نرخی نەوت دابەزی .. هۆكارەكەی ئاشكرا كرا
       
نرخی نەوت دابەزی .. هۆكارەكەی ئاشكرا كرا

خەڵك- ئومێد حسێن

دوای بێ ئومێدبوونی وڵاتان لە پابەندبوونی ئێران بە بڕیاری هەڵپەساردنی بەرهەمهێنانی نەوت، جارێكی دیكە نرخی نەوت لە بازاڕەكانی جیهان بۆ خوار 40 دۆلار بۆ هەر بەرمیلێك دابەزی.

ئەمڕۆ دوو شەممە جارێكی دیكە نرخی نەوت بۆ خوار 40 دۆلار بۆ هەر بەرمیلێك دابەزی و نرخی برنت 1.19 دۆلار دابەزی و نرخی هەر بەرمیلێك بووە 39 دۆلار و 20 سەنت، كە بەراورد بە 12 ساڵی ڕابردوو نرخەكەی لە مانگی كانونی دووەمی ئەمساڵ بۆ 27 دۆلار و 10 سەنت بۆ هەر بەرمیلێك دابەزی بوو.

هاوكات، هەر ئەمڕۆ نرخی نەوتی خاوی ئەمریكی بە بڕی 1.13 دۆلار دابەزی و نرخی هەر بەرمیلێك بووە 37 دۆلار و 37 سەنت.

لای خۆشیەوە، تاماس فارجا ؛لێكۆڵەرەوە لە دامەزراوەی (بی. فی. ئێم ئۆیل ئەسۆشەیتس)؛ بە ئاژانسی (ڕۆیتەرز)ی ڕاگەیاندووە، هۆكاری دابەزینی نرخی نەوت دەگەڕێتەوە بۆ وتەی بەرپرسانی ئێران، كە ڕایانگەیاندووە، هەر كاتێك بڕی بەرهەمی نەوتی گەیشتە 4 ملیۆن بەرمیلی ڕۆژانە ئەوكات تەنها بەشدرای لە گفتوگۆكان دەكات.

ئەو لێكۆڵەرە ئاماژەی بە لێدوانەكانی بێجین زنغنە ؛وەزیری نەوتی ئێران؛ كرد، كە یەك شەممەی ڕابردوو ڕایگەیاندبوو، وڵاتەكەی ئەندامی ڕێكخراوی وڵاتانی هەناردەكاری نەوتە (ئۆپیك) بۆیە بەشدرای گفتوگۆكان دەكات هەركاتێك ئاستی بەرهەمی گەیشتە 4 ملیۆن بەرمیل نەوتی ڕۆژانە.

وەزیری نەوتی ئێران پێشبینی ئەوەشی كردووە، كە هەناردەی نەوتی وڵاتەكەی لە 19ی ئازار دەگاتە دوو ملیۆن بەرمیلی ڕۆژانە، كە لە مانگی ڕابردوودا تەنها 1.75 ملیۆن بەرمیلی لە ڕۆژێكدا هەناردە كردبوو.

سەرچاوەیەكیش بە (ڕۆیتەرز)ی ڕاگەیاندووە، كە پێدەچێت وڵاتانی ئەندامی ئۆپیك و دەرەوەی ئەو ڕێكخراوە كۆبوونەوەی دیكە ئەنجام بدەن سەبارەت بە پلانی هەڵپەساردنی بەرهەمهێنانی نەوت لە ناوەڕاستی مانگی نیسان لە دەوحەی پایتەختی قەتەر.


PM:05:58:14/03/2016

ئه‌م بابه‌ته 5775 جار خوێنراوه‌ته‌وه‌‌
زیاتر ...
Copyright 2014. xelk.org. All Rights Reserved.
Created by:kurdsky.com