ژینگە ئاشكرای دەكات، كەمكردنەوەی نرخی سەرجەم شمەك و كاڵا و كرێ كراوەتە ڕاسپاردە و بۆ ئەوەی ئەنجومەنی پارێزگا پەسندی بكات و ئێمەش جێبەجێی بكەین، ماف پەروەر هێرش حسێن، كە لەهەمان كاتدا قائیمقامی هەولێرە بەوەكالەت لەدیمانەیەكی تایبەت لەگەڵ تۆڕی میدیایی (خەڵك) ڕایگەیاند، هەركەسێك سەرپێچی بكات لەجێبەجێ‌ كردنی بریارەكان ئیجرائاتی لەبەرامبەر دەكرێ‌ و جەختیشی لەوەكردەوە، كە بەهۆی قەیرانی دارایی تائێستا هیچ بەرنامەیەك دانەنراوە بۆ جەژنی نەورۆز.

خەڵك: دوای بڕیاری حكومەت لەسەر پاشەكەوتكردنی مووچە، چ هەنگاوێكتان ناوە بۆ رێكخستنەوەی شمەك و كاڵاكان لەگەڵ سەرجەم نرخەكانی تر؟

هێرش حسێن: دوای ئەو بڕیارە دەسەڵاتدار بەپارێزگاری شارەكان و لە هەولێریش ژورێكی هەماهەنگی دروست كرا، كە بەردەوام كۆبوونەوە دەكرێ‌ و بەرنامەكان بەسێ‌ ئاست جێبەجێ‌ دەكرێ‌، ئاستێكیان ژمارەیەك كەسی شارەزا وەك تیمی مەیدانی سەردانی بازاڕ دەكەن، ئاستی دووەم دانانی نرخ و ئاستی سێهەم جێبەجێ‌ كردنی بڕیارەكانی لیژنەی باڵاێ‌ پارێزگایە، ئێمەش وەك سەرۆكی ئەو لیژنەیە پێشتر و ئێستاش بەدواداچون لەسەر نرخ دەكەین، بەڵام ئێستا بەدواداچونەكانمان لەسەر نرخ بۆتە بابەتێكی سەرەكی و دوو لیژنەش دروست كراوە بۆ جێبەجێ‌ كردنی بڕیارەكان و خۆم سەرۆكی یەكێك لە لیژنەكانم، یەكەم هەنگاویشمان كار لەسەر هۆكارەكانی نرخ دابەزاندن دەست پێبكەین، ئەوەی لەبەردەستماندابوو، دوای دابەزینی نرخی سوتەمەنی نرخ هێڵەكانی گواستنەوەمان دابەزاند، كە هەموو نرخی هیڵەكانی ناوشاری هەولێر بوو بە 500 دینار، هەروەها نرخی هێڵی نێوان شارەكانیش كەمكرایەوە بەگوێرەی دور و نزیكی شوێنەكان، چونكە كاتێك نرخی گواستنەوە هەرزان بێت كاریگەری دەكات سەر نرخی ئەوانەی تر، بەرنامەی دوهەمیشمان چاودێری كردنی ئەو لیژنە كشتوكاڵیەی، كە نرخ بۆ بەرهەمە كشتوكاڵیەكان دادەنێن هەفتانە، بەدواداچون بۆسەرچاوەی بەرهەمەكان تا دەگاتە دوكانەكان دەكەین، لەگەڵ ئەوەشدا نرخی گەراجی وەستانی ئوتومبێل جێگیركرا بە هەزار دینار بۆ گەراجی كراوە و 2000 هەزار بۆ گەراجی ناوباڵەخانەكان، خاڵێكی تر كەمكردنەوەی نرخی ئەمپێری كارەبای موەلیدە بووە كە 1350 دینار كرا بە 1100 دینار، هەروەها بڕیار دەرچووە، كە لە 30% نرخ لەسەرجەم چێشتخانە و خواردنگە گەشتیاریەكان و میللیەكان دەبێ‌ دابەزێنرێ‌، لە 25% نرخی گرێبەستەكانی كڕین و فرۆشتن وەك ئوتومبێل و هەروەها كرێی باڵەخانە و شیرینەمەنیەكان دادەبەزێنرێ‌ و لە 30%یش نرخی شوشتنی ئوتومبێل، لەگەڵ ئەوەشدا لەكافتریاكان بڕێك پارە بەناوەی وەستانی ئوتومبێل وەردەگیرا وەرگرتنی ئەو پارەیە بەهیچ شێوەیەك نەماوە لەهەمان كاتیش نرخی گۆشتمان دیاری كردوە، كاری هەرە گرنگیش رێكخستنەوەی وەرگرتنی ئەو پارانە بوو، كە لەگوندەكان وەردەگیرا وەك پارەی خۆڵ و خاشاك و كارەبا و خزمەتگوزاریەكان و ئەمنیەت، ئێستا حكومەت خۆڵ و خاشاك هەڵدەگرێ‌ پارەوەرگرتن نەمان، پارەی كارەباش كەم دەكرێتەوە، پارەی ئەمنیەتیش واتە پاراستنی ئاسایش نەما، چونكە ئاسایشی شارەكان لەگەڵ ئەو گوندانە هیچ جیاوازیەكی نیە حكومەت ئاسایشی هاوڵاتیان دەپارێزێ‌، چونكە باری دارایی سەرجەم چینەكان دابەزیوە ئەگەر بازرگانیش بێت كەسەكە، بۆیە كارەكانی ئێمەش هەر دابەزاندنی نرخ نیە بەڵكو راگرتنی هاوسەنگیشە و پارێزگاری هەولێریش لیژنەیەكی پێكهێنان بۆ سەردانی خاڵی گومرگی حاجی ئۆمەران تاوەكو كارا بكرێتەوە و ڕۆتین كەمبكرێتەوە نرخی بارهەڵگرەكان كەمبكرێتەوە و رێگاش بدرێ‌ بەدەرە لەرێنماییە قورسەكان سوتەمەنی بێنن، لەمەشدا سەركەوتوبوین، بەگشتی بەرنامەكانی پارێزگای هەولێر بەرهەم لەناوبازار زیاتر بێت لەخواست و بازرگانیش دەبێ‌ قازانج بكات، بەڵام كەمتر لەجاران، ئەگەر پێشوتر 10 هەزاری قازانج كردبا ئێستا دەبێ‌ هەزار دینار بێت یان شتێكی كەم یان زیاتر بێت.

خەڵك: بەگوێرەی زانیاریەكان بەشێك لەخوێندنگە ئەهلیەكان بڕیاریانداوە پابەندنی دابەزاندنی نرخ نابن؟

هێرش حسێن: وەزارەتی تەندروستی و كاروباری كۆمەڵایەتی دەستیان بەكارەكان كردوە و ئێستا ئەوان رێژەیان دیاری كردوە بۆ داینگە و باخچەی ساوایان و سەنتەرەكان، بەڵام بەفەرمی بەدەستمان نەگەیشتوە، بەڵام تەنها ئەوە نەبێ‌ بۆ داینگە و باخچەی ساوایان لە 20% نرخ كەمدەكرێتەوە و سەنتەر و ئەو شوێنانەی، كە بۆ كەساتی پێداویستی تایبەتن لە 30% و بۆ خوێندنگەكانیش لە 25% نرخ كەم دەكرێتەوە.

خەڵك: كەی ئەم نرخانە دەچێتە بواری جێبەجێ‌ كردن؟

هێرش حسێن: سەرجەمی ئەو بڕیارانەی كەدراوە و پێمان گەیشتوە كراونەتە راسپاردە، ئێمە بەنوسراو داومانە بەئەنجومەنی پارێزگا بۆ ئەوەی پەسەندی بكات هەركاتێك وەڵام بدرێینەوە دەست بەكار دەبین بۆ جێبەجێ‌ كردنی بڕیارەكان، دوو ئەندامی ئەنجومەنیش ئەندامی لیژنەكەی ئێمەن لەدانانی نرخ و بەردەوامیش راپۆرتەكانمان دەبینن و ڕۆژانەش كارەكان كاری لەسەر دەكەن.

خەڵك: لەكاتی بەدواداچونتان لەسەر جێبەجێ‌ كردنی ئەو نرخانە، ئەگەر سەرپێچی هەبوو چ ئیجرائاتێك دەگرنە بەر بەرامبەر سەرپێچیكار؟

هێرش حسێن: ئیجرائاتەكانمان بەسێ‌ قۆناغە، یەكەم جار ئاگاداری دەكەینەوە و جاری دووهەم پێبژاردنی بۆدەكرێ‌ لە ملیۆنێك تا 5 ملیۆن دینار بەگوێرەی رێنماییەكان، جاری سێهەم، كە داواكاری گشتیش لەلیژنەكە لەگەڵمانە هەر كەسێك پابەند نەبێ‌ دەدرێتە داواكاری گشتی و دادگا سزای بەندكردنی بۆ دەردەچێ‌.

خەڵك: لەو لیژنە باڵایەی هەتانبوو چەند كەستان سزا داوە لەسەر سەرپێچی كردن؟

هێرش حسێن: ئێمە لەماوەی پێنچ كاتژمێری یەك ڕۆژ سەردانی 38 شوێن كراوە، سزا دراوە و بەگشتی لەماوەی دوو هەفتەی رابردوو سەردانی 100 شوێنمان كردوە لەشوێنی جیاواز و بەرنامەی جیاواز، تائێستاش هیچ حاڵەتێكی دوبارەبونەوەی سەرپێچیمان نەبووە.

خەڵك: لەراگەیەنراوێكی پۆلیسی شارەوانی 25 قومارخانە داخراون، ئایا ئەمانە بە چ مۆڵەتێك كرابونەوە، یان بەبێ‌ ئاگاداری حكومەت كراوەتەوە؟

هێرش حسێن: لەسەر فەرمانی وەزیری ناوخۆ و پارێزگاری هەولێر هەستاین بەداخستنی ئەوە 25 قورمارخانەیە، ئەو قومارخانانە بەمۆڵەتێك كاریان كردوە، كە پێی دەگوترا لۆتۆ كە ئەمەش مۆڵەت نیە بۆ كاركردن، چونكە قومارخانە بەگوێرەی یاسای عێراقی قەدەغە و رێگە پێ‌ نەدراوە، بەڵكو تەنها یانەسیب بووە، بەڵام سودیان لەم دەرفتە بینیوە و وەك قومارخانە كاریان كردوە و ئێمەش سەرجەمیمان داخست، بەدواداچونیشمان بەردەوام دەبێ‌.

خەڵك: وەك پارێزگای هەولێر هیچ بەرنامەیەك هەیە بۆ نەورۆزی ئەمساڵ؟

هێرش حسێن: بەداخەوە بەهۆی قەیرانی دارییەوە لەم بڕوایەدانیم، كە هیچ بەرنامەیەك هەبێ‌ بۆ جەژنی نەورۆز، بەڵام هێشتا كاتی ماوە نازانین هیچ شتێك دەكرێ‌ یان نا، بەڵام ئەوەی تائێستا هەیە هیچ بەرنامەیەك نیە جگە لەبەرزنرخاندنی خوێنی شەهیدان.

خەڵك: ئێستا سواڵكردن بۆتە دیاردەیەكی زۆر باو لەهەولێر، دواین بەرنامەتان بۆ رێگری لەم كارە چیە؟

هێرش حسێن: لەراستیدا ئەو خەڵكانە بونەتە گرفت بەتایبەت ئەوكەسانەی، كە ئاوارە و پەنابەرن، كە دێن لەسەر شەقامەكان كار دەكەین، پێشتر ڕوبەڕوی دادگامان دەكردنەوە، بەڵام لەبەرئەوەی زۆربەیان منداڵن لەیاساش ئاسانكاری هەیە، كە بەئازادی كاربكەن، بەڵام ئێستا بەبڕیاری پارێزگار لەكاتی دەستگیركردنی ئەوكەسانە دەگوازرێنەوە بۆ كەمپەكان و شوێنیان و سەرجەم خزمەتگوزاریەكانیان بۆ دابین دەكرێ‌، لەكاتی دوبارەكردنەوەشی سزا دەدرێ‌ بەگوێرەی یاسا.

خەڵك: وەك لیژنەكەتان ڕوبەروی چ گرفتێك بونەوتەوە لەكاتی بەدواداچونەكانتان؟

هێرش حسێن: ئەگەر كار بكەی گرفتت بۆدروست دەبێ‌، كاتێك سەرپێچی دەگری هاوڵاتیەكە ئەگەر بۆی بكرێ‌ بەهەموو شێوەیەك بەرگری لەخۆی دەكات چ بەناوزراندن یان تۆمەت دروست كردن بێت، بەتایبەت ئەو شوێنانەی كارەساتی تێدا دەبینین، بەنمونە كاتێك كەسێك موس دەفرۆشێت نرخی خۆی 5 هەزارە كەچی ئەو كەشە بە 500 دینار دەیفرۆشێت بەدڵنیاییەوە گومانی لێ‌ دەكەی، كە سەردانی دەكەی دەبینی ماوەی بەسەر چوونی 11 ساڵ بووە ئینجا فرۆشتویەتی و كۆگایەكی گەورەش بووە، بۆیە هاوڵاتیان دەبێ‌ لەم بەرهەمانەی لەسەر شەقامەكان دەیكڕن دڵنیا ببنەوە لەبەرواری بەسەرچوون، هەر لێرەشەوە هەموو هاوڵاتیان ئاگادار دەكەینەوە، كە كەسانێك گۆشتی سور لەسەر شەقامەكان دەفرۆشن بەهیچ شێوەیەك تەندروست نیە، چونكە بەقۆناغەكانی پشكنین تێناپەڕێت بەگوێرەی ستانداری سەربڕخانەكان، چونكە 53 نەخۆشی هاوبەش هەیە لەنێوان مرۆڤ و ئاژەڵ لەبەر ئەوە ئەو گۆشتانە تەندروست نین و هەركەسێكیش ببینین دەستگیری دەكەین و گۆشتەكەشی دەسوتێنین، هەرچەندە لەبەر بارودۆخی ئابوریش لەبەرچاو گیراوە، كە فەرمانبەر یان پێشمەرگە و پۆلیسە بووە لە شێخەڵا كاردەكات، نابین بەرێگر، بەڵام دەبینین كەسانی بیانی بەتایبەت عەرەبی عێراقی و سوری كار دەكەن و ئەم جۆرە كاڵایانە دەفرۆشن و كارەسات دروست دەكەن گوێیان لەژیانی هاوڵاتیانی ئێمە نیە بەڵام بەداخەوە UN كەمتەرخە، چونكە نابێ‌ پەنابەر و ئاوارە لەكەمپەكان بێنە دەرەوە تەنها بەمۆڵەت نەبێ‌ یان مۆڵەتی كاركردنی هەبێ‌، لەهەمان كاتیشدا كۆمەڵێك كەسی بارزگانی نابەرپرسمان هەیە بەرێگەی ئەو كەسانەوە كاڵاكانیان ساغ دەكەنەوە، لێرەشەوە داوا لەهەموو هاوڵاتیان دەكەین، كە لەكاتی هەر سەرپێچیەك پەیوەندی بەم ژمارانەوە بكەن و ئێمەش بەدواداچونی بۆ دەكەین (07504492718)، (07502224466) یاخود (07502224488).


ئه‌م بابه‌ته 19206 جار خوێنراوه‌ته‌وه‌‌

PM:08:23:04/03/2016