"پرۆسەی دابەشكردنی زەوی لەمساڵدا تەواو دەبێت"

"پرۆسەی دابەشكردنی زەوی لەمساڵدا تەواو دەبێت"


خەڵك- بەشی هەواڵ

بەرهەم قەرەداغی، سەرۆكی رێكخراوی كۆمەڵەی كرێنشینانی كوردستان لە چاوپێكەوتنێكدا لەگەڵ (خەڵك)زانیاری نوێ‌ لەبارەی دابەشكردنی زەوی بەسەر كرێنشینان‌و فەرمانبەراندا ئاشكرا دەكات‌و دەڵێت:" زیاتر لە 70 هەزار فۆرمی وەرگرتنی زەویمان پڕكردۆتەوە و ناردومانەتەوە بۆ وەزارەتی شارەوانی‌و ئەوانیش سەرقاڵی جیاكردنەوەی فۆرمەكانن".

دەقی چاوپێكەوتنەكە:

خەڵك: تازەترین زانیاری لەسەر دابەشكردنی زەوی بەسەر فەرمانبەران‌و كرێنشیناندا چیە؟

بەرهەم قەرەداغی: پاش ئەوەی ئەنجومەنی وەزیرانی هەرێم و وەزارەتی شارەوانی بڕیاریاندا زەوی بەسەر كرێنشینان و فەرمانبەران‌و چین‌و توێژەكانی دیكەدا دابەشبكەن، وەك كۆمەڵەی كرێنشینان رێوشوێنی پێویستمان گرتەبەرو ئەو فۆرمەی لەلایەن وەزارەتی شارەوانیەوە گەیشتە دەستمان دابەشمان كردو پڕیانكردەوە.

خەڵك: ئەو فۆرمانەی بڕكراوەتەوە ئێستا لە كوێیە؟

بەرهەم قەرەداغی: سەرجەم ئەو فۆرمانەی گەیشتە دەستی ئێمە بڕمانكردەوە، كە ژمارەیان 70 هەزار فۆرمبوو، دوای پڕكردنەوەی گەڕاندماننەوە وەزارەتی شارەوانی، ئەوانیش ئێستا كار لە سەر جیاكردنەوەی فۆرمەكان دەكەن، چونكە ئەوانەی پێشتر سودمەند بوون، دابەشكردنی زەوی نایانگرێتەوە، هەرچەندە ئێمە جەختمان لەوە كردۆتەوە، كە هەندێك لەوانەی لەدوای راپەڕینەوە، زەویان وەرگرتووە، بەهۆی زروفی ئەوكاتەوە نەیانتوانیوە سودی لێببینن، لەبەر بژێوی ژیانیان فرشتویانە و ئێستا كرێچین، ئەوانیش بگرێتەوە.

خەڵك: وەڵامی ئەوان چی بوو؟

بەرهەم قەرەداغی: وەزارەتی شارەوانی‌و لایەنە پەیوەندیدارەكان لەسەر ئەو پێشنیارەی ئێمە وتیان" هەنگاوی یەكەم با جارێ‌ ئەوانە زەوییان بەسەردا دابەشبكرێت ، كە سودمەند نەبوون، دواتر دەكرێت بەسەر ئەوانیشدا زەوی دابەشبكرێت".

خەڵك : ئەوەندەی ئێوە لە نزیكەوە ئاگاداربن وەزارەتی شارەوانی تا چەند، جدییە لە دابەشكردنی، زەوی، چونكە ئێستا هەرێمی كوردستان بە دۆخێكی سەختی ئابوریدا تێدەپەرێت؟

بەرهەم قەرەداغی: ئەوەندەی ئێمە ئاگادارین وەزارەتی شارەوانی بەجدی كار لەسەر داخڵكردنی فۆرمەكان دەكات، بڕیارە لە ئایندەیەكی نزیكدا رێنمایی چۆنێتی دابەشكردنی زەوی بەسەر فەرمانبەران‌و كرێنشیناندا لە لایەن وەزارەتی شارەوانیەوە دەربچێت،  كە ئەمە هەنگاوی دووەمی پرۆسەكەیە.

خەڵك : لە ئێستادا، قەیرانی دارایی هەیە، حكومەت چۆن بڕیاری دابەشكردنی زەوی دەدات؟

بەرهەم قەرەداغی: قەیرانی داراییمان هەیە، بەڵام قەیرانی زەوییمان نییە.

خەڵك: سەبارەت بەو فۆرمانەی كە لەفەرمانگەكان پڕكراوەتەوە، ئێوە زانیارییتان هەیە هی ئەوان چی بەسەر هاتووە؟

بەرهەم قەرەداغی: لە كۆمەڵەكەی ئێمە بەشێكی زۆری فەرمانبەر هەیە، ئەوەی لای ئێمە فۆرمی پڕكردبێتەوە ، پشتگیریمانكردووەو ناوەكانمان ناردووە، ئەوەی پەیوەندی بە فەرمانگەكانی دیكەوە هەیە، دەكرێت، ئەوان خۆیان فۆرمەكانیان لە رێگەی وەزارەتەكەی خۆیانەوە رەوانە كردبێت.

خەڵك: بە گوێرەی زانیارییەكان لە سنوری پارێزگای سلێمانی زەوی ئیفرازكراو نییە، بۆ ئیفرازكردنیش شارەوانی سلێمانی پێویستی بە بودجەیەكی زۆر هەیە، ئێوە لە نزیكەوە ئاگاداری ئەو كێشەیەن؟

بەرهەم قەرەداغی: لەگەڵ سەرۆكی شارەوانی قسەمان كردووە، ئەویش رایگەیاندووە، كە زەوییان بەدەستەوە نییە، بەڵام ئەوەشی وت:"ئەگەر وەزارەتی شارەوانی فەرمانیان پێ‌ بكات، هەوڵی دابینكردنی دەدەن".

خەڵك : لە حاڵەتێكدا ئەگەر زەویش دابەشبكرێت، حكومەت ناتوانێت هیچ پێشینەیەك بدات، خەڵك چۆن زەوییەكانیان بكەن بە بینا؟

بەرهەم قەرەداغی: ئێمەش ئەو پرسیارەمان لە وەزارەتی شارەوانی كردووە، بەڵام بۆچوونی ئێمە ئەوەیە ، با زەوییەكان دابەشبكرێت، كەی دۆخی ئابووری سەقامگیر بوو، ئەو كاتە رێگەیەك بدۆزرێتەوە، كە هاوكاری خەڵكی پێبكرێت، بەڵام بە مەرجێك هیچ كەسێك كڕین‌و فرۆشتنی پێوە نەكات، یاخود دەكرێت، حكومەت زەوییەكان بداتە كەرتی تایبەت ئەوان بیكەن بە بیناو دواتر قیستەكان بدەنەوە بە ئەو كۆمپانیایەی كە بیناكەی دروست كردووە.

خەڵك: بەشێوەیەكی گشتی كەی پرۆسەكە تەواو دەبێت؟

بەرهەم قەرەداغی: ئەوەی كە بە ئێمە وتراوە، لە 2016 دا پرۆسەكە تەواو دەبێت.


ئه‌م بابه‌ته 45460 جار خوێنراوه‌ته‌وه‌‌

PM:01:35:10/01/2016