وردەكاری هاتنی لەشفرۆشە ئێرانییەكان بۆ هەرێم

وردەكاری هاتنی لەشفرۆشە ئێرانییەكان بۆ هەرێم


خەڵك- بەشی هەواڵ

لە ماوەی چەند ڕۆژی ڕابردوودا لە دەروازەكانی هەرێمی كوردستان هەزاران كەس وەك گەشتیار روویان لە هەرێم كردووە و لە نێو ئەو گەشتیارانەیشدا چەند گروپ و كەسێك بۆ لەشفرۆشی هاتوون و (خەڵك)یش وردەكاری هاتنی ئەو لەشفرۆشانە ئاشكرا دەكات.

سەرچاوەیەكی ئاگادار لە مەرزی حاجی ئۆمەران بۆ (خەڵك) ئاماژەی بەوەكرد، هاتنی لەشفرۆشە ئێرانییەكان بەردەوامە و بەتایبەتی لەم ڕۆژانەی پێشوودا زیاتر بووە و لە ژێر ناوی گەشتیاریدا ڕوو لە هەرێم دەكەن.

سەرچاوەكە، كە نەیویست ناوی ئاشكرابكرێت، ڕونیكردەوە، هاتنی ئافرەتانی ئێرانی چەند ساڵێكە بەردەوامە و بەبێ‌ هیچ ڕێگرییەك دێنە سنوری هەرێمەوە و دواتر بە تەكسی دەبرێنە سۆران یان هەولێر و دواتر دەمێننەوە یان بۆ ناوچەكانی دیكەی هەرێم دەگوازرێنەوە.

سەرچاوەكە ئەوەشی خستەڕوو، هەندێك لەو كەسانە بە گروپی بچوك دێت، یان وەك یەك خێزان خۆیان پیشاندەدەن بۆ ئەوەی گومانیان لێنەكرێت و دواتر لە شارەكانی هەرێم لەلایەن كەسانی دیكەوە سەرپەرشتی دەكرێن و لەشفرۆشیان پێدەكرێت.

هەڵگری نەخۆشین

وتەبێژی وەزارەتی تەندروستی حكومەتی هەرێم ڕایگەیاند، لە ماوەی ڕابردوودا چەندین ئافرەتی بیانی و ئێرانی لە پشكنین دەرنەچوون و ڕێگریان لێكراوە بێنە هەرێمەوە، چونكە بەپێی یاسا هەر كەسێك بێتە هەرێمەوە و زیاتر لە 10 ڕۆژ بمێنێتەوە دەبێت پشكنینی پزیشكی بۆ بكرێت.

د. خالس قادر بۆ (خەڵك) ئاماژەی بەوەكرد، بەپێی یاسا لەشفرۆشی قەدەغەیە و ئاگادارنیە ئافرەتانی بیانی و ئێرانی بۆ مەبەستی لەشفرۆشی بێنە هەرێمەوە، چونكە ئەو كەسانەی دێنە هەرێمەوە وەك كرێكار یان كارمەندی كۆمپانیاكان یان وەك گەشتیار دێن و وەك كەسانی لەشفرۆش پشكنیان بۆ ناكرێت.

بەپێی زانیارییەكانی (خەڵك) ئەو ئافرەتە ئێرانییانە بە زۆری لە هەولێر كاردەكەن و لە چەند شوێنێكی تایبەت بە مەساج و كافتریادا كاردەكەن و هەر لەو شوێنانەدا كەسانی كڕیاری سێكس دەناسن و هەندێكجاریش دەبرێنە دەرەوەی شوێنەكانی كاركردن.

وتەبێژی وەزارەتی تەندروستی وتیشی: "دەبێت گەنجانی هەرێم لەو ئافرەتانە دوربكەونەوە، تەنانەت ئەگەر لە پشكنینیش دەرچوبن، چونكە هەر ئافرەتێكی لەشفرۆش دەبێت وەك ئەوە سەیر بكرێت، كە هەڵگری نەخۆشی مەترسیدارە".

پێشتر تەلەفزیۆنی (بی.بی.سی) لە ڕاپۆرتێكدا باسی لەوەكردووە، كچانی ئێرانی بە لێشاو ڕوو لە هەرێمی كوردستان و بەتایبەتی هەولێر دەكەن و لەیانەكانی شەوانەدا دەخۆنەوە و كاتێكی خۆش بەسەر دەبەن.

ڕێنمای تایبەت بە هۆتیل و مۆتێلەكان

بەپێی زانیارییەكان، ئەو ئافرەتە ئێرانییانە زۆربەیان كوردن و بەشێكیان كوردی خۆرهەڵاتن و دوای ئەوەی دێنە هەرێمەوە لە چەند شوێنێكی تایبەت كاردەكەن، وەك هۆتێل و مۆتێل و چەند كافتریا و شوێنێكی مەساج، بەڵام وتەبێژی دەستەی گەشتوگوزاری هەرێم ڕەتیدەكاتەوە لە هۆتێل و مۆتێلەكاندا بە ئاشكرا ئەو كارەبكرێت.

نادر رۆستی بۆ (خەڵك) ئاماژەی بەوەكرد، گەشتوگوزار ڕێنمای تایبەتی داوەتە هۆتێل و مۆتێلەكان و ئەركەكانیان دیارن، هەر كارێك لە دەرەوەی ئەوانە بكەن بە سەرپێچی یاسای هەژمار دەكرێت.

وتیشی: "لە هەموو میوانخانەكانی هەرێمی كوردستاندا لەشفرۆشی قەدەغەیە و بەپێی یاسا هەر كەسێك بیكات ڕووبەڕووی لێپرسینەوە دەبێتەوە، چونكە ئەو شوێنانە گشتین و ناكرێت لە دەرەوەی ئەركی دیاریكراوی یاسایی بەكاربهێنرێن".

لە ماوەی ڕابردوودا وەزارەتی ناوخۆی حكومەتی هەرێم هەڵمەتی داخستنی شوێنەكانی مەساج و چەند شوێنێكی گشتی دەستپێكرد و بەپێی دواین ئامارەكان نزیكەی 54 شوێن تەنها لە هەولێر داخران، هەرچەندە چەند بەرپرسێكی باڵا هەڕەشەیان لە لیژنەی داخستنی ئەو شوێنانە كرد، بەڵام لەسەر داوای وەزیری ناوخۆ داخستنی ئەو شوێنانە هەر بەردەوام بوون.

(خەڵك) بۆ وەرگرتنی بۆچونی وەزارەتی ناوخۆ چەندجارێك پەیوەندی بە لیوا عەبدوڵا خەیلانی ؛بەڕێوەبەری پۆلیسی هەرێم؛ەوە كرد، بەڵام وەڵامی پەیوەندییەكانی نەدایەوە.

هەواڵی پەیوەندار



ئه‌م بابه‌ته 15886 جار خوێنراوه‌ته‌وه‌‌

PM:09:00:15/03/2016