سڵاو له‌ ڕۆحت<br> کابانی ئاواز و سترانه‌ نه‌مره‌کان

سڵاو له‌ ڕۆحت
کابانی ئاواز و سترانه‌ نه‌مره‌کان

خەڵک- غەمگین فەرەج

یه‌کێک له‌ خه‌سڵه‌ته‌ دیاره‌کانی مامۆستا و هونه‌رمه‌ندی گه‌وره‌ (که‌ریم کابان) ئه‌وه‌یه‌ که‌ له‌ ڕێگه‌ی چه‌ند دانه‌ ئاواز و سترانێکه‌وه‌ بووه‌ به‌ سیمبۆلی ئاوازه‌ نه‌مروناوازه‌ کان. ڕه‌نگه‌ هه‌ریه‌ک له‌ گوێگران و هه‌وادارانی مامۆستا بووبێته‌ پرسیار لایان و، بپرسن که‌ نهێنی ئه‌م جوانی و نه‌مرییانه‌ له‌م ئاوازانه‌دا ئه‌بێت چی بێ؟ زۆر به‌ساده‌یی، تێڕامان و سه‌لیقه‌یه‌کی قووڵی ئه‌م هونه‌رمه‌نده‌ گه‌وره‌یه‌ له‌ خودی پرۆسێسی ئاوازدانانه‌ که‌ ئه‌و هه‌موو جوانی و نه‌مرییه‌ی به‌ ئاوازه‌کانی کابان به‌خشیوه‌. ڕه‌نگه‌ زۆر سترانبێژی ئاوازدانه‌ری دی هه‌بن، به‌ڵام ئه‌م خه‌سڵه‌تی نه‌مرییه‌ له‌ به‌رهه‌مه‌کانیاندا نه‌بن، ئاخر ده‌بێت هه‌موو ئه‌و ڕاستییه‌ بزانین که‌ ئاوازدانان ناکرێت به‌ته‌نها خوێندنه‌وه‌ی ده‌ق و تێکسته‌کان بێت به‌ هه‌مان ڕیتم و کێش و سه‌روای هۆنراوه‌کان، به‌ڵکو یه‌کێک له‌ پره‌نسیپه‌ گرنگ و پڕ به‌هاکانی کاری ئاوازدانان، وێناکردن و نمایشکردنه‌وه‌ی وێنه‌و وشه‌ شیعرییه‌کانه‌ به‌ ده‌نگ و نه‌غمه‌ موزیکیه‌کان، که‌ دیاره‌ کابانی گه‌وره‌و به‌ ئه‌زموون هه‌میشه‌ به‌ پشتبه‌ستن به‌م میتۆده‌ گرنگ و زانستییه‌ی ئاوازدانان گۆرانییه‌کانی درووستکردووه‌، دواجاریش هه‌ر ئه‌م میتۆده‌ی کارکردنه‌ له‌ پرۆسێسی ئاوازداناندا که‌ واده‌کات به‌رهه‌مه‌ لیرکی و گۆرانییه‌کان بۆ مه‌ودای دوور و هه‌ندێک جاریش بۆ هه‌میشه‌یی به‌زیندوویی بمێننه‌وه‌. له‌ یادمه‌ زۆر جار به‌ده‌م ورده‌ پیاسه‌یه‌که‌وه‌ له‌ په‌یمانگه‌ له‌گه‌ڵ مامۆستا و هاوڕێی ئازیزم هه‌ندێک بیرو ڕامان له‌سه‌ر ئاوازدانان ده‌گۆڕییه‌وه‌، ئه‌وکات من سه‌ره‌تاکانم بوو وه‌ هه‌میشه‌ مامۆستا پاڵپشت و هانده‌رم بوو، ئه‌م هونه‌رمه‌نده‌ ئه‌زیزه‌ بۆ خۆی موزیسیان نه‌بوو، به‌ڵام به‌ بێ ئه‌وه‌ی که‌ بزانێت ئاوازه‌کانی پڕ بوون له‌ میتۆد وپه‌یڕه‌وه‌ تیۆری و زانستیه‌کانی موزیک، زۆر جار له‌ ئاوازه‌کانیدا به‌ جۆرێک ده‌نگ و مه‌ودا موزیکیه‌کانی ڕێکده‌خست که‌ له‌ ئاوازی مامۆستا و شاره‌زایانیشدا ڕیزبوون و ئاوێته‌بوونی ده‌نگه‌ موزیکیه‌کانت به‌و شێوه‌ ڕه‌نگاڵه‌و جوانه‌ نه‌ده‌بینی، هه‌ر بۆیه‌ هه‌میشه‌ که‌ ده‌رفه‌تێکم بۆ ڕه‌خسا بێت و له‌گه‌ڵ مامۆستا بووبم پرسیارگه‌لێکی زۆرم لا گه‌ڵاڵه‌ ده‌بوو، هه‌میشه‌ لێم ده‌پرسی مامۆستا گیان زۆر که‌م که‌م ئاوازداده‌نێیت، بۆ؟ له‌ وه‌ڵامدا ده‌یگووت غه‌مگین گیان من جاری وا هه‌بووه‌ هۆنراوه‌یه‌ک بۆ چه‌ند ساڵێک له‌ گیرفانه‌کانمدا بووه‌، لاپه‌ڕه‌که‌ی ته‌واو کۆنبووه‌ له‌گیرفانمدا جارێکی تر نوسیومه‌ته‌وه‌، له‌ ڕۆژێکدا چه‌ندین جار ئه‌م هۆنراوه‌یه‌م خوێندۆته‌وه‌ و شه‌ن و که‌وی ته‌واوم کردووه‌، تا ئاوازێکی گونجا و و پڕاو پڕی وشه‌و وێنه‌ شیعریه‌کانم نه‌دۆزیوه‌ته‌وه‌ لای که‌س نه‌موتووه‌ ئاوازی نوێم هه‌یه‌، له‌ یادمه‌ پێت ده‌گوتم: هۆنراوه‌یه‌ک که‌ جوان بوو پڕ بوو له‌ وێنه‌ی شیعری جوان و هه‌ڵگری په‌یامێکی جوان بوو گوناهێکی گه‌وره‌یه‌ غه‌دری لێبکه‌ین. به‌ڵێ نهێنی نه‌مری و جوانی ئاوازه‌کانی کابانی نه‌مر له‌م به‌رپرسیارییه‌تی و ڕێزگرتنه‌یدا بووه‌ بۆ کاره‌کانی خۆی و بۆ کایه‌ ئه‌ده‌بی و هونه‌ریه‌کانی تر و بۆ ئه‌و قه‌در و ڕێزه‌ی که‌ بۆ گوێگرانی خۆی و هونه‌ره‌که‌ی هه‌یبووه‌، ئه‌مه‌ وێڕای په‌یڕه‌وکردنی میتۆده‌ زانستیه‌ پوخته‌کانی کاری ئاوازدانان.

یه‌کێک له‌ جوانییه‌کانی تری کابانی نه‌مر ڕێزگرتن و هاندانی هه‌میشه‌یی بووه‌ بۆ هه‌ر توانایه‌کی نوێی گه‌نجانه‌ و هه‌موو ئه‌زموونێکی نوێ له‌ دنیای موزیک و گۆرانی کوردیدا. کۆتایی ساڵانی هه‌شتاکان ئه‌و ساتانه‌ی ئێمه‌ کۆمه‌ڵێک لاوی موزیسیان و سترانبێژ له‌ به‌شی موزیکی کۆمه‌ڵه‌ی هونه‌ره‌جوانه‌کان به‌وزه‌و توانایه‌کی گه‌نجانه‌وه‌ سه‌رقاڵی کاری موزیک بووین، ئه‌م هاوڕێ و مامۆستا گه‌وره‌یه‌مان به‌رده‌وام سه‌ردانی ده‌کردین و هێنده‌ی تر عاشقی موزیکیی کردبووین له‌ کاتێکدا زۆر له‌ مامۆستاکانی ترمان پشتیان تێکردین که‌چی ئه‌م مامۆستا ئه‌زیزه‌مان بوو بووه‌ داینه‌مۆی کارو به‌رهه‌مه‌کانی ئه‌و گه‌نجانه‌ی که‌ ته‌نها خه‌ونمان نمایشکردنی موزیک و سترانی کوردی بوو له‌به‌رگێکی نوێ و سه‌رده‌میانه‌تردا، بۆ مێژوو به‌ڕێزیان و مامۆستای نه‌مر (ولیه‌م یوحه‌نا) بوو بوونه‌ مایه‌ی به‌رده‌وامی و زیندوویی هونه‌ره‌که‌ی ئێمه‌. هه‌ر ئه‌و ساتانه‌ مامۆستا که‌ریم کابان زۆر به‌ باشی توانا هونه‌رییه‌کانی ده‌ناسی و خوێندنه‌وه‌ی تایبه‌تی خۆی هه‌بوو بۆیان. من چه‌ند ئاوازێکم بۆ هه‌ردوو هونه‌رمه‌ند (به‌هجه‌ت یه‌حیا و عه‌دنان که‌ریم) دانابوو کارمان له‌سه‌ر ده‌کرد، له‌ نزیکه‌وه‌ ڕێنمایی ده‌کردین، هه‌ر ئه‌و کات له‌گه‌رمه‌ی پرۆڤه‌ی هه‌ردوو گۆرانی ئه‌ی دایه‌ گیان و ئه‌ی هاوسه‌ره‌ ئازیزه‌که‌مدا له‌ نزیکه‌وه‌ پێی ده‌گووتم، ئه‌م دوو ده‌نگه‌ دواجار ده‌بنه‌ نمونه‌یه‌کی جوان و پێشه‌نگ له‌ دنیای گۆرانی کوردیدا.

من لێره‌وه‌ ئیتر شتێکم نه‌ماوه‌ له‌ حزور جوانی و میهره‌بانیه‌کانی تۆی هاوڕێ و مامۆستادا بیڵێم، ته‌نها ده‌ڵێم سوپاسگوزاری سه‌رجه‌می ئه‌و شته‌ جوانانه‌م که‌ لێتانه‌وه‌ فێربووم. فێرتان کردم که‌ چۆن ڕێز له‌و خه‌ڵکانه‌ بگرم که‌ گوێگرمانن، فێرت کردم چۆن به‌ حورمه‌ته‌وه‌ بڕوانمه‌ ناوه‌رۆک و مه‌غزای کاره‌ هونه‌ریه‌کانم پێش ئه‌وه‌ی پێشکه‌ش به‌ جه‌ماوه‌ره‌که‌می بکه‌م، فێرت کردم په‌له‌ نه‌که‌م، که‌م و پوخت کار بکه‌م، به‌ڵام کاره‌کانم جوان و شایسته‌ به‌ میڵه‌ته‌که‌م وبه‌ مێژووی هونه‌ریی خۆم و میڵه‌ ته‌که‌م بێت. سوپاس، بۆ هه‌میشه‌ سوپاس بۆ تۆی ئه‌زیز و سه‌رجه‌م ئه‌و ئازیزانه‌ی وه‌ک تۆ پارچه‌یه‌کن له‌ میهره‌بانی و خۆشه‌ویستی بۆ به‌رامبه‌ره‌کانیان. به‌ داخه‌وه‌ تۆی ئه‌زیز به‌ هێنده‌ی گه‌وره‌یی و جوانیه‌کانی خۆت خزمه‌ت نه‌کرایت و قه‌درت نه‌گیرا.دڵنیابه‌ یه‌کێک له‌ ڕووه‌ گه‌ش و جوانه‌کانی دنیای گۆرانی و موزیکی کوردی، به‌رهه‌مه‌ ناوازه‌کانی تۆی نه‌مر و به‌ حه‌ق هونه‌رمه‌نده‌.


ئه‌م بابه‌ته 6021 جار خوێنراوه‌ته‌وه‌‌

PM:12:27:24/02/2016