ئەپڵ هاندە نوێیەكەی نمایش كرد

ئەپڵ هاندە نوێیەكەی نمایش كرد


خەڵك-دڵشاد حەمە

ئەمڕۆ كۆمپانیای ئەپڵ، لە میانی ئاهەنگی ساڵانەی خۆی بۆ ئاشكراكردنی بەرهەمەكانی، مۆبایلێكی نوێی بە ناوی (iPhone SE) راگەیاند.

پاش ئەوەی كۆمپانیای ئەپڵ وازی لە بیرۆكەی بنچینەیی ستیڤ جۆبز هێنا و مۆبایلی شاشە گەورەی دروست كرد، فرۆشی مۆبایلەكانی بە رێژەیەكی بەرچاو كەمی كرد و ئەوەش لە لایەن بەرپرسانی ئەپڵ بە ئاشكرا دانی پێدا نرا.

ئەمرۆ (2016/3/21) كۆمپانیای ئەپڵ لە میانی ئاهەنگێكی تایبەت، مۆبایلێكی نوێی بە هەمان قەبارەی (iPhone 5S) نمایش كرد، بەڵام لە تایبەتمەندێتیدا پێشكەوتووتر و لە دیزایندا باشتر.

 (iPhone SE)، لە رووی خێرایی كاركردنەوەی چەند جارێك لە (iPhone 5S) خێراترە، پرۆسێسەرەكەی لە جۆری (A9ـی 64 بت)ـە، بە ڤێرژنی (iOS 9.3) كاردەكات.

كامێرای ئەم هاندە نوێیە، هەمان كامێرای (S6)ـە، كە (12) مێگا پێكسڵە و توانای تۆماركردنی ڤیدیۆی بە كوالێتی (4K) هەیە، كامێرای پێشەوەشی (5) مێگاپێكسڵە بە بیرگەی ناوەكی (32 و 64) كێگابایتی دەخرێتە بازاڕەوە.

(iPhone SE) خزمەتگوزاریی (Hi Siri)ـی تێدایە و پشتگیریش لە خزمەتگوزاریی (Apple Pay) دەكات و بە رەنگەكانی زیوی و خۆڵەمێشی و ئاڵتونی و ئاڵتونیی سوور باو، بە نرخی (399 تا 599) دۆلار لە مانگی ئایندەوە دەخرێتە بازاڕەوە.


ئه‌م بابه‌ته 1679 جار خوێنراوه‌ته‌وه‌‌

PM:09:33:21/03/2016