كتێبی (مرۆڤ‌و كەرامەت) تازەترین بەرهەمی مەریوان قانعە

كتێبی (مرۆڤ‌و كەرامەت) تازەترین بەرهەمی مەریوان قانعە

خەڵك 
(مرۆڤ‌و كەرامەت) تازەترین بەرهەمی نوسەرو رۆشنبیری كورد (مەریوان وریا قانع)ە وەك خۆی دەڵێت:" كتێبەكە ئەم مانگە دەكەوێتە بەر دیدی خوێنەران".

لەبارەی ناوەرۆكی كتێبەكەشەوە نوسەر دەڵێت:" كتێبەكە باسێكی درێژە سەبارەت بە سێ چەمك لە چەمكە سەرەكییەكانی ناو دونیای مۆدێرن، كە بریتین لە چەمكەكانی ”ماف" و ”كەرامەت" و ”پلورالیزم". ئەم سێ چەمكە ھەم وەك دەرەنجامی دروستبوونی دونیای مۆدێرن و ھەم وەك ھێزی دروستكردنی ئەو دونیایە وێناكراوە و باسكراوە.

مەریوان قانع ئاماژەی بەوەشكردووە، لەبەشی یەكەمدا، كە تەرخانە بۆ باسكردنی لەدایكبوونی ”مرۆڤی خاوەن ماف"، بەدرێژیی لەسەر مەسەلەی وێناكردنی مرۆڤ لە فیكری ئەرستۆ و فیكری سەدەكانی ناوەڕاست و فیكری ئیسلامی كلاسیكیی و ئینجا فیكری ڕۆشنگەریی و مۆدێرندا وەستاوە. كتێبێكە سەفەرێكی درێژە بەناو چەندان ڕوانینی جیاوازدا سەبارەت بە شوێن و پێگەی مرۆڤ لە ژیانی كۆمەڵایەتیی سیاسیی و فەرھەنگیدا. بەشێكی تری ئەم بەشە تەرخانە بۆ نیشاندانی مێژو و سیاقی لەدایكبوونی بەیاننامەی مافەكانی مرۆڤ و ڕەخنەكانی ماركس و ھانا ئارێنت لەو مافانە.

لەبارەی بەشی دووەمی كتێبی مرۆڤ‌و كەرامەتەوە مەریوان قانع دەڵێت:"بەشی دووھەمی كتێبەكە تەرخانە بۆ باسكردنی پرسی كەرامەت. ئەم بەشە بە باسكردنی شوێن و جێی كەرامەت لە كۆمەڵگای ئێمەدا دەستپێدەكات و ھەوڵئەدات مێژووی سەدەی بیستەمی كۆمەڵگای ئێمە لەڕێگای چەمكی كەرامەتەوە بخوێنێتەوە. دوای ئەوە بەدرێژیی لەسەر مانا فیكریی و فەلسەفیی و سیاسییەكانی چەمكی كەرامەت دەوەستێت.

وەك نوسەر دەڵێت:"بەشی سێھەم و كۆتایی كتێبە تەرخانە بۆ شیكردنەوەی دیاردەی پلورالیزم و چۆنیەتی بوونی ئەم دیاردەیە بەبەشێك لە ڕوانین بۆ مرۆڤ و كۆمەڵگا ھاوچەرخەكان. بەسەریەكەوە كتێبێكە بەرگرییكردنێكی ھەمەلایەنە لە مرۆڤ وەك بوونەوەرێكی خاوەن ماف و خاوەن كەرامەت و جیاواز و پلورال. بەھیوای خوێندنەوە و ڕەخنەكردن و دەوڵەمەندكرنی بابەتەكانی كتێبەكە.




ئه‌م بابه‌ته 2045 جار خوێنراوه‌ته‌وه‌‌

PM:07:31:11/03/2016