فیلمی عاشقەکان بە پێوە دەمرن باشترینە

فیلمی عاشقەکان بە پێوە دەمرن باشترینە

خەڵک

فیلمی (عاشقەكان بەپێوە دەمرن) لە دەرهێنانی شەهرامی مەسلەخی، دوای بەشداری سی و دووەمین فێستیڤاڵی نێودەوڵەتی فەجر كە ناونیشانی گەنجترین دەرهێنەری ئێرانی پێ وەرگرت، توانی لە یەكەم بەشداری فێستیڤاڵی سینەمایی نێونەتەوەییدا، كە لەلایەن كۆمپانیای (ئای لوف فیلمـ)ەوە بڵاوكرایەوە، خەڵاتی باشترین فیلمی لیژنەی داوەران وەربگرێت کە لە بەغدا ساز کرابوو، هاوکات لەبەر ئەوەی بەشێكی ئەم فیلمە لە پاڵ عەشق و خۆشەویستیدا باسی كۆچ و ئاوارەیی و شەڕ دەكات، دەرهێنەری فیلمەكە خەڵاتەكەی پێشكەشی ئەو منداڵە پەنابەرە كرد، كە لەجیاتی یاریكردن لەسەر جۆلانێ، شەپۆلە بێكۆتاكانی دەریا بوونە جۆلانە بۆی.

شەهرامی مەسلەخی، بە تەمەنێكی كەمەوە ناوبانگێكی گەورەی لە ئێران و هەرێمی كوردستان پەیدا كردووە، لەبنەچەدا خەڵكی شاری هەڵەبجەیەو لە ئێران گەورە بووە و بەشی دەرهێنانی لە زانكۆی تاران تەواو كردووە ،پێش ئەم کارەی، بە فیلمی (هێلانە) كە باس لە چیرۆكی (عەلی)، كوڕە ونبوەكەی هەڵەبجە دەكات ناوبانگێكی باشی لە كوردستان پەیدا كردووەو بۆ ماوەیەكی درێژ نماییش كراوە.

شەهرام  دەربارەی فیلمە تازەكەی، گوتی: "بەداخەوە بەهۆی بارودۆخی ناهەمواری هەرێمی كوردستان تا ئێستا دەرفەت نەبووە بۆ نمایشكردنی فیلمەكە لەهەرێم، بەڵام بەزویی لەسینەماكانی ئێران بڵاو دەكرێتەوە، هاوکات بەنیازم بەمزوانە فیلمەكە بۆ هاووڵاتیانی خۆم لە هەرێمی كوردستان نماییش بكەم".
 
شەهرام هیوای خواست فیلمەكە بتوانێت لە فێستیڤاڵەكاندا بەشدارییەكی سەركەوتووی هەبێت و سوپاسی هەموو ئەوكەسانە دەكات كە لە بەرهەمهێنانی ئەم فیلمەدا هاوڕێیەتیان كردووە، بەتایبەت ئەكتەرەكان و هاوكارانی لە هەرێمی كوردستان كە سەرەڕای بارودۆخێكی دژوار هیچ كەمتەرخەمیەكیان نەكردووە.

فیلمی (عاشق بەپێوە دەمرێ) لە دەرهێنانی شەهرام مەسلەخی‌ و بەرهەمهێنانی یوسف سەمەد زادە، ئەكتەرەكان: (شوان عەتوف، سروش سیحەت، بە بەشداریی پووریا پوور سۆرخ، لەعیا زەنگەنە، سۆلین دڵپاك، ئاسۆ عومەر سوارە، چریكە عەبەڕەش، هەردێ سەمیر، كاوە قادر، ڕێبوار هەورامی، سەعدوڵڵا نەسیری، مستەفا عوسمان، عەسەل هێرش).

بەڕێوەبەری وێنەگرتن: محەمەد ڕەزا سكوت، مۆنتاژ: ئیبراهیم سەعیدی، مۆسیقا: ئارمان موسا پور، كاری دەنگ: ێرش قاسمی، مۆسیقا-دەنگ هەڵگر: محەمەد حەبیبی، كاری میكیاژ: عەلیڕەزا باقربەیگی، دیزاینی جل و بەرگ و دیكۆر: سەعید هەنگرانی، دیمەنە تایبەتییە مەیدانییەكان: عەزیم محەمەدی، دیمەنە تایبەتییەكانی بینین: مەجید دوستی، فۆتۆگرافەر: سۆران نەقشبەندی و محەمەد سێقر، بەڕێوەبەری پلاندانان و یاریدەدەری یەكەمی دەرهێنەر: حەمیدڕەزا هیمەتی، بەڕێوەبەری بەرهەم: موحسین دانشوەر، بەرێوەبەری ئیداری: مەهدی موجەللەل، هاوكارانی بەرهەمهێنان لەكوردستانی عێراق: ئارش مەسلەخی و مستەفا عوسمان. وەرگێڕان: جیهاد نەزیف و مەریوان هەڵەبجەیی.








ئه‌م بابه‌ته 677 جار خوێنراوه‌ته‌وه‌‌

AM:10:09:14/10/2015