هێشتا نرخی دەرمان‌و تاقیگەكان كەمنەكراوەتەوە

هێشتا نرخی دەرمان‌و تاقیگەكان كەمنەكراوەتەوە


خەڵك- هۆشيار عه‌لى

ژمارەیەك لە نۆرینگەكان لە سنوری پارێزگای سلێمانی دەستیان بە داشكاندنی نرخەكان كردووە لە پسوڵەی سەردان كردن، بەڵام تا ئێستا نرخی دەرمان و پشكنین بەپێی نرخە نوێیەكانی وەزارەت كەمنەكراوەتەوە، وەزیری تەندروستیش دەڵێت، ستیكەر لە دەرمانەكان دەدەن.

تەها مەحوی، سەرۆكی سەندیكای پزیشكان لقی سلێمانی بە (خەڵك)ی ڕاگەیاند، ژمارەیەكی زۆر لە نرخی پسوڵەی نۆرینگەكان لە شاری سلێمانی و دەوروبەری كەمكراوەتەوە و زۆر كەمتریشە لەو نرخەی كە لە وەزارەت دیاری كراوە.

ئاماژەی بەوەش كرد، بە ڕەچاوكردنی  دۆخی دارایی هاوڵاتیان و هەرێمی كوردستان نرخی پوسڵە لە نێوان 10 بۆ 15 هەزار دینارە، بەڵام نرخی دەرمان و تاقیگەكان دیاری نەكراوە، ئەوەش پەیوەندی بە سەندیكای دەرمانسازی هەیە.

لای خۆیەوە حەسەن ڕەمەزان ، سەرۆكی سەندیكای دەرمانسازانی كوردستان لقی سلێمانی، بە (خەڵك)ی ڕاگەیاند، بەهۆی قەیرانی دارایی هەرێمی كوردستان بڕیار درا نرخی دەرمان كەمبكرێتەوە، ژمارەیەكی زۆر لە جۆری دەرمانیش نرخەكانیان لە لایەن لیژنەیەك لە وەزارەتی تەندروستی دیاری كراوە.

ڕاشیگەیاند، ژمارەیەكی زۆر لە جۆری دەرمان نرخەكانیان دیاری كراوە، بەڵام تا ئێستا نەچووەتە بواری جێبەجێ‌ كردنەوە و ئەو دەرمانانەی نرخەكانیان دیاری كراوە لە دەرمانخانەكاندا نین.

باسی لەوەش كرد، تا ئێستا بە نوسراوی فەرمی كەمكردنەوەی نرخەكانیان بە دەست نەگەشتووە، هۆكارەكەی بۆ ئەو كۆمپانیایانە دەگەڕێتەوە، كە ئەو دەرمانە دەهێنن، بڕیاربوو كۆمپانیاكان نرخە نوێكە بخەنە سەر دەرمانەكە، نەك كۆگا و دەرمانخانەكان.

لە ماوەكانی رابردوودا گلەیی زۆر لە سیستمی تەندروستی هەرێم دەكرا، بەتایبەت نۆرینگەكان بەوەی پزیشكان لەگەڵ دەرمانخانە و تاقیگەكان هاوبەشن و پارەیەكی زۆر لە نەخۆش دەستێنن.

بەتایبەتتریش كە ئێستا قەیرانی دارایی رووی لە هەرێم كردووە و كارو كاسبی هاوڵاتیان پەكی كەوتووە و موچەش سەرباری كەمبوونەوەی بۆ نیوە، دواش دەكەوێت، لە هەموو كات زیاتر بە پێویست دەزاندرێت چاو بە كاری نۆرینگە و دەرمانخانە و تاقیگەكاندا بخشێندرێتەوە.

لەو بارەوە ڕێكەوت حەمە ڕەشید، وەزیری تەندروستی حكومەتی هەرێمی كوردستان، بە (خەڵك)ی ڕاگەیاند، دیاری كردنی نرخی دەرمان قۆناغی یەكەمی تەواو كردووە، ئەویش دیاری كردنی نرخەكەیە، قۆناغی دووەم ماوە ئەویش دانانی نرخە نوێكەیە لەسەر دەرمانەكان.

وتیشی: "لە دوو ڕۆژی ڕابردوو نرخە نوێكە دەخرێتە سەر ئەو دەرمانانەی كە لیژنەكان دیاریان كردووە، دەكەوێتە بازاڕ و بە دەرمانخانەكانیش بڵاودەبێتەوە".


ئه‌م بابه‌ته 1372 جار خوێنراوه‌ته‌وه‌‌

AM:08:48:14/03/2016