زۆر شت دەربارەی فیلمی<br> The Revenant

زۆر شت دەربارەی فیلمی
The Revenant

خەڵک- ژینۆ عەبدوڵڵا

ناوی فیلم: The Revenant

ئەكتەر: Leonardo DiCaprio- Tom Hardy

دەرهێنەر: Alejandro González Iñárritu

ماوەی فیلم: 156دەقیقە
جۆری فیلم: دراما-مێژوویی

یەكێكە لەبەهێزترین فیلمەكانی ئەمساڵ‌ و پاڵێوراوە بۆ ژمارەیەك خەڵاتی ئۆسكار لەوانە خەڵاتی باشترین فیلم‌ و باشترین دەرهێنەرو باشترین ئەكتەرو یاریدەدەری ئەكتەر.

ئەم فیلمە، هەرزوو بەدوو جۆر ناوبانگی بڵاوكردەوە، یەكەمیان هەر لەگەڵ تەواوبوونی مۆنتاژداو پێش بڵاوبوونەوەی لەسینەمادا دزراو بڵاوكرایەوە، دووەمیان لەكاتی بڵاوكردنەوەیەدا دەنگدانەوەی باشی لێكەوتەوە. سەبارەت بەوەی فیلمەكە واقیعیەو توانیویەتی بەشێوەیەكی هونەریی جوان‌و كوالێتی بەرز، بمانگێڕێتەوە بۆ سەدەكانی 19 و بەباشترین شێوەش بەرهەمهاتوە، هەربۆیە بەشی هونەریی رۆژنامەی نیویۆرك تایمز لەتویتەردا راپرسییەكی بڵاوكردەوەو لەلایەن دەرهێنەران‌و رەخنەگرانی سینەماوە پاڵێوراوە بۆ 12 خەڵاتی ئۆسكار.

لۆكەیشن
ئەم فیلمە لەكەشێكی سەهۆڵبەندان‌و سروشتی سەخت‌و بەفربارین لەباكووری كەنەدا وێنە گیراوە، دواتر ئەرژەنتین-یش بەشێوەیەك وەك دەرهێنەر ئاماژەی پێدەكات زۆرجار كەمترین رووناكی بەكاردەهات بەهۆی ئەوەی ژینگەو كەشوهەواكە لەبینەرەوە نزیك بێت‌و ئیكسسوارات‌و جلوبەرگ‌و شێوەو دەم‌و چاوی ئەكتەرەكان بەشێوەیەكە، بینەر واهەست دەكات لەسەدەی 19دایەو وەك دەرهێنەر دەڵێت؛ هەندێكجار بەهۆی كەشوهەواوە زیاد لەكاتی ئاسایی دیمەنەكانمان دووبارە دەكردەوە بۆئەوەی وەك خۆی‌و بێ كەموكوڕیی چیرۆكی رۆمانەكە بگوێزینەوە بۆ ساڵی 1823، كە لەنووسینی (مارك ئیل سمیپ)ـە.

خەونی ئۆسكار
رەنگە بێبەختترین هونەرمەند، كە تائێستا شەش جار پاڵێوراوە بۆ وەرگرتنی خەڵاتی باشترین ئەكتەر، لیوناردۆ دی كاپریۆ بێت، چونكە لەدوای فیلمی تایتانیك-ەوە، كە ئەستێرەی ئەم هونەرمەندە لاوە گەشایەوەو پاڵێوراوی سەرەكی بوو بۆ باشترین ئەكتەر لەساڵی 1998، بەڵام وەك دەرهێنەری فیلمی تایتانیك (جێمس كامیرون) ئاماژەیپێكرد، غەدری زۆر لە لیوناردۆ كراو بێ بەشكرا لەو خەڵاتەو بیانوی پسپۆڕانی هونەری حەوتەم ئەوەبوو لیوناردۆ نابێت بەهۆی جوانیەكەیەوە خەڵات وەربگرێت، بەڵكو دەبێت رۆڵەكەی بەجوانی بەرجەستە بكات.

هەروەك 11 جاریش پاڵێورابوو بۆ خەڵاتی گۆڵدن گلوب، بەڵام چوار جار بەدەستیهێناوە، كە دواجار لەماوەی رابردوودا بوو وەك باشترین ئەكتەری لەم فیلمەی كە باسی دەكەین.

لیوناردو دی كاپریۆ، كە ماوەی 20 ساڵە بەكاری هونەرییەوە خەریكە، لەدایكبووی ساڵی 1974-ەو سەرەتای كاركردنی وەك نمایشكارو مۆدێل كاری دەكردو دواتر رۆڵی لاوەكی پێدەدراو یەكەم فیلمیش، كە بەشداریكردووە ساڵی 1991 بووە.

لەم فیلمەدا، لیوناردۆ، كە پاڵێوراوی سەرەكیی خەڵاتی باشترین ئەكتەرە لە ئۆسكاردا، توانیویەتی لەو رەخنانە دەربچێت، كە لێی دەگیرا بەوەی تە نها بەهۆی جوانییەكەیەوە هەندێك رۆڵی رۆمانسی بەجوانترین شێوە بەرجەستە دەكات‌و زیاتر هونەرمەندێكی شكڵییە نەك ئەوەی بتوانێت هەموو رۆڵێك بەرجەستە بكات، بەڵام رۆڵی لەم فیلمەدا ئەوەندە بەهێزە ئەگەر بێتو راوچییەكەش زیندووبكەیتەوە، رەنگە نەتوانێت بەهێندەی ئەم رۆڵەكە بەجوانی‌و بێ گرێ‌وگۆڵ بگێڕێ.

ستایشی دەرهێنەر
دەرهێنەری فیلمەكە دەڵێت: "هەر لەكاتی وێنەگرتن‌و پرۆڤەی فیلمەكەداو بەتەواوی لەدوای كۆتاییهاتنی فیلمەكە، هەستم بەوەكرد لیوناردۆ دەبێتە باشترین ئەكتەر، چونكە زۆر خۆی ماندووكردو رۆڵەكەشی بەتەواوەتی بەرجەستەكرد، كە من هەرگیز لەو بڕوایەدا نەبووم".

بەرجەستەكردنێكی جوان
لیوناردۆ، كە لە هەندێك دیمەندا بەزمانی دانیشتووانی ئەو ناوچەیە قسە دەكات‌ و بەكەمترین ماوە فێری زمانەكە بووە، هەروەها لەكاتی برینداربوونی‌ و روبەڕوبونەوەی ورچەكەو كوشتنی كوڕەكەیدا، زۆر بەجوانی هەست‌ و سۆزو دەروونی تێكەڵی دیمەنەكان دەبێت‌ و بەشێوەیەك ئەدای رۆڵەكەی دەكات، دەڵێی راستییەو دەیەوێت هاوارو قسە بكات بۆ كوشتنی كوڕەكەی، بەڵام دەنگی دەرنایەت.

راهێنەری تایبەت
شێوازی چارەسەركردنی، لەبرینداربوونی‌و بەجێهێشتنی لەلایەن هاوڕێكانیەوەو خیانەتی هاوڕێیەكی لەكوشتنی كوڕەكەی‌و زیندەبەچاڵكردنی خۆی بەزیندوویی، لەو دیمەنانەن هەروا بەسانایی بەسەر بینەردا تێناپەڕن‌و دواتر چۆنێتی تیماركردنی خۆی بەگژوگیاو دەرمانی هندیە سوورەكان، دەرهێنەر دەڵێت: "داوای راهێنەری تایبەتمان كرد‌و دكتۆرێكیشمان بانگكرد، كە چۆن كەسێكی وا چارەسەر دەكرێت، ئەو پزیشكە خولێكی بۆ لیوناردۆ كردەوەو بەتەواوەتی راهێنانی پێكردو هەروەك داوای شارەزایەكیشی كرد لەبەكارهێنانی ئەو چەكەی ئەو سەردەمە بۆئەوەی هیچ خاڵێكی نێگەتیڤی تیا نەبێت‌و رۆڵەكەی بەتەواوەتی بەرجەستە بكات".

خۆپاراستن لە ڕەقبوونەوە
هەندێك لەدیمەنەكانی فیلمەكە، بەشێوەیەكی زۆر هونەری كاری لەسەركراوەو هیچ جۆرە خۆدەرخستنێك نابینرێت لەڕۆڵەكەی (Leonardo) بەتایبەت كە نزیكەی 320 كم رێگا لەو دارستانە چڕو سەهۆڵبەندانەدا دەبڕێت‌و لەیەكێك لەدیمەنەكانیداو دوای راوەدوونانی لەلایەن هندیە سوورەكانەوە، خۆی‌و ئەسپەكەی دەكەونە خوارەوەو بۆ دەربازبوون لەڕەقبوونەوە، چۆن ورگی ئەسپەكی هەڵدەدڕێت‌و دەیكاتە لانەی خۆی‌و شەوی تیا رۆژ دەكاتەوە، بەڵام رزگاری دەبێت لەڕەقبوونەوە.

چیرۆكی ئەم فیلمە
ئەم فیلمە، كە چیرۆكێكی راستەقینەیەو باسی سەدەكانی 19 دەكات، كاتێك كۆمەڵێك راوچی بۆ پەیداكردنی بژێوی ژیانیان روودەكەنە راو و لەڕێگا دوای هێرشی هیندیە سوورەكان لەیەكتر دادەبڕێن‌و دواتر لیوناردۆ كە رۆڵی پاڵەوانی سەرەكی دەبینێت، لەلایەن ورچەكەوە پەلامار دەدرێت‌و بەسەختی بریندار دەبێت‌و هاوڕێكانی‌و كوڕێكیشی لەگەڵدایەو لەناو ئەو سەهۆڵبەندانەدا بەسەر كەسێكدا بەجێیدەهێڵن. هاوڕێكەی كە ئەویش پاڵێوراوە بۆ باشترین ئەكتەری یاریدەدەری ئەكتەر، كەسێك دادەنێت بۆ ئاگاداری، بەڵام دواتر لەپێناوی پارەو بۆ بەجێهێشتنی، دەیەوێت لیوناردۆ بكوژێت، چونكە بەسەختی بریندارەو كوڕەكەشی رێگری لێدەكات، بەڵام كوڕەكەی دەكوژێت‌و لیوناردۆ زیندەبەچاڵ دەكەن، لەم ململانێیەداو لەو سەرمایەدا، بەدیار تەرمی كوڕەكەیەوە هەڵدەسێتەوەو هەورازو نشێوی زۆر دەبڕێت لەپێناو گەیشتن بەدوژمنەكەی‌و تۆڵەكردنەوە لە بەرامبەر كوشتنی كوڕەكەی.

ئەم فیلمە هەرچەندە ماوەكەی دوورودرێژە، بەڵام بینەر بێ تاقەت ناكات‌و هۆگری دەبێت بەتایبەت لەشەوی درێژی زستاندا بەتامەزرۆییەوە دەبێتە بینەری.

ئه‌م بابه‌ته 1043 جار خوێنراوه‌ته‌وه‌‌

PM:01:13:07/02/2016