Emgrand EC8 كەشخە و هەرزان

Emgrand EC8 كەشخە و هەرزان


خەڵك- كورد ئۆتۆ

ئۆتۆمبیلی ئیمگراند ئی سی 8، یەكێكە لە ئۆتۆمبیلە كەشخە و جوان و سەرنج راكێشەكانی كۆمپانیای جیلی چینی، سێ ساڵە لە كوردستان بازاڕێكی باشی بۆ خۆی پەیدا كردووە و وەك ئۆتۆمبیلێكی چینی كە یەكەم جارە دێتە وڵاتەوە، جیلی ئیمگراند ئی سی 8 سەرەتایەكی باشی تۆمار كردووە.

لە بنەڕەتدا كۆمپانیای جیلی، كۆمپانیایەكی چینییە، بەڵام بەهۆی كڕینەوەی بەشێك لە پشكەكانی كۆمپانیای ڤۆڵڤۆی سویدی، كۆمپانیای جیلی سوودمەند بوو لە گواستنەوەی شارەزایی و لێوەشاوەیی ڤۆڵڤۆ بۆ ئۆتۆمبیلەكانی خۆی، بۆیە لەو كاتەوە، ساڵ بەساڵ، بەرهەمەكانی جیلی، بەتایبەتی لەڕووی سەلامەتی و پێوەرەكانی یەكێتی ئەوروپاوە، هەنگاوی گەورە چۆتە پێشەوە.



دیزاینی دەرەكی
دیزاینی 2016ی ئیمگراند ئی سی 8، تا رادەیەكی زۆر هاوشێوەی ئیمگراند ئی سی 8ی 2015 یەو گۆڕانكاری ئەوتۆی بەسەردا نەهاتووە.

ئیمگراند ئی سی 8، ئۆتۆمبیلێكی كەشخە و گەورەیە و لەكوردستان گەنجان، بەتایبەتی ئەوانەی داهاتیان سنووردارە، روویان لەم ئۆتۆمبیلە چینییە جوانە كردووە.

لەڕووی دیزاینەوە، لایتەكانی پێشەوە و لێوارێكی لید سەرنجی هەمووان رادەكێشن كە لەگەڵ عەتەر و دەعامی پێشەوە سیمایەكی گەنجانەی هێرشبەریان بۆ ئیمگراند ئی سی 8 دروست كردووە.

لە بنەڕەتدا، ئیمگراند ئی سی 8 بۆ بازاڕەكانی ئەوروپا دروست كراوە، بۆیە تا رادەیەكی زۆر رەچاوی پێوانە و مەرجەكانی سەلامەتی و توندوتۆڵی ئەوروپای تێدا كراوە، بۆ ئەوەی جیلی چینی سوودی لە ئەزموون و شارەزایی ڤۆڵڤۆی سویدی وەرگرتووە، چونكە ڤۆڵڤۆ شارەزایی ئەو مەرج و پێوەرانەیە و ڤۆڵڤۆ خۆیشی نەك لەسەر ئاستی ئەوروپا، بگرە لەسەر ئاستی جیهانیش یەكێكە لە ئۆتۆمبیلە توندوتۆڵ و بەهێزو تۆكمەكان كە تا ئاستێكی زۆر رەچاوی سەلامەتی و سەیڤتی دەكات.



دیزاینی ناوەوە

دیزاینی ناوەوەی ئیمگراند ئی سی 8 ی 2016 زۆر گۆڕانكاری بەسەردا نەهاتووە و تا رادەیەكی زۆر هاوشێوەی ئیمگراند ئی سی 8 ی 2015 یە، بەڵام لە جاران زیاتر تەكنەلۆژیای تێدا بەكارهاتووە و شاشەی ناوەڕاستی داشبۆردەكەش لەجاران گەورەتر و رازاوەترە.

بەشێوەیەكی گشتی، ئیمگراند ئی سی 8 ئۆتۆمبیلێكی سیدانی گەورەیە، ركابەری ئۆتۆمبیلەكانی هۆندا ئەكۆرد و هیوندای سۆناتا و كیا ئۆپتیما و تۆیۆتا كامری و شۆفرۆلێ مالیبۆیە. بەڵام لەبەرئەوەی مێژووییەكی درێژی نییە و هەروا بەرهەمی وڵاتی چینە، بازاڕێكی باشی نییە، بەڵام بەهۆی گونجاوی نرخ و ئەو ئەنجامە دڵخۆشكەرانی لەم ساڵانەدا بەدەستی دەهێنێ، خەریكە لە كوردستان و هەندێ وڵاتی ناوچەی خۆرهەڵاتی ناوەڕاست بازاڕێكی گونجاو بۆ خۆی پەیدا دەكات.

ناوەوەی ئیمگراند ئی سی 8 زۆر باش و تۆكمە و جوانە، ئەگەر لۆگۆكان لێبكەیتەوە هەست دەكەیت لە ئۆتۆمبیلێكی ئەوروپی گرانبەهادایت نەك ئۆتۆمبیلێكی چینی، چونكە زۆر فراوان و دیزاینێكی هاوچەرخی هەیە و مواسەفات و تایبەتمەندی زۆری تێدایە و زۆربەی مۆدیلەكانی كوشنەكانی چەرمە و مەوادە بەكارهاتووەكانیش كوالیتیان بەرزە.



مواسەفات‌ و تایبەتمەندی

كۆمپانیای جیلی هەوڵیداوە ناوبانگ و كەسایەتییەكی باش و بەهێز بۆ ئیمگراند ئی سی 8 دروست بكات بۆ ئەوەش هەوڵیداوە زۆرترین مواسەفات و خواستی شۆفێری هاوچەرخ دەستەبەر بكات، بۆیە زۆرینەی مواسەفاتەكان لەو ئۆتۆمبیلە چینییەدا دەستەبەرن و ركابەری كۆمپانیاكان دەكەن.

لەم مۆدیلەدا، ئیمگراند ئی سی 8 هەندێ لە دوگمەكان لەسەر سوكان جێگیر كراوە هەرچەندە پێشتر ئیمگراند نەیدەویست ئەو كارە بكات بۆ ئەوەی شۆفێر سەرقاڵ نەكات، بەڵام دواجار ئەو هەنگاوەی نا.. نەك هەر ئەوە بگرە، دوگمەی جێگیركردنی خێرایی و كۆنترۆڵكردنی دەنگ و سپیكەرەكانیش لەسەر سوكان جێگیر كردووە.

لەسەر داشبۆردیش، سیستمێكی پێشكەوتووی جی پی ئێس هەیە لەگەڵ سیستمی بلوتوس و سیستمی رووناككردنەوەی زیرەك و سیستمی كۆنترۆڵكردنی گەرمی بەشێوەیەكی ئۆتۆماتیكی

مەكینەو لێوەشاوەیی

ئەم مۆدیلەی ئیمگراند ئی سی 8 لەڕووی مەكینەشەوە گۆڕانكاری ئەوتۆی بەسەردا نەهاتووە، ئەمساڵیش هەردوو جۆر مەكینەی هەیە، كە هەردووكیان ژاپۆنین و دروستكراوی كۆمپانیای میتسۆبیشی ژاپۆنین و چوار پستۆنن.

یەكەمیان، مەكینەی چوار پستۆنە بە قەبارەی 2.0 لیتر و بەتوانای 136 ئەسپ و گوژمی سوڕانەوەی 180 نیوتن مەتر.

مەكینەی دووەم، هەر چوار پستۆنە، بەڵام گەورەترە و قەبارەی 2.4 لیترە بەتوانای 157 ئەسپ و گوژمی سوڕانەوەی 213 نیوتن مەتر.


ئه‌م بابه‌ته 7432 جار خوێنراوه‌ته‌وه‌‌

PM:06:40:15/03/2016